MATIU 12
12
Na paàrangu rukuna na lodu Hangahu
(Mrk. 2:23-28; Luk. 6:1-5)
1La hau lodu Hangahu, ba nali ningu la hau woka uhu nggàndumu i Yehu, da makiku-nya da-pakiringu pamuti uhu nggàndumu, hi dangangu ba manjuu-danya. 2Ba daita-haka tau Parihi, hi dapanii dànya i Yehu, “Tàngaru! Da tau makiku-nggau dapangga-yaka na uku anggama-nda ba datuya na pa-hiringu la lodu Hangahu,” wàdanya.
3Nahema i Yehu, “Màla ndedi mihandàkangu-a nyimi pambaha-ya jàka nggàra ulana i Ndautu ba jiaya na manjuuda nyuna dàngu da karia-na? 4Ba natama nyuna la Uma Ala; hi nanganja da roti da pambàda mangejingu-ya i Ala. Làti tundunya na uku anggama-nda, nyuna dàngu da karia-na nda ukua panganja da roti nuda – mbulungu da ratua duda làti da mapeku panganja. 5Jàka ndia ndedi mimbaha-maya dimi daa la huratu ukuna i Muha, nu la nimbihu lodu Hangahu da ratu da ma-paloku la Uma Ala, dapangga-ya na kalaratu lodu Hangahu, tàka nda pa-panjala-aha? 6Pangàda-nya na paniinggu yiana: lai yiahu ninya na marihi bokulu welingu la Umana i Miri. 7Daa la Huratu Matua ninya na pa-tulihu: Na mila etia duku na pakaruhi-nggu, nda kameti maraku banda-a. Làti nyimi jàka mipi hàmunya na panii nuna, ndai panjala-aha làti da manda njala. 8Nadu na Ana Tau ba makuaha lodu Hangahu-ya,” wàna.
Na tau na mameti lima hapapa-na
(Mrk. 3:1-6; Luk. 6:6-11)
9I Yehu na-dunjaku-nya lai nu hi nalaku la hau uma bungguru. 10Lai nu ninya na tau na mameti lima hapapa-na. Ba tau mapira-ya na mahi - himbunya njalana i Yehu, da-paàra-nya, “Pekuna ihu la pa-pamàlaru tau la lodu Hangahu,” wàdanya.
11Nahema i Yehu, “Era ningu haàtu lai nyimi maningu mbimbingu heu, tàka la lodu Hangahu na-kanabu la lambongu manjolungu; màla na mangu mbimbingu nda napamu-karungu-a pa-padita-ya nuna na mbimbi weli dalungu la lambongu? 12Na, na tau narihi pabilangu-pa welingu la mbimbi! Jàka tuna nu pekuna pandula tau la lodu Hangahu,” wàna. 13Tunaka nu i Yehu hi napanii-nya na tau na mameti lima hapapa-na, “Pajola-ya dumu na limamu!” wànanya.
Na tau nuna na-pajola-ya na limana, ka hàmu-nanyaka na limana hama tuna na lima hapapa-na. 14Ba tuna da tau Parihi, dunjaku-ma-adanya nuna na uma bungguru, hi da-pahamangu pa-pameti-ya i Yehu.
Na papalewa na papindi-na i Ala
15I Yehu napi-manya na pawuku akatu-da da tau Parihi hanggangu lai Nyuna. Ka laku-nanyaka welingu lai nu, nadangu na tau na makiku-nya. Hi na-pamàlaru hàlaya na tau na mahidu. 16Na nyuna nahiri-nja papanii la tau rukuna Nyuna. 17Ba tuna nu pa-deningu-nanyaka na papanii-na i Ala la ngaruna i Wunangu Yahaya,
18“Yiana-ya na papalewa na papindi-nggu,
na tau pambuha-nggu dàngu mali la etinggu.
Na Ngahunggu kuwua-nya Nyuna,
na pa-deningu-nggu napa na-bobaru-ya la ba - banjaru-ka.
19Nyuna nda na-pahànggangu dàngu nda na-warangu-a,
nda na-pabobarungu-a la ànda bokulu.
20Na kambauni na ma-tamainangu nda napata-aya,
na palita na malàlu nda napàda-aya.
Napa Nyuna na-pajàrungu hi lupa natoma-ya na ma-deningu,
21mbuu ndàbada da banjaru damonu-nya Nyuna,” wàna.
I Miri Yehu dàngu i Mbeluhembulu
(Mrk. 3:20-30; Luk. 11:14-23)
22Tunaka nu dangàndi-nya i Yehu na haàtu tau poki dàngu kambiu nadu ba huruku-nanya wàndi akatu. I Yehu na-pamàlaru-ya na tau nuna hi lupa napingu papanii dàngu pangita. 23Na-hangàtaru hàla na tau hi dapanii, “Talànga wanguna Nyuna ni Anana i Ndautu-ya ihu na pambàda ràndi?” wàda.
24Nu da tau Parihi ba darongu-ka, hema-danyaka, “Na tau nina hi napeku pawàngga wàndi akatu, nadu i Mbeluhembulu, na kapala wàndi akatu, na mawua-nya kuaha tungu nu Nyuna,” wàda.
25I Yehu napinya na pa-kanandi-da nuda da tau Parihi. Jia-duyaka hi napanii-nja, “Na hau nanggara jàka napai - ihangu la kaliba - kalibaru na ma-pamuhungu, na nanggara nuna nda na-padaingu-a. Dàngu na hau paraingu jàka ndia na kuru uma napai - ihangu dàngu na ma-pamuhungu dàngga anguda taweharu-nanyaka duna. 26Tuna numbu la pareta-na i Kambàliku; na hau kalibaru jàka nawàngga-ya na kalibaru hau, ka taweharu-nanyaka na pareta-na dàngu napa tanàhaku-nanyaka. 27Na paniimi nyimi, Nyungga ba kuwàngga wàndi akatu wànggu-nya na mbihana i Mbeluhembulu. Jàka tuna nu nggamu mbiha-naka na pawàda da makiku-nggai ba dawàngga wàndi akatu. Da makiku-nggai nyuda-ma-aka da ma-wuangu mbuti ba njala-minya nyimi! 28Nyungga duku ba kuwàngga wàndi akatu wànggunya na mbihana na Ngahuna i Ala. Nu tandana ba pa-kiringu-nanyaka pa-pareta i Ala la hongami nyimi.
29Nggiki tama-naka na tau la umana na tau kapàru la paramba-nja da bandana, jàka ndedi-madu nahondu mangilu-ya nuna na tau kapàru? Hàlaka nu, hi namangu paramba-nja da bandana.
30Na tau na manda angungga Nyungga, papa-nangga Nyungga-duka. Dàngu na tau na manda pambapa-dàngga Nyungga na ma-langatàka paruha-nanya na paràma-du-ngguka! 31Jia-duya nu, kaipinya, era tuna manjala na tau ka na-paakangu,#na-paakangu: jàka ndia: na-paaka-nya i Miri Ala. peku-napa la pajàma-nya! Tàka jàka na-paaka-nya na Ngahuna i Ala, nyuna nda peku-anapa la pajàma-nya! 32Era pekana hangia na tau mapapa-nya na Ana Tau, nyuna peku-napa la pajàma-nya, tàka jàka na-paaka-nya na Ngahuna i Ala, nda peku-ana la pajàma-nya, ka la rehi nàhukai hamanai la rehi hupu njàpuna,” wàna.
Na pingi ai dàngu na wuana
(Luk. 6:43-45)
33“Ka ngalangu wua mahàmu, na-kamboka bàdi na pingina. Jàka nda na-kamboka na pingina, nda nahàmu-mbu na wuana. Na kamboka-na na nda kamboka-na na pingi ai tapi weli wuanya. 34Nyimi tau akatu-kai, nggiki pingu-mika papeka-ya na mahàmu jàka mi-akatu-madu? Nggàraya na maluhu welingu la ngaru mbumbaru-mana-nyaka welingu la eti! 35Na tau hàmu natiki-ya na maha - hàmuma duna maa ba mbinu-mananya mahàmu. Na panjàngangu-na, na tau ma-akatu natiki-ya na maa - akatu-ma duna maa ba mbinu-mananya ma-akatu.
36Jia ba tuna, namuya: la Lodu Hupu njàpuna, nimbihu-na na tau tanggu-mananya la pahema-ya nimbihu-na na patiki-na na manda lingu. 37Nadu ba jiaha da kareuku wiki-mamu dumu da pawàngu ba botaya jàka njala-munya jàka ndia,” wàna.
Da tau Parihi dakarai-ya i Miri Yehu ka na-patumbu tanda pa-hangàtarungu
(Mrk. 8:11-12; Luk. 11:29-32)
38Tunaka nu ba mapira-ha da ngguru anggama dàngu tau Parihi dapanii, “Màla Umbu Ngguru, ma-rinjungu làti pa-itangu kau patumbu tanda pa-hangàtarungu,” wàda.
39“Kanjupu ma-akatu-ya dàngu maka-tadaku-ya na tau nàhu,” wàna i Yehu. “Nyimi mikarai-ka patu tanda pahangàtarungu? Nyiminda pawua-anggai ana hau mbu tanda pa-hangàtarungu, hinggilu-na na pa-hangàtarungu rukuna i Wunangu Yunuhu. 40I Yunuhu tailu mbua lodu tailu mbua ruduna daa la kambu iya bokulu. Tuna numbu napa na Ana Tau ba hanina tailu mbua lodu tailu mbua rudungu la kambu tana. 41La Lodu Hupu njàpuna, da tau da ma-mandapu la Naniwa napa dahada kariangu da tau da maninja nàhu, hi da-panjala-ha. Nadu da tau Naniwa ba da-panjilungu duda welingu la njalada, ba jiaya na-pabobarungu-na i Yunuhu lai nyuda. Tàka lai yiahu nàhu ninya na marihi bokulu welingu lai Yunuhu! 42La Lodu Hupu njàpuna, napa na maràmba kawini welingu la tana mbara luru dahada kariangu da tau la rehi nàhu, hi da-panjala-ha. Nadu keha ka ronguya na papekangu-na i Halomu na ma-manggàna, nuna na maràmba kawini na-hadangu hi na-lakungu ngarangia madira matiki marauna welingu la hupu tana. Tàka lai yiahu nàhu ninya na marihi bokulu welingu lai Halomu!” wàna.
Nabeli njàngana na wàndi akatu
(Luk. 11:24-26)
43“Era dunjaku-nanya wàndi akatu na haàtu na tau, njadangu-nanyaka na wàndi lai nu - lai nu ba nahimbu pangia mamàdu ngia pa-pànjangu-na, tàka nda na-hunggungu. 44Jia-duyaka hi napanii, ‘Napa ka kuhili beli la uma na pambàda dunjaku-nggu,’ wàna. Natàka-ka lai nu, hi uma jua bia-yaka, naili dàngu na-lànyapu. 45Hi nalua dàngu na-kariangu-mbu anguna ba mapihu-ha da wàndi hawiangu da marihi akatu welingu lai nyuna. Tunaka nu tama-danyaka lai nu la tau, hi da-engangu lai nu. La hupu njàpuna na ngerana na tau nuna manaü iraku-naka welingu la wungana. Tuna nu-mbuduka napa na ngerana na tau akatu la rehi nàhu,” wàna.
Na ina dàngu da angu dedina i Miri Yehu
(Mrk. 3:31-35; Luk. 8:19-21)
46Ba dàngu panii bia-napa i Yehu dàngu na tau dangu, tàka-danyaka na inana dàngu da angu dedina. Ndolaku-danya lua la hambeli, da-pamukarungu patama tomaya ka panii dànya wàda. 47Ninya na haàtu welingu la honga tau dangu napanii-nya i Yehu, “Ha umbu, na inamu dàngu da angu dedimu ninja lua la hambeli. Ka mapanii dànya Nyuna, wàdanggau,” wàna.#La lawiti ndai da manda pirada nda nianya na ndalaru 47.
48Nahema i Yehu, “Nggamuya na inanggu? Nggamuha da angu dedinggu?” wàna. 49Na-patuji-ha da makiku-nya hi napanii, “Yiada-ha duku da inanggu da angu dedinggu. 50Na tau na mawànya na pambuha-na na Amanggu la awangu, jiaya duku na angunggu paluhu, na anawini-nggu dàngu na inanggu,” wàna.
Currently Selected:
MATIU 12: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
