MATIU 11
11
Da papalewa-na i Yuhani Pa-runungu
(Luk. 7:18-35)
1Ba na-hàlaka i Yehu papeka-nja ngerangu da tau hakambulu madua makiku-nya, dunjaku-nanyaka lai nu. Hi nalaku pa-ajaru dàngu pa-bobaru-ya na lii languna i Ala la parai - paraingu malihi-nya lai nu.
2I Yuhani Pa-runungu ba la uma kapàtangu-ya narongu-yaka na ruku paràma-na i Karitu. Hi na-paràha-nja ba mapira-ha da makiku-nya palua lai Yehu pa-paàra-nya, 3“Jiakau-ka Nyumu umbu pa-patiangu tundunya na paràndi-na i Ala, jàka ndia hi ma-patiangu-maipa bàdi haàtu?” wàdanya.
4Nahema i Yehu, “Beliwa lai Yuhani kai pekanya jàka nggàra parongu-mi dàngu pangita-mi: 5Na mapoki nangita-ka, na ma-kaliparu napangga-ka, na mahidu manula pa-mayitangu#mahidu manula pa-mayitangu: Tàngaru-ya la 8:2. nalànga-ka; na ma-kawanga narongu-ka, na mameti naluri belika, dàngu na Lii Mànangu welingu lai Ala pa-bobaru-yaka la tau mila. 6Oha-anaka na tau na manda ningu latangu la pa-jukaru-ngga Nyungga!” wànanja.
7Ba dalaku-ka da papalewa-na i Yuhani, pa-kiringu-nanyaka i Yehu papanii-nya na tau dangu rukuna i Yuhani, “Nyimi bai lua la maràda telangu nggàra paita-mi? Hawàla rumba paruru ngiluya? 8Nu bai lua nggàra paita wàmi? Tau mapaki paki manandangu-ya? Da tau da mapaki tungu nu la uma hanganji-ha duda! 9Ka nggikina nyimi hi milua la maràda telangu? La paita-ya na haàtu na wunangu? Tubana, jiapa narihi-pa welingu la haàtu wunangu! 10Nadu ba jiaya i Yuhani nuna-duka na palana daa la Huratu Matua,
‘Yiana-ya na papalewa-nggu, wàna i Ala,
ku-paràha-nya la pa-mangilu-nggau Nyumu,
ka peku pa-kalongga-nanggau àndamu,’ wàna.
11Namuya! La pinu tana yiana ndedi handàkangu paningu tau marihi bokulu welingu lai Yuhani Parunungu. Na nyuna ba tuna, na tau na marihi màrahu la honga banjaru-na i Ala narihi bokulu-pa welingu lai Yuhani. 12Piti welingu ba na-bobaru-ya i Yuhani na lii languna lundu la rehi nàhu, na banjaru-na i Ala na-ndubaku-ya paraï tau ma-patikingu pa-kuaha wànya ma-mbàringu. 13Lundu la tàkana i Yuhani, mbuu ndàbana na ukuna i Muha dàngu na lii pa-ajaru-da da wunangu danyura hahaya na manda màtangu patumbu napa. 14Dàngu jàka mi-mbuhangu-du pawaiya, i Yuhani jiaya i Elia-maka, na tàkana pambàda nyura-mayaka. 15Na maningu kahilungu, ka narongu!
16Nggàra wànguka bàdi pa-pamenja wànggunya na tau la manggawa rehi nàhu? Nyuda hamada da anakeda da ma-uhuku la pahangu. Da hau pauhi dawara-nja da pauhi hau, 17‘Nyuma mawunda-nggai ludu hawola, tàka nyimi ndai bihu parenja! Mawunda-nggai ludu hawina, tàka ndai bihu pahii!’ wàda. 18Natàka i Yuhani – na-puaha dàngu nda na-unungu angguru; tàka napulu-nya tau, ‘Huruku-nanya wàndi kambàliku,’ wàda. 19Nàhu namai na Ana Tau, – nangangu na-ngunungu; tàka napulu-nya tau! ‘Tàngaru-ya na tau nuna! Na-manganga eti, na maüku, angu ma-pahurungu hilu katiku dàngu angu tau njala,’ wàda. Na nyuna na manggàna-na i Ala paita mata-yaka la paraï paruku-na,” wàna.
Da paraingu da manda pawai
(Luk. 10:13-15)
20Hàla pa-kiringu-nanyaka pa-panjala-ha da paraingu da ngia pa-patumbu padana tanda pa-hangàtarungu. Nadu da tau la paraingu nuda ba nda da-panjilungu welingu la njalada. 21“Hanggàmaru-munyaka ha Korahimu! Dàngu hanggàmaru-mbumu-nyaka ha Mbetuhaida! Làti ka tungu-ka-awa da tanda pa-hangàtarungu da pa-patumbu lai nyimi, ka patumbu-ha la Tiruhu dàngu la Hindungu, làti mbàda pa-njilungu ndai-daka welingu la njalada hi dapaki hinggi karungu ba da-hawina dàngu ba datungu aü la katiku-da. 22Namuya, la Lodu Hupu njàpuna, da tau Tiruhu dàngu Hindungu napa namuda ningupa ba najàma-nja paraïna i Ala welingu lai nyimi! 23Tàka nyumu ha Kapinaumu! Màla pa-pajangga-makauka nyumu lundu tàka la awangu? Ndia-a! Manaü-naka nyumu ba patàda-nggau la naraka! Nadu làti da tanda pa-hangàtarungu pa-patumbu lai nyumu ka patumbu niha la Hondumu, nuna la Hondumu ni bia-nyapa làti lundu nàhu! 24Namuya, la Lodu Hupu njàpuna, na tau Hondumu napa namuda ningupa la pajàma-nya paraïna i Ala welingu lai nyumu!” wàna.
Maiwa lai Nyungga
(Luk. 10:21-22)
25La rehi nu i Yehu na-hamayangu, “Ama, Miri maawa-nya na awangu, matana-nya na tana! Ku-pamalangu-nggau nadu Nyumu bau kàpinya nuna mbuu ndàbana la tau màhi dàngu la mapingu, tàka hi mu-wàlahu-ya nuna la tau panda ajaru. 26Nuna jiaya na pahàmu wàna na etimu Ama,” wàna.
27Hàla panii-nanyaka i Yehu, “Mbuu ndàba-naka mbàda pakata-nangga-haka Nyungga paraïna i Ama. Nda ningua haàtu matanda-ya i Ana, mbulungu i Ama. Dàngu nda ningumbu haàtu matanda-ya i Ama mbulungu i Ana, dàngu jàka nggamuya na tauka ka natanda-ya i Ama ba wàna i Ana.
28Maiwa lai Nyungga nyimi mbuu ndàbami manjili, dàngu ma-pàdangu mambotu ngàndina; Nyungga napa ma-pahayandalu-kai. 29Tundunja da pareta-nggu dàngu papekangu-wa lai Nyungga. Nadu Nyungga yia ba ku-mandangu malijangu dàngu ba ku-karàda etinggu, napa nyimi mi-hayandalu. 30Nadu da pareta-nggu ba pahàmu eti wànguha, dàngu da ngàndi pa-pabuku-nggunggai da-halela-a,” wàna.
Currently Selected:
MATIU 11: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
