PADUDURUNGU 3
3
Na hukungu, na panjilungu, na monungu
1Nyungga-maka tau mambàda pàdangu mayila,
rukuna ba nanggàna-ka hànggana i Ala.
2Hama huka marauna ba na-ruruhu-ka
la pangia ma-kapàta wuru yila.
3Na-nutaku papalu-ka,
weli mbaru lundu malingu ba dàngu nda pa-aïngu-na.
4Na-pamanua mandàka-nya na ihinggu, dàngu da mbata da riinggu.
5Na-panggàbalu-ngga wàngu handuka dàngu mayila.
6Nahàni-ka pa-ngiangu la kapàtangu
hama tuna tau mameti la rehi na ma-làpahu.
7Na-jàritu-ka la tangga kihungu,
hi nda ningu-apa monungu-nggu duku la pamara.
8Kuwara pakarai pa-ndulangu,
tàka nda nabihu-a i Ala patingi-ka.
9Napabe - betanya na àndanggu
wàngu kilimbatu - kilimbatu.
10Hama tuna mbaruangu ba na-patiangu,
hama tuna hinga ba na-pandapu-ngga.
11Na-kehangga lundu ku-hiliru welingu la ànda,
tàka hi nahi - hiraka dàngu hi na-dunjaku-ngga.
12Na-pandàngi-ya na tandai panana,
hi na-panjadi-ka ngia pa-katutu wua panana.
13Na wua panana nalumbu làpahu-nya na ihinggu
hi lupa natanju-nya na puhunggu.
14Weli mbaru lundu malingu jiaka pariki wàngu,
hi jiaka nyungga-maaka pa-paakangu wàngu.
15Mbulungu ma-paitama-a pawua-nangga nyungga
pangangu dàngu pa-ngunungu-nggu.
16Na matanggu na-ruduhu-nya la tana,
da ngàndunggu na-patoka-nja la watu lundu dambata.
17Mbàda mandai-maka ba nda kupinya na pa-mambiru wàngu;
mbàda maromba-nggunyaka jàka nggikina duna na pa-ohangu.
18Nda na-kawulangu-apa na tamunggu,
namauka na monungu-nggu lai MIRI.
19Ba pangàda-nya na-lindingu-nggu dàngu na ura dedinggu
beri nganguya pameti wàngu mapaita.
20Naingu pangàda-nggunya nuna,
hi na-njenjangu na etinggu.
21Jiapa-kai ba tuna na-miripu beli na etinggu,
ba ku-pangàda-nya yiana:
22Na mbuhangu-na i MIRI nda na-kambotahu,
na pa-namungu-na nda ningu njàpuna,
23ba nabidi mànu nimbihu mbaru,
langatàka, kanjupu tuturu-ya i MIRI!
24I MIRI didiya Nyunama-a na mangunggu.
Jia ba tuna, Nyunaka na pamonu-nggu.
Na monungu nduma Ihirailu
25I MIRI nahàmu la tau mamonu-nya Nyuna,
dàngu la tau mahimbu-ya Nyuna.
26Ba tuna nedi mandangu bia
lundu namai pa-pandulangu i MIRI;
27jia ba tuna, nahàmu-ma jàka papekangu pa-patorungu
la rehi bidi tau-ipa.
28Ba talànga wuangu-na mayila i MIRI,
ta-mandapu meha dàngu ta-kandii màka bàdi.
29Màtawa ta-pawawangu wiki, dàngu ta-pajàmangu wikinda,
nadu talànga wanguna ningu-ipa pa-monungu.
30Jiapa ka tàbata dàngu ka payudi-ta,
ta-kataku ndàba-mahaka bàdi.
31Nadu, nda jia lundu nu - nua ba na-jukaru-nda i MIRI.
32Ba nahàla-ka pa-wuangu pa-mayila wàngu
namila-mbunda eti,
nadu ba pa-daingu namu-mananda
wàngu pa-namungu manda ningu dirana.
33Nda wàngu weli eti-ana
ba namàta-nda pa-mayila dàngu pa-hawina.
34Jàka na-ngejaru na hamangu-nda la tanawangu,
35jàka na-pahàlangu na ngabanda na pawua-na i MIRI,
36rukuna ba kabeli puhaya na pa-deningu,
jiangu-ma ba napinya i MIRI hi na-hamata-ya.
37Jàka nda nawuku-ya na hangia paraïna i MIRI,
jiangu-ma ba nda jia nggàra-a pawunda-na na tau ndumana nuna.
38Na mahàmu dàngu na manda hàmu
pa-pahàrangu-ya mbulungu la hupu liina i MIRI.
39Ka nggikina na tau hi na-pangodungu
jàka hukunya rukuda da njalana?#Ka nggikina ... da njalana? jàka ndia: Jàka naluri-madupa na tau, ka nggikina hi na-pangodungu jàka hukunya rukuda da njalana?
40-41Nahàmu kipa jàka ta-manginjiru-ya na lurinda,
dàngu ka ta-putiru pa-mbelingu lai MIRI la awangu.
Màlawa ka ta-wàlahu etinda dàngu ta-hamayangu,
42“Manjala dàngu ma-patula-ngganggangu lai Nyumu, ou MIRI,
dàngu ndau wuangu-a jàmangu njala.
43Ukeha-nggama dàngu hiu pameti-kama,
na mila etimu na-paunungu la hànggamu.
44Na hànggamu hama tuna karumangu ma-kanjupu timbiya
hi nda peku lumbu làpahu-nanya paraï da hamayangu-ma.
45Upadedi-kama hama tuna kangudu
la mbara mata la nggubulu pinu tana.
46Da pawawa-kama dàngu dariki-nggama paraï muhu-maka;
47nanggàna-kama hanggàmaru dàngu pamija wàngu,
hi na-kadeki-kama ma-njurangu dàngu mangàdatu.
48Da-lulungu da wai matanggu hama tuna luku
rukuna ba mbàda mijana na banjaru-nggu.
49Napa nda ku-pànjangu-a pahii,
50lundu mu-hamata-kama ou MIRI la awangu.
51Na-hawina na etinggu
ba itaha da kawini la paraingu-ma.
52Hama tuna ma-hawurungu, ba nakeha-ngga muhu
na ma-karaü-ngga eti dàngu nda pa-latangu.
53Dapuha kaluri-ngga la humuru màdu
hi da-pabundu-ngga watu.
54Na-lumburu-ngga wai lundu la katiku-nggu,
‘Njàpu-nanyaka na luringgu!’ – hi wànggu la eti.
55Ou MIRI, kuwara-nggau Nyumu,
weli dalungu la humuru manjolungu.
56-57Ku-kamahi pambana-nggau àmbu jia bitanya kahilu-mu
na pakarai-nggu kau ndulaka.
Tàka hiu tingiya na hamayangu-nggu, dàngu hiu mai palihi-ngga;
‘Àmbu mangàdatu-du,’ hi wàmungga.
58Umai la palumu-nya na palakara-nggu ou MIRI,
mbàda pamara-munyaka na luringgu.
59-60Uitaya na akatu pawunda hanggangu lai nyungga,
na pawuku akatu muhu ma-karaü-ngga eti.
Ba tuna ou MIRI, pulu angu-nggawa la palakara-nggu.
61Nyumu, MIRI, murongu wikiya ba pawawa-ka;
mupi hàlanya na pawuku-da nyuda.
62Da-kanjupu-ya na lodu ba dapanii-ya na tamunggu.
Ka ta pa-hanggàmuru-ya
nyuna ba wàda, da-pandoi pawuku iraku-da.
63Weli mbaru lundu rudungu,
jiama-aka nyungga pariki wàngu.
64Huku-njawa nyuda nunjuya na pawunda-da, ou MIRI.
65Ràtu-njawa dàngu màta-njawa ka da-padaingu la mbota monungu.
66Kehanja dàngu patàlaru-hawa nyuda mbuu ndàbada
lundu damànji ndàba welingu la pinu tana,” wànggu.
Currently Selected:
PADUDURUNGU 3: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
