PADUDURUNGU 4
4
Na mayila-na na Yeruhali ba nambera-ka
1Na àmahu rara ma-kajilaku na-làmangu-ka
da watu Uma Ala da-tanyalangu la ànda.
2Àmangu da bidi tau la paraingu Hiungu hama tuna àmahu rara ma-pawilingu-ha,
tàka nàhu hama wuru tana ma-ahaka ba iluha.
3Jiapa-kingu da bai ahu rumba da-pahuhu-kadu anada,
tàka pàku na banjaru-nggu kanjupu mbana etiya hama tuna kalauki la omangu-ha.
4Da ana rara nda pa-pahuhu-aha, hi dameti kandànga.
Dakarai pangangu da anakeda, tàka nda ningua mawua-nja.
5Da tau da makàli ngangu pangangu mahàmu,
dàngu da maluri mbokaru,
nàhu dabei pahimbu pangangu la pabundu kangudu,
dàngu dameti rimbangu la a - àndaka.
6Pa-hukungu-yaka na banjaru-nggu
narihi mbotupa welingu la ma-mandapu-nya na Hondumu
na mamija la ha-kambàdiku wua mata-a
paraï ruku limana i Ala ba dàngu nda ruku lima tau.
7Àmangu da liku uruma da-yarahu
hama kamba mabara burahu-ha.
Nyuda da-kapingatu daparii,
da halimu hayàla dàngu da hayandalu.
8Tàka nàhu da matada darihi mitingu welingu la kalatu epi palita#kalatu epi palita: tàngaru-ya la kalokatu hilu.
da-tawàlahu la a - ànda ba dàngu nda ningu ma-ngalangu patanda-ha.
Da karukutu la riida da manula-da,
hama tuna ai màdu kahàngu.
9Nyuda da-mayila dàngu dangeri meti kangilangu,
ba nda ningu ndokuma pangangu;
da mameti la pabera,
darihi utupa welingu la mameti rimbangu.
10Kanjupu hawiru-ya nuna na tàparu
manggàna-ya na banjaru-nggu
jiapa-ki da inada da mamàja eti
da mahangu kukuda da-manahu-kadu ana wikida nduma ihina na kambuda.
11I MIRI na-hanubuku-nya na hànggana
hi natunu-ya na paraingu Hiungu lundu naràpu la tana.
12La honga maràmba - maràmba dàngu ma-mandapu-nya na pinu tana
nda haàtu-a mawaiya
ba peku tama-nanja muhu
da pindu bokulu-na na paraingu Yeruhali.
13Tàka nuna, mbàda njadi-naka,
ruku njalada da ratu dàngu da wunangu.
Nyuda mbàda bungu-daka wai ria,
da wai ria tau manda njala.
14Hama tuna tau mapoki ma-lindingu la a - ànda
tuda numbu da liku uru la paraingu Yeruhali.
Da-marihaku la wai ria da pakida
hi lupa nda ningu ma-mbuhangu pa-jonggaru-ha.
15“Yilangu-kai welingu lai yiahu!
Bai iraku nyimi, àmbi ràma kàma nyuma!” wàdanja tau.
Ka laku lindingu-danyaka welingu la hau banjaru la hili hau banjaru,
tàka nda ningu ndokua ma-pahia-nja pa-engangu.
16I MIRI nda na-hamata-ayapa na banjaru-na;
Nyuna wikima ma-paiha-nggangganja nyuda
dàngu ma-pawiti-nja hi nda pa-pawili-nja da ratu;
nda ningu-apa mamila-nja eti da liku uru.
17Danjili-ka da wua matama paraï pakuki,
ba nedingu pa-ndulangu mànda tàka ndoku.
Ma-monungu pa-ndulangu welingu la hau banjaru,
manda ana nggàra ndoku làti pawua-na.
18Nda peku luhu-ama la ànda,
nadu ba naingu kuki-nanggama muhu.
Mareni-nanyaka na hupu njàpu lurima,
nadu ba toma-naka la diha da lodu lurima.
19Da makeha-nggama kanjupu renggaha
darihi renggapa welingu la mbaku.
Dakeha-nggama la palindi,
dàngu hi da-pandapu-nggama la maràda telangu.
20Dayàpa-ya na hanganji paleha-na i MIRI,
na tau na-pahamela wàma na mawua-nggama luri,
dàngu na ma-opangu ba hangganya na muhu.
21Ha dimi banjaru Endumu dàngu Uhu, màla miriki-wa,
hawola-wa, ba peku-inapa!
Napa natàka-mbu na tàparu lai nyimi
dàngu ruku maüku-mu napa upa-kalulu wikimu.
22Na Hiungu mbàda pahàra-nanyaka na-hukungu-na
rukuda da njala pawunda-na;
nàhu nda namàta-a-nggamapa i MIRI
dàngu nda nangàndi-a-kamapa la tanawangu.
Tàka nyumu dumu, ha Endumu, napa nahuku-nggau i MIRI.
Napa pa-lunggaru-ha da njalamu.
Currently Selected:
PADUDURUNGU 4: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
