YERIMIA 4
4
Na paaungu la pa-pambelingu
1Napanii i MIRI, “Ha banjaru Ihirailu, beli jàka wàmi, beliwa lai Nyungga. Wàru mangilu pàkunja da marapu da panda mbuhanggu, dàngu tuturu-wa lai Nyungga. 2Jàka mi-harangu wànya na tamunggu dàngu hi miluri patutungu, mola dàngu pa-deningu, mbuu ndàbada da banjaru napa dakarai-ka ka ku-pakanyuru-nja, tàka napa dawotu-ngga Nyungga,” wàna.
3I MIRI napanii-nja da ma-mandapu la Yahunda dàngu la Yeruhali, “Ràma-yawa na tanami na pandedi ràma, àmbi hàbarungu-du wini la ngia patumbu rii madàka. 4Paundu-manya na paràndi-mu lai Nyungga, MIRI-mu, dàngu kahaungu-ma wikimu ndumanggu Nyungga, ha ma-mandapu la Yahunda dàngu Yeruhali. Jàka ndia, napa na hàngganggu na-kandulangu dàngu na-patunu hama tuna epi na panda màka papàda jiapa ka nda nggamuya kadu. Nuda mbuu ndàbada napa da-handauni-ya na wikimu paraï da paruku-mu da ma-akatu,” wàna.
Na Yahunda naora-nya ma-kaluluku-nya
5Hapiwa taropitu la nggubulu tana!
Wara pa-lohangu-wa dàngu pa-kodungu-ma.
Paràha-nja da ma-mandapu la Yahunda dàngu Yeruhali
ka dapalai la parai - paraingu maningu tindingu-na.
6Pa-itangu ànda la Hiungu, tandula-na i MIRI,
hinggilu parenggangu àmbu ngudu bia.
Weli diangu i MIRI huharu-nanyaka
na ura pàda dàngu na pa-làjaru wàngu.
7Hama tuna hinga maluhu welingu la ngia pa-kapàndi-na
tuna numaka ba na-hadangu na ma-pambuta banjaru dangu
ka palàjaru-ya la Yahunda ba wàna.
Da paraingu la Yahunda napa kanànda-haka
pangia panda ngiangu tau.
8Jia ba tuna nu, hiiwa dàngu padudurungu-wa,
kalambungu-wa hinggi karungu tanda handuka.
Nadu na hànggana i MIRI na ma-kandulangu
ndedi na-wadaru-mapa welingu la Yahunda.
9Napanii i MIRI, “La lodu nuna da hanganji dàngu da ma-katangu pareta namàli na ringgitu-da; da ratu da-kandàndaku dàngu da wunangu da-katàtaku,” wàna.
10Hàla hi kupanii, “MIRI, Mahupu-jangga, panyonga-munyaka na tau Yahunda dàngu na ma-mandapu-nya na Yeruhali. Bau panii napa ninya na mànjaku, tàka nàhu da lurima nàpu-nanja padua hapanda,” wànggu.
11Napa nàmunya na rehina ba narongu lii langu na tau Yahunda dàngu na ma-mandapu la Yeruhali, ba tungu-nanyaka na ngilu mbana welingu la maràda telangu hanggangu lai nyuda. Na ngilu nuna nda àtalu ngilu-aya na ma-hawuru ngàndi uta, 12tàka ngilu mbangatu-ya na manàmu-nya la hupu liina i MIRI wikima ka tuni wànya hukungu na banjaru-na.
Na Yahunda na-nggupulu-ya muhu
13Tàngaru, wudaku wàna na muhu hama tuna karumangu. Da kareta pabera-na hama ngilu lapuru-ya, da njarana darihi renggapa welingu la mbaku tehiku. Ai inai, hanggàmaru-ndanyaka! Tàlaru-ndanyaka!
14Ha Yeruhali, kawuka-nja da akatu la etimu ka pekuna ba pamara-kau. Lundu pirangu-mapa bau pakàpa-ha da kanandingu ma-akatu daa la etimu?
15Welingu la paraingu Ndàngu, hamanai welingu la ma-palindingu Epuraïmu nàmu-njaka da papalewa da mangàndi lii manda hàmu. 16Maidanya papeka hahanja da banjaru dàngu papanii-nya na ma-mandapu la Yeruhali, ba nàmu-nyaka na muhu#muhu; jàka ndia: ma-panggupulu. welingu la tana ma-maliru. Bua - bua-mada napa ba da-paoingu pa-pabera hangganja da paraingu Yahunda 17dàngu hi da-nggupulu-ya na Yeruhali hama tuna na madai woka. Mbuu ndàbada nuda hi datumbu rukuna ba na-patula ngganggangu na banjaru Yahunda hanggangu lai MIRI. I MIRI mambàda panii.
18Oi Yahunda, nyumu wiki-maka dumu maparuu-nya na hanggàmaru la wikimu. Na huri lurimu dàngu da paraï paruku-mu jia-mahaka da kiringu hi mupàda-nya na matanju-nya na etimu.
Na hawina-na i Yerimia ba na-pangàda-nya na banjaru-na
19Kanjupu mayila-ya na etinggu,
nda ku-dàdungu-apa la pa-hambeta.
Nda kumàka pa-pamandangu wikinggu
na-bàrangu na etinggu daa la kurunggu,
ba kurongu lingu taropitu,
dàngu talia kabua-da ba da-paoingu pa-pabera.
20Napanu - nundangu ba natàka na hanggàmaru
na-pakabu-ya nggubulu-na na tana.
Hi jia paruha bia-danya na maü teranggu,
da terana dahira - hira walaha.
21Lundu pirangu-mapa bàdi ba kuita mataya
na tau na ma-pabera dira matiki?
Lundu pirangu-mapa bàdi ba kurongu-ya
na lingu taropitu na ma-pakawanga kahilu?
22Napanii i MIRI, “Kanjupu ndubaya na banjaru-nggu,
nda datanda-ka Nyungga.
Hama anakeda manda nggàra papida
nda nggàra ndoku pa-jàngapu-da la kanandingu-da;
damàhi ningu la ma-akatu,
nda da-duluku la mahàmu,” wàna.
Na harii mata rukuna ba nàmunya na hanggàmaru
23Ku-pahangga-nja da matanggu la pinu tana,
ba itaya nabulu dàngu namàdu marokutu,
ku-tangara hanggangu la awangu,
hai a-ai, nda ningu ma-handaraku.
24Kuita-ha da palindi dàngu da tandula majangga
ba nggauha - nggauha-da nda ngerida.
25Ku-itangu nda ningu tau,
da ma-hawurungu-mbu da-hawurungu hàlaka.
26Na tana kamboka maràda mbila màdu-yaka,
da paraingu dakabu hi kanànda-haka,
nadu i MIRI ba lalu hànggaya
la banjaru-na.
(27Napanii i MIRI, nggubulu-na na tana napa maràda telangu-yaka, na nyuna napa nda na-pamolu ailulu-anya.)
28Na pinu tana napa na-handuka,
na awangu kapàta wuru yila-nanyaka.
Mbàda panii-manaka i MIRI
nda na-panjilu-anyapa na pa-pakaka-na.
Nyuna mbàda piti botangu-naka
nda na-kandulingu-apa hatàbalu.
29Parongu kayànggaku pamba la njara dàngu mapana,
hi napalai hàla na tau ba yàhu - yàhuna.
Da omangu darunu-nja,
da tandula watu da-kandekalu-ha.
Da paraingu mbuu ndàbada da kahàna,
nda hilu ningupa mabihu pa-ndàdiku lai nu.
30Ha Yeruhali, pa-dunjakungu-kauka dàngu nda ana nggàra ula-mamupa!
Nggàra ihi wàngu hiu hau kalembi rara
dàngu hi muwotu ngaümu àmahu marara mabara,
dàngu bau perinja muru manandangu da matamu?
Parahumangu bau pa-manandangu wikimu,
nadu ba nda dainga-akaupa paraï ba hapajia-ha da yoramu,
jiapa ka pameti-ya wàda-mbunggaupa.
31Kurongu-maya na hii pangiba-mu
hama tuna na kawini paana ba wàna;
hama tuna na bidi kawini ba na-habola-nya na kawunga anana,
tuna nu na hiina na Yeruhali ba na-hulungu na hangahu-na.
Da limana da-payalungu ba na-kaungu,
“Ura dedi-nggunyaka – ka pameti-ya ba wànangga muhu!” wàna.
Currently Selected:
YERIMIA 4: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
