YERIMIA 2
2
Nambuha-nanya na Ihirailu i MIRI
1I MIRI na-palewa-ka nyungga 2la pa-pakada-nya na lii langu yiana la mbuu ndàbana na tau la Yeruhali,
“Ha Ihirailu, kunamu-ya jàka nggiki tuturu-mu
la rehi ba bidi taukau nyumu;
mambana bokulu-ya na mbuhangu-mu
ba jiaya na wula kawunga pa-pohungu-nda.
La maràda telangu mutundu-ngga
ba taliya na tana na panda tondungu.
3Ihirailu, nyumu mangu wiki-nggunggau,
na ihi etinggu na pambuha-nggu.
Napa ku-pinjalu-nya hanggàmaru
mbuu ndàbana na matunggau pa-mayila wàngu,
Nyungga, MIRI, mambàda panii,” wàna.
Da njalada da boku la mangilu-da da banjaru Ihirailu
4Ronguya na lii languna i MIRI, ha dimi wàlana i Yakupu, kabihu - kabihu Ihirailu!
5Napanii i MIRI,
“Nggàra njala-yaka lai Nyungga na pahunggu-da da boku la mangilu-mi,
hi lupa da-kaleka-ngga Nyungga?
Nyuda datundu-nja da marapu manda pa-wilingu
tàka la malamiri nyuda wiki da ma-makia.
6Nda da-wàrihu-ka Nyungga;
Nyungga, mambàda iru ngàndiha la ànda,
dàngu ma-karia-nja paluhu welingu la Mehiru
papala-ya na maràda wara,
tana mbila jua ma-pakula - pakulangu,
tana màdu kàrangu maningu pa-hanggàmaru wàngu –
maràda panda ngiangu
dàngu panda li ningu!
7Ku-karia-nja la tana ma-kamboka
la papàda-nya na ihina dàngu mbuu ndàba na mahàmu lai nu.
Ba tuna lai nu nyuda da-pairaku-ya na tananggu
na mangunggu datuya pa-mayitangu wàngu.
8Da ngara ratu nda ningu ma-paàrangu
jàka nggika Nyungga, MIRI-da.
Da ngara mapawai ngaba la uku nda dapingga jàka nggamuka Nyungga,
da ngara ma-kuaha da-patula ngganggangu lai Nyungga.
Da ngara wunangu dapani-nya huruna na marapu Mbaàlu,
dàngu da-marubuku-nja da marapu da manda lingu,” wàna.
Na pa-panjala wànanya na banjaru-na i MIRI
9Napanii i MIRI,
“Nàhu hili palakara-nggunya na banjaru-nggu,
dàngu ku-patanda-nja ngera da wàla wuada.
10Pipitu-wa la halinggi Hipuru patama lodu,
paràhangu tau la pahunga lodu la tana Kendàru,
pareha manginjiru-ya lai nu,
ningu handàka matumbu hamana nuna?
11Nda ningu handàka na hau banjaru na ma-panjilu-nya na alana
jiapa-kadu ka nda Ala langatàka-ya.
Tàka paku, na banjaru-nggu da-panjepa-ngga Nyungga, na pa-hamemu wàda làti
wàngu jàka nggàraya na manda ngalangu pawunda ngga - nggàra.
12Jia-duya nu, ha awangu, kanggauhaku-wa!
Ma-ratangu dàngu kandàndaku-wa!
13Na banjaru-nggu dua ngiana na panjala-na:
nyuda da-taluru-ngga Nyungga,
matawai mawua-nya paluri wàngu na tau;
nyuda da-pandoi nduma wikida karaba mbowa na manda kabua wai,” wàna.
Na ruku nda tuturu-na na Ihirailu
14“Na Ihirailu nda ata-aya,
nda wàla ata buta-mbuya.
Tàka nggikina ihi hi uhu limana napapa-nanya?
15Na muhuna na-kangaü-nya hama tuna hinga,
na tanana pa-pambila dàngu pa-pabulu juaya,
da paraingu-na dakehi pa-mbutangu,
pa-dunjakungu-ha hi nda ningu mangia-nja.
16Ha Ihirailu, na lunggi la katiku-mu pa-kikiru-ya
paraï tau Mepihu dàngu Tàhapanihu.
17Nyumu wikima dumu mangu mulanya
mbuu ndàbana na madedi la tàda ihimu,
nadu nàmu ba kuiru ngàndikau la ànda,
bau taluru-maangga Nyungga, MIRI Alamu.
18Nggàra ka utumu bau lua la Mehiru?
Ka unungu wai Luku Nilu, wàmu?
Nggàra ka utumu bau lua la Ahuru?
Ka unungu wai Luku Epuràtu, wàmu?
19Na akatu wiki-mamu dumu mahuku-nya na wikimu,
nyumu muita mayila nadu bau jukaru-ngga Nyungga, Alamu.
Nàhu pàda pàku-munyaka na ma-paita dàngu na ma-hambàti
jàkau taluru-ngga dàngu ba ndau tembika.
Nyungga, MIRI Alamu mambàda panii;
Nyungga, MIRI Ala Mahupu-jangga dàngu Mahupu-mbiha,” wàna.
Na nda bihuna na Ihirailu palumu-nya i MIRI
20Napanii i MIRI,
“Mandai-maka nyumu ba ndau bihu pa-marubuku lai Nyungga;
ndau bihu pa-manundu jàka ndia pa-maraku-ngga Nyungga.
La nimbihu pinu palindi jangga,
dàngu la nimbihu lumbu ai marumbingu
nyumu mu-maraku-nja da marapu woru.
21Nyumu ku-pamula-kau hama pingi angguru
papindi-nggu welingu la wini marihi hàmu.
Tàka nàhu nyumu panjilungu-munyaka,
kamàla angguru manda palingu-kauka.
22Jiapa-kadu nyumu kau ihu
wàngu habu mada - dangu,
ba tuna da kadutulu njalamu
daingu ita-manggu-njapa.
23Mutoru mbeni pàku papanii ba ndau iraku,
dàngu ba ndau handàkangu pakiku-nya na Mbaàlu!
Iluya na nggoda nggàduku-mu la lolangu,
namuya na akatu-mu dàngu jiaya wàmuwa!
Nyumu beri bai ota ma-itirungu la pa-paminingu,
na ma-kanjaru palua pa-maingu na panda roputu,
24hàla hi natama la maràda telangu ma-kahàna.
Nyuna nda pa-roputu-ya jàka talànga itirungu-na pa-paminingu.
Nda najàra-apa pahimbu-ya paraïna mambuha-nya,
nadu la rehi pa-miningu, ba naingu-mana ba na-pajàmangu wikina.
25Ha Ihirailu, àmbu palaidu pandutu-ha da marapu,
dàngu àmbu kaladaku-du papaau-nja nyuda,
napa hi jia manua biada da wihimu dàngu namàdu na kalàmba nggorumu paraï pa-kandànga.
‘Ndia-a, nda hidama ka kubeli,’ tàka hiu panii,
‘nadu ba mbuha-manggunja da marapu, dàngu ka kukiku-nja wànggu,’ wàmu,” wàna.
Ràkana ba hukunya na Ihirailu
26Napanii i MIRI, “Hama tuna na ma-manganga ba na-pàdangu pa-makia jàka yàpaya, tumbuna nyimi mbuu ndàbami bai pàdangu pa-makia, ha tau Ihirailu, hanganji - hanganji, dàngu dimi maningu wai ngabangu, ratu - ratu dàngu wuna - wunangu-mi! 27Napa nyimi pa-pamakia-kai, nadu na hakadipu ai, ama ba wàminya dàngu na hau watu, ina ba wàminya. Nda maiminya lai Nyungga-a, tàka dunjaku-mingga Nyungga. Tàka jàka natàka-ka na pa-handuka wàngu, Nyungga-duika papaau-mi ka kumai pa-pahàla-kai.
28Ka nggihaka da marapu-mi da pa-pandoi-mi? Jàka ningu ma-handuka, paràha-nja nyuda ka da pahàla-kai nyimi, jàka damàkadu! Ha Yahunda, da marapu-mu hama dangu-mada da paraingu-mu! 29Nggàraya na panda hàmu wàna na etimi lai Nyungga hi lupa milawa-ngga? 30Kahewa-maana ba kuhuku-nggai, nadu ba ndai mbuhangu pa-patingingu lii kanyàngi. Hama tuna hinga ma-talànga panyara, tuna numai nyimi bai pameti-ha da ngara wunangu-mi. 31Ha banjaru Ihirailu, ronguha yiada da paniinggu. Handàkangu-ka nu Nyungga ba hama maràda telangu-ka lai nyimi jàka ndia ba hama tana ma-kapàta wuru yila? Tàka nggikina nyimi hi mipanii, hawewa wàma duma hi wàmi dàngu hi ndai hilu bihu pabeli lai Nyungga? 32Ningu dimi ana karia ma-marombangu ngaüna, jàka ndia bidi papa kawini ma-marombangu kalembi bidi papana? Tàka nyimi kanjupu mandai-manaka bai maromba-ngga Nyungga – piti welingu la nda pira bianaka mandaina. 33Kanjupu màhikai la pahimbu wihuna la pa-pandàngi-ha da eti yorami. Da kawini kajari da marihi kajàliku-mbu da-ngalangu-mbu pakarai kai papeka-nja nyuda! 34Da pakimi da-marihaku wàngu ria tau mila dàngu manda njala, nda ria tau manganga payàpa-a.
Na nyuna ba tuna, 35panii bia-minya ba ndai njala-a, ba nda kumbeni-anggaipa. Tàka Nyungga, MIRI, napa ku-hukunggai, nadu ba ndai bihu papeka ba njala-mami-nyaka. 36Kanjupu renggakai palua la marapu - marapu banjaru hawiangu la pakarai pa-ndulangu! Jiangu-ma napa ba nahala na etimi paraï Mehiru, napa nyimi na-pakahewa-kai paraï Ahuru. 37Napa nyimi mi-dunjaku-nya na Mehiru ba dàngu hala etimi dàngu makia-mi. Nyungga, MIRI, ku-jukaru-njaka nyuda da ràka pa-monungu ba wàmi làti; nda ana nggàra-a utungu pangala-mi welingu lai nyuda,” wàna.
Currently Selected:
YERIMIA 2: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
