YERIMIA 38
38
I Yerimia daa la humuru màdu
1-3I MIRI na-palewa-ka pa-patàka-nya yiana na lii pa-patàkangu la rayatu, “Na paraingu yiana napa kuwua-ya la tanatara Mbambilu, napa nyuda da-panyàku-ya. Jàka nggamuya na maninya daa la paraingu, napa nameti la pabera, jàka ndia paraï pa-rimbangu jàka ndia panyaki pa-nggàbalungu. Tàka jàka nggamuya na maluhu na ma-pajàmangu wikina la tau Mbambilu, napa nda pa-pameti-aya; napa namara na lurina,” wàna. I Hapaha anana i Matàngu, i Nggadalia anana i Pàhuru, i Yukàlu anana i Helimia, dàngu i Pàhuru anana i Malakia darongu hàla-maya nuna na papanii-nggu.
4Ka lua-danyaka ba hapajia-ha da mapawai ngaba nuda la hanganji hi dapanii, “Na tau nina huku pameti-ya bàdi. Nadu, ba nawàngu papanii tuna nu pa-lamanga-nanja da ringgitu-da da panjuri mbuu ndàbada dàngu na tau hawiangu da maniki-njapa la paraingu yiana. Nyuna nda ndula-ananya na rayatu, tàka pa-hanggàmaru-nanja,” wàda.
5Nahema na Hanganji Hendikia, “Hàmudu, wunda biaya nu na pawuku-mi, nyungga nda ku-pabeta-anggai,” wàna. 6Ka piti-danggaka hi da-duluru wàngga kalorungu hu daa la humuru manguna i umbu Malakia na ana maràmba, na maninya lua la talora uma hanganji. Nda ningu wai daa la humuru, kapihaku-aya, ka tambohuku-nggunyaka daa la kapihaku.
7La rehi nuna ninya na haàtu na tau Hundangu na maràma la umana na hanganji. Embitu-Meliku-ya na tamuna. Narongu-ka ba da-puhaka-ka daa la humuru. Ba talànga kapipi-na batangu la Pindu Bokulu Mbanyamingu na hanganji, 8ka lua-nanyaka i Embitu-Meliku lai nu hi napanii la hanganji, 9“Tamu Umbu ma-mangarangu, nda dahàmu pawunda-da da tau nuda, dapuhi-yaka hu daa la humuru na Wunangu Yerimia; jiangu-maka duna napa nameti rimbangu lai nu, nadu ba njàpu-danyaka da pangangu la paraingu yiana,” wàna. 10Na hanganji paràha-nanyaka i Embitu-Meliku, “Kariangu tau madua haàtu#madua haàtu; Imbarani: tailu kambulu. kai padita-ya i Yerimia welingu la humuru ba ndedi nameti,” wànanya. 11Ka lua-nanyaka i Embitu-Meliku dàngu nuda da tau madua haàtu la nggundangu uma hanganji, hi dapiti katàri lai nu, hàla hi da-duluru wànya kalorungu lai nyungga daa la humuru. 12I Embitu-Meliku na-paràha-ngga patuha nuda da katàri la halili-nggu ka na-latangu wàngu na kalorungu ka àmbu na-pakatiu-ka kalorungu. Ka pa-namatungu-nggunyaka la hupu liina i Embitu Meliku. 13Ka yila-danggaka hu dita, paluhu welingu la humuru. Hàlaka nu pàtu-danggaka la talora uma hanganji.
I Hendikia ba nakarai panaungu lai Yerimia
14Handàka la hau rehi, i Hanganji Hendikia na-paràhangu tau pakaria-ngga lai nyuma la pindu bokulu pa-tailu wàna la Umana i MIRI. Napanii-ngga nyungga, “Ka ku-paàra-nya wànggunggau, tàka nyumu kau hema pa-tànjingu. Àmbu winingu ngga - nggàra,” wàna.
15Kuhema nyungga, “Jàka kupanii-ya na ma-deningu, jiangu-maka duna Tamu Umbu bau puhangga hukungu meti, dàngu jàka ku-panaunggau, Tamu Umbu ndau tundu-anya nuna na panaungu,” hi wànggu.
16I Hanganji Hendikia na-paràndi kangunguhu lai nyungga, “Lumuna i Ala maluri, Ala na mawua-nda luri nyuta, ku-harangu, ba nda kuhuku pameti-akau jàka ndia la pa-pakata-nggau la tau na ma-mbuhangu pa-pameti-kau,” wànangga.
17Ka panii-dunggu-nyaka i Hendikia, nu i MIRI Mahupu-mbiha, i Ala na pa-maraku-na na tau Ihirailu, napanii tuna yia, “Jàka mu-pajàmangu wikimu nyumu la mapawai ngaba la hanganji Mbambilu, nda pa-pameti-akau, na paraingu yiana nda patunu-mbuya. Nyumu dàngu kuru umamu napa mimara. 18Tàka jàka ndau bihu nyumu pa-pajàmangu wikimu, na paraingu yiana kanabu-nanyaka duna la lima tau Mbambilu. Napa datunu hàlaya, dàngu nyumu ndau mara-apa,” wànggunya.
19Nahema na hanganji, “Ku-mangàdatu-nja da tau angu banjaru-nda da mambàda palai la ngaba tau Mbambilu. Napa hi dapuli biangga-ka lai nyuda, hi da-pamayila-ka,” wàna.
20“Ndia-a,” hi wànggunya. “Napa nda dapuli-anggau Tamu Umbu lai nyuda. Kukarai langata - tàkakau Tamu Umbu ka peku tundu-munya na liina i MIRI; napa mbuu ndàbana na-lànyapu, dàngu napa nda pa-pameti-akau Tamu Umbu. 21Tàka jàka ndau pajàmangu wikimu Tamu Umbu, i MIRI mbàda paita-mana-nggaka jàka nggàraya napa na madedi. 22Nu la harii mata kuitaha mbuu ndàbada da kawini da mani-njapa la uma hanganji Yahunda ba dundilu-ha la hambeli la mapawai ngaba - pawai ngaba-na na hanganji Mbambilu. Nàhu ba dalaku, panii-danyaka,
‘Na hanganji da-panyonga-yaka
paraï ariyaa - ariyaa angu lànggina,
dàngu da-kuaha-ma-ayaka paraïda nyuda.
Nàhu, ba na-hanjubulu-ka na wihina la kapihaku,
kandulingu-danyaka duda,’ ” wàda.
23Hili panii-manggunyai, “Mbuu ndàbada da ana da pa-pahàmu Tamu Umbu napa pangàndi-ha la hambeli la tau Mbambilu. Jiapa nyumu wikimbu Tamu Umbu ndau mara-a welingu lai nyuda. Nyumu napa Tamu Umbu nayàpa-kau paraï na hanganji Mbambilu, tàka na paraingu patunu hàlaya,” wànggu.
24Hàla hi napanii i Hendikia, “Àmbu pekadu lai ngga - nggamu rukuna yiana na pabanjarungu-nda, ka àmbu danàpu-nya na lurimu. 25Jàka era ronguda da mapawai ngaba ba kupanii dànggau-ka nyumu, napa nyuda damai pa-paàra-nggau rukuna na papanii-nda. Napa daràndi-makauka duda ba nda da-pameti-akau, jàka mu-wàlahu hàlaha lai nyuda. 26Panii bianja, ba pamanda-mungga nyungga ka àmbu ku-pangàndi belinggau la uma kapàtangu pameti ningu lai nu,” wàna.
27Ndedi nggi mandai mbuu ndàbada da mapawai ngaba damai lai nyungga hi dapaa - àrangga nyungga. Tàka nyungga hi kupanii-nja hama tuna na papanii-nangga na hanganji. Ba tunaka nu nda nggikina wàda-apa nadu ba nda ningu haàtu mapinya na pa-pabanjaru-ma na hanganji dàngu nyungga. 28Jiapa-ma na pàtu-dangga la talora uma hanganji lundu la lodu wàhi-nanya muhu na Yeruhali.
Currently Selected:
YERIMIA 38: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
