MATIU 10
10
Da hakambulu madua pa-pahurungu
(Mrk. 3:13-19; Luk. 6:12-16)
1La hau na lodu i Yehu napaau-nja pa-pauhi da tau hakambulu madua da makiku-nya. Hi nawua-nja kuaha la pawàngga-ha da wàndi akatu dàngu la pa-pamàlaru mahidu hangia - hangia hamanai na maningu nyurangu la tàda ihina. 2Da tamuda nuda da pa-pahurungu jiaha: na ma-wungangu i Himungu (i Peturu ba wàda-mbunya) dàngu na angu dedina i Andaria, hàla i Yakombu dàngu na angu dedina i Yuhani, nu da anana i Hambandiu. 3Hàlai-ka i Pilipu dàngu i Mbàratolumiu, lupa i Tomahu, dàngu i Matiu, na ma-pahurungu hilu katiku lupa i Yakombu anana i Àlapiu, dàngu i Tandiu, 4hi mangupa i Himungu, nu i Ma-kaborangu dàngu i Yundahu Ihikariu na ma-kaleka-nya i Yehu.
Na wai ngera pa-pahurungu
(Mrk. 6:7-13; Luk. 9:1-6)
5Tunaka nu da tau hakambulu madua pa-pahurungu paràha-nanjaka paraïna i Yehu, hi na-paita-nja yiada da ngerangu, “Àmbi luadu la pangia nda tau Yahundi. Màtangu-mbu la parai - paraingu tau Hamaria. 6Tàka luawa la tau Ihirailu, pa-ihikungu-na lai nyuda da ma-njàrangu. 7Pekanja nyuda, i Ala ba rengga pareta-nanyaka ba Hanganji-ya. 8Pamàlaru-ya na tau hidu, paluri-ya na tau meti; palànga-ya na tau na mahidu manula pa-mayitangu, dàngu wànggaha da wàndi akatu. Nyimi bai ngala ndàbanja nuda ngala juangu-minya. Jia ba tuna màtawa kai wua juangu-mbu. 9Àmbi ngàndidu àmahu marara, mabara dàngu wudu. 10Àmbi ngàndidu lipitu hunggu, jàka ndia kadua mbàlangu paki nàhu la lakumi, jàka ndia halapa, dàngu tokungu. Nadu na maràma, ba payema-manya bàdi nduma lurina.
11Jàka mitàka la paraingu jàka ndia la kotaku, himbuma haàtu ma-mbuhangu painga-kai. Pa-engangu-ma lai nyuna ka lundu mihilu laku. 12Nu bai tama la uma, ‘Màta àru i Miri ka na-pakanyuru-nggai,’ wàmi pàku. 13Nu da tau la uma lai nu jàka dainga-kai, màtawa ka na-pakanyuru-nggai ba wàminja, ka na-paengangu lai nyuda. Tàka jàka nda dainga-kai, màtawa ka nabeli-ya lai nyimi. 14Jàka ningu uma jàka ndia paraingu na manda bihu painga-kai jàka ndia na manda bihu pa-patingi-nggai, dunjaku-nya lai nu dàngu kàmbahu-ha da aü la tàbalu wihimi. 15Namuya! La Lodu Hupu njàpuna, da tau la paraingu Hondumu dàngu Nggomora napa namuda ningupa pajàma-nja paraïna i Ala welingu da tau la paraingu nuna!” wàna.
Na pa-mayila wàngu na manàmu-nya
(Mrk. 13:9-13; Luk. 21:12-17)
16“Eti-manya yiana: Ku-pahuru-nggai nyimi hama tuna na mbimbi manda pingu pa-rimangu la honga ahu rumba bohu. Màta nyimi kai rimangu hama tuna ularu dàngu kai tuturu hama tuna kulundiha. 17Mangga rimangu, nadu napa nyimi payàpa-kai hi ngàndikai la hangga batangu. Napa da-pamayila-kai la uma bunggu - uma bungguru. 18Napa dangàndi-kai la hangga ma-kuaha dàngu ma-hanganji rukuna ba ma-kikungu lai Nyunggakai. Tàka nu rehi manggawangu mahàmu-mayaka bai hakahii-ngga Nyungga lai nyuda dàngu la ta - tauka na manda tandaya i Ala. 19Tàka jàka dangàndi-kai patimba-nggai ngerami, àmbi handuka-dunya jàka nggàraka bàdi papeka-mi, dàngu jàka nggikina wàmika bàdi bai panii. Nadu jàka nggàraya bàdi na papeka-mi, napa pa-pekangu-makai la rehina. 20Nadu na mapanii nu la rehina nda nyimi-apa, tàka na Ngahuna i Ama la awangu duna, la ngarumi nyimi.
21Napa ngeru ningu tau mawua-ya na angu dedi wikina la pa-pameti-ya. Dàngu jia-mayai na matuna nu na ama dàngu da anana. Da ana napa da-rawaku-ha da ina amada, dàngu hi dawua-ha ka pameti-ha. 22Nyimi napa na-paumbi-nggai tau mbuu ndàbana, rukuna ba ma-kikungu lai Nyungga-kai. Tàka na tau na ma-patorungu lundu njàpuna, jia-yaka na ma-mànangu. 23Jàka na-pamayila-kai la hau paraingu, palaiwa la paraingu ndàkina. Ka kupeka-nggai: Jàka ndedi mi-hàlatu ndàbaha da paraingu la Ihirailu, tàka-nanyaka na Ana Tau.
24Na pa-ajaru nda narihi-anya pa-bokulu na ngguruna, dàngu na ma-paloku nda nahipu-aya pa-bokulu na mirina. 25Toma-mana-nyaka na pa-ajaru ka nahama-nya na ngguruna, dàngu na ma-paloku ka nahama-nya na mirina. Na ama bokulu la kuru uma, jàka Mbeluhembulu-madu-yaka ba tunya tamuna, ka rihi-amaka na ihi umana. Napa nyuda patungu tamu marihi nda hàmuha!” wàna.
Mangàdatu-nya i Ala
(Luk. 12:2-7)
26“Àmbi mangàdatu-nya na hama taumi. Nda ningua ma-kawiningu na manda wuwa napa, dàngu nda ningua pa-kàpingu na panda lunggaru napa. 27Nggàraya na papanii-nggu lai nyimi la kapàtangu, beli-manya bàdi la harii lodu. Dàngu jàka nggàraya na pa-kangurukungu la kahilu, bobaru pakada-nya hàbaru pakani-nya! 28Àmbi mangàdatu-dunja nyuda da ma-pameti-ya na taumi, tàka nda na-kuaha-a pa-pameti-ya na hamangu-mi. Mangàdatu-nyawa i Ala na ma-kuaha pa-patàlaru-ya na taumi hamanai na hamangumi. 29Da dua ngiu manginu peku pakei wànja hau ndui ma-màrahu halawàla. Jiapa ka tuna nu nda heua ma-kanabu la tana, jàka nda nawuku-ya paraïna Amami. 30Nggubulu-na na lunggi la katiku-mu mbàda padiha ndàba-yaka. 31Jiaya nu, àmbi mangàdatu! Nyimi mirihi pa-bilangu-pa welingu nuda da manginu!” wàna.
Pekaya i Miri Yehu la mbabu tau
(Luk. 12:8-9)
32“Nggamuya na mapeka la mbabu tau nyuna ba ma-kikungu lai Nyunggaya, Nyunggai duku kupeka-mayai duna la hanggana na Amanggu la awangu. 33Tàka jàka nggamuya na ma-pahiningu la mbabu tau nyuna ba ma-kikungu lai Nyunggaya, nyunggambu napa ku-pahini-nya la hanggana na Amanggu la awangu,” wàna.
Nda papeku-aya tàka pa-ndubakungu-ya
(Luk. 12:51-53, 14:26-27)
34“Àmbi kaka-duya Nyungga yia ba ngàndi-nggunya papeku wàngu la pinu tana yiana. Nyungga nda ngàndi-nggunya papeku-a, tàka pa-ndubaku-ya. 35Na mainggu Nyungga jiaya la pa-pawiti-nya na anakeda mini ka na-ndubaku-ya na amana, na anakeda kawini ka na-ndubaku-ya na inana, tàka na rii ana ka na-ndubaku-ya na ina yenuna. 36Langatàka, na muhu bokulu, jia-mayaka na angu kuru uma wiki.
37Na tau na ma-mbuhangu amana jàka ndia inana rihi welingu lai Nyungga nda ràka jia-aya na makiku-ngga Nyungga. Tumbuna na tau na mambuha-nya na anana mini jàka ndia anana kawini rihi welingu lai Nyungga. 38Dàngu na tau na manda bihu paduku-ya na harika-na ka namangu pakiku-ngga Nyungga nda ràka jia-mbuya na makiku-ngga Nyungga. 39Na tau na ma-pamàndu-nya na lurina, napa na-mbulangu na lurina, tàka na ma-mbulangu lurina ruku tuturu-na lai Nyungga, napa nahunggu-ya na lurina,” wàna.
Na wunda limbana na pawunda mahàmu
(Mrk. 9:41)
40“Na tau na mainga-kai nyimi, inga-nangga Nyungga-maka. Tàka na tau na mainga-ka Nyungga, inga-nanya Nyuna-maka na ma-palewa-ka Nyungga. 41Na tau na mainga wunangu rukuna ba wunangu-ya, napa na-ngalangu wunda haàtu wunangu. Dàngu nggamu mainga-ya na haàtu na tau hàmu rukuna ba tau hàmuya, napa na-ngalangu wunda haàtu tau hàmu. 42Nggamu na ma-wuangu wai pa-unungu, jiapa ka wai maringu-aya la haàtu welingu yiada da tau da marihi ngia wawa, rukuna ba tau ma-kikungu lai Nyunggaha, langatàka ka kupeka-nggai jiangu-ma na-ngalangu wundana,” wàna.
Currently Selected:
MATIU 10: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
