YERIMIA 3

Na Ihirailu nda na-tuturu

1Napanii i MIRI, “Jàka era ningu haàtu kawini papaha, ka na-pahewa dànya paraïna leina, hàla na kawini nuna hi papaha tau hawiangu-yaka, na lei memana àmbu nahili piti beli-duya tu papaha-na, nadu na rukuna nuna napa naruha wànya yiana na tana. Nyumu dumu Ihirailu, mbàda dangu-daka da yoramu, nggiki hama toru mbeni-muka nàhu pabeli lai Nyungga! 2Kamangu pa-tàngaru hu dita, la pinuda da tandula! Nggii-kiyapa na ngia panda luami handàkangu la pa-pahunda? Hama tuna na tau Arapu na ma-mandapu la maràda telangu, tu-mamuka nyumu bau mandapu la hingi ànda bau patia-nya na tau na ma-mbuhangu pa-payorangu. Mu-pairaku-ya nyumu yiana na tana wàngu njuraku-mu dàngu akatu-mu. 3Nuna-duya mangu kiringu hi kupàtu-ya na wai awangu, dàngu na urangu la kawunga wandu hi nda naera la papuru. Nyumu mueru-maya na kawini pahunda na manda ningu makiangu.

4Nu la rehi ndukamu, ama-nggunya wàmu-dunggaka bau panii, dàngu ba kumbuha-nggau welingu pa-anakeda-mu. 5Mupanii-mbu nyumu ba nda jia panua naingu-anggu la pahànga-nggamu. Nuya na paniimu, ha Ihirailu, tàka ba talànga tuna nu, wunda pangala bia-munjai mbuu ndàbada da ma-akatu da papeku wundamu,” wàna.

Na Ihirailu dàngu Yahunda da-pambelingu-ma bàdi

6La rehi pareta-na i Hanganji Yuhia, tuna yia na papanii-nangga nyungga i MIRI, “Muita-duyaka jàka nggàraya na pawunda-na na Ihirailu, na kawini nda tuturu? Na-dunjaku-ngga Nyungga tàka hi na-pahunda la nimbihu pinu tandula majangga dàngu la nimbihu lumbu ai ma-marumbingu. 7-8Na pa-pangàda-nggu làti ba nahàla ndàba-yaka nuna la pawunda-ya làbu na-kabeli lai Nyungga wànggu bia. Tàka nda na-kabeli-a, tàka lua-nanya pa-pahunda bia. Tuna nuduka hi ku-pahewa dànya dàngu hi kuwàngga-ya.

I Yahunda angu dedina i Ihirailu na manda tuturu, naita ndàba-maya nuna tàka nyuna nda na-mangàdatu wà-anya. Nyuna tundungu-mananyai duna pa-pahunda, 9dàngu nda nawàngu pa-makia ndoku. Nyuna na-kajari ba na-marubuku-nja da watu da ai, hi lupa na-iraku yiana na tana. 10Ba nahàla-ka pawunda ndàbaha nuda, i Yahunda na manda tuturu nabeli kabàli lai Nyungga, nadu na etina nda natànji. Nyungga, MIRI mambàda panii,” wàna.

11Tunaka nu i MIRI napanii-ngga, jiapa-kai ka mbàda taluru-nanya Nyuna paraïna Ihirailu, na nyuna na Ihirailu nahàmu ningu biapa welingu la Yahunda na manda tuturu. 12I MIRI na-palewa-ka palua la Ihirailu la papeka-nya na ngerana yiana: “Ha Ihirailu manda tuturu, kabeli-wa lai Nyungga! Nambinu na mila etinggu Nyungga dàngu nda jia mbeni pangalangu-anggu lai nyumu. 13Peka pa-tànjingu bia ba njala-munya nyumu dàngu bau patula ngganggangu hanggangu lai MIRI, Alamu. Pa-tànjingu bia nyumu bau nimbihu-ha da pingi ai marumbingu bau pa-jiliku-nya nyumu na mbuha-munja da marapu-da da banjaru hawiangu, dàngu ba ndau tundunja da pareta-nggu. Nyungga, MIRI mambàda panii,” wàna.

14Napanii i MIRI, “Ha banjaru manda tuturu, kabeli-wa lai Nyungga! Nyimi mangu-nggunggai. Nyungga napa kupiti-kai, haàtu welingu la hau paraingu, madua welingu la hau kaliba - hau kalibaru, hi kungàndi belikai la Tandula Hiungu. 15Napa kuwua-nggai liku uru - liku uru ma-manundu lai Nyungga. Napa nyuda dairu ngàndi wànggai manggàna-da dàngu pinguda. 16Hàla, jàka era bonjangu-mika padangu la tana yiana, na tau napa nda nahilu panii wà-anyapa na Pàti Pa-ràndingu-nggu. Napa nyuda nda da-kanandi-anyapa dàngu nda dahilu namu-ayapa, jiapa nda dahili ihi wà-anyapa jàka ndia nda dahili pandoi-apa hili hau Pàti Pa-ràndingu hiluna. 17La rehi nuna na paraingu Yeruhali napa ‘Kanjàka hanganji-na i MIRI’ wàdanya, dàngu mbuu ndàbana na banjaru napa na-pauhi la paraingu nuna la pa-marubuku-ngga Nyungga. Nyuda nda dahili tundu-anyapa na pambuha etida nyuda na manduba dàngu na ma-akatu. 18Napa na Ihirailu da-pambulungu dàngu na Yahunda, dàngu hi da-pakariangu pamai weli diangu welingu la tana ngia pa-wàrungu-ha. Napa nyuda dabeli la tana na pawua-nggunja da boku la mangilu-mi ka tana kangeha-danya,” wàna.

Na kajari-na na banjaru-na i Ala

19Napanii i MIRI, “Ha Ihirailu, kumbuhangu payema-kau nyumu ka ana-nggunggau, wànggu, dàngu napa kuwua-nggau tana pahàmu eti wàngu, tana ma-kanjupu manandangu la pa-nggubulu awangu. Ku-rinjungu Nyungga Ama ka wàmungga, dàngu àmbu hilu palai-dupa welingu lai Nyungga. 20Tàka hama tuna na papaha manda tuturu, nyumumbu ndau tuturu-a lai Nyungga. Nyungga, MIRI mambàda panii,” wàna.

21Dita la pi - pinu palindi parongu-ya na ma-kanyaüru; nuna talia liina na banjaru Ihirailu-ya na mahii dàngu na makama - mahingu, nadu ba danjala-ka dàngu ba da-maromba-nyaka i MIRI Alada. 22Ha nyimi mbuu ndàbami mambàda dunjaku-nya i MIRI, kabeli-wa! Napa Nyuna na-pamàlaru-kai, dàngu hi na-patuturu-kai.

Mipanii nyimi, “Wua, nàhu mai-manyaka lai MIRI, nadu Nyuna ba Ala-manya. 23Kahewa-maana nyuma ba malumu-nja da marapu dita la pi - pinu palindi! Na pa-ndulangu nduma Ihirailu mbulungu welina lai MIRI Alama. 24Ba lumunya i Mbaàlu, na marapu na ma-pamakiangu, jia-yaka na ma-pawitingu hi da-yàmihu da anama hamanai da hapi dàngu da mbimbi mbuu ndàbada, da pambàda raï rukuda da boku la mangilu-ma piti welingu la handàka-na. 25Jia batuna, màtawa ka matanggu-nya na makia dàngu màtawa ka tau li wawa-kama. Nadu, nyuma dàngu da boku la mangilu-ma ba mbàda njala-maka lai MIRI Alama, dàngu ba ndedi ma-handàkangu-ma pa-karadaku-nja da pareta-na,” wàmi.

Currently Selected:

YERIMIA 3: KAM

Highlight

Copy

Compare