YERIMIA 29
29
Na huratu-na i Yerimia la tau Yahundi la Mbambilu
1Nyungga ku-tulihu-nja huratu da ratu, da wunangu, da liku uru banjaru da maluri-ipa, dàngu mbuu ndàbana na tau hawiangu da pambàda palaüngu welingu la Yeruhali la Mbambilu paraïna i Nembukatunehàru. 2Na huratu nuna ku-tulihu-ya ba hàlaka pa-palaü-nja la ngia pa-wàrungu-ha i Yuyakingu, na inana, da panggawi uma hanganji, da mapawai ngaba la pareta Yahunda dàngu Yeruhali, da ma-maràna pa-karàmaku, dàngu da mahupu màhi la paràma. 3Na huratu nuna ku-pakata-nya la limana i Elaha anana i Hapàngu, dàngu i Nggimàraya anana i Hilikia da pa-palewa-na i Hendikia hanganji Yahunda lai Nembukatunehàru hanganji Mbambilu. Na linguna nuna na huratu,
4“Tuna yia na puluna i MIRI Mahupu-mbiha, Ala Ihirailu la mbuu ndàbada da tau da pambàda wàruna welingu la Yeruhali la Mbambilu: 5‘Pa-engangu bia lai nu. Pahadangu umami. Poka wokami dàngu pàdanja hàmuda da pangala-mi. 6Lalei mangoma-wa kai ngalangu anami, dàngu màta da anami ka dalalei ka da-mangoma ka peku ngalangu-da anada. Na dangumi màta ka na-bonjangu, dàngu àmbu jia kawawaku duna. 7Ràmama ka da-mànjaku da paraingu ngia pawàru-nggunggai. Hamayangu lai Nyungga nduma pahàmu wàda da paraingu nuda, nadu jàka da-mbokaru nuda da paraingu, mi-mbokaru-mbu nyimi. 8Nyungga MIRI, Mahupu-mbiha, Ala Ihirailu, ku-panamu hahanggai ka àmbi pa-jàmangu wikimi la pa-panyonga-kai paraï da wunangu da ma-ngiangu la hongami jàka ndia jiapa ka nggamu biaya na mapanii ba peku nyura-nanya na lodu na manàmu-nya. Àmbi eti wàdunja da manggadipangu-da nyuda. 9Dawànya na tamunggu ba dapeka-nggai hangia - hangia manda pa-deningu. Nda ku-palewa-aha nyuda. Nyungga, MIRI, mambàda panii,’ wàna.
10Napanii i MIRI, ‘Jàka na-nggànapu-ka pihu kambulu ndaungu na rehi ndumana na Mbambilu, napa kuhilu hamata-kai, dàngu ku-patutu-nya na hupu ràndinggu la pa-karia belinggai la pa-ngiangu yiana. 11Ka nda kupi wiki-anya nu na pa-pakaka-pakaka-nggu ndumami nyimi? Nuda da pa-pakaka-nggu ka pa-hanggàmaru wànja nda wànggua, tàka màta ka paoha wànja dàngu napa ka ninguki mahàmu pamonu-da la lodu malamiri wànggu duku. 12Napa nyimi mikarai pa-ndulangu lai Nyungga. Napa nyimi mimai pa-hamayangu lai Nyungga, dàngu napa kuhema-ya na hamayangu-mi. 13Napa nyimi mihimbu-ka, dàngu napa mihunggu-maka, nadu ba weli eti dimi la pahimbu-ka Nyungga. 14Langatàka, napa nyimi mi-hunggu-maka. Napa ku-pauhi-nggai welingu la padua nimbihu banjaru dàngu welingu la nimbihu tana ngia pa-paihangu dàngu ngia pa-wàrungu-kai. Napa ku-karia belinggai nyimi la tana ngia paweli-mi yiana, dàngu napa ku-pahàmu beliya na lurimi. Nyungga, MIRI, mambàda panii,’ wàna.
15Na paniimi nyimi, i MIRI nawua-nggaika wunangu la Mbambilu. 16Ronguya jàka nggàraya na paniina i MIRI ngerana na hanganji na ma-pareta nàhu nu na hanganji wàlana i Ndautu, dàngu ngerana na ma-mandapu-nya na paraingu yiana, nu da nua kalembi-mi da panda palaüngu la ngia pa-wàrungu angumi nyimi. 17Napanii i MIRI Mahupu-mbiha, ‘Napa Nyungga ku-patàka-nya na pabera, na rimbangu dàngu na panyaki pa-nggàbalungu lai nyuda. Napa nyuda ku-palua-nja lima hama tuna da wua kapilitu malalu muhungu hi nda pekuna panganja. 18Napa kukeha - keha wànja pabera, rimbangu dàngu panyaki pa-nggàbalungu hi lupa na-mangginggitu napa mbuu ndàbana na banjaru la pinu tana ba naita-ya na hadada. La nggi bia napa ku-paiha ninja, na-mangginggitu dàngu na mangàdatu ndàba na tau ba naita-ya na matumbu la ngerada nyuda. Napa pa-paakangu-ha, dàngu na tamuda nyuda natu-ma-ayaka tau paràtungu wàngu. 19Hi kiri tumbuna nuna mbuu ndàbana lai nyuda, rukuna ba nda datundu-nya na lii pa-patàkangu welingu lai Nyungga na pa-patàka nua nainggu la ngaruda da wunangu da atanggu. Nda dabihu-ma nyuda paeti wànya nuna na lii pa-patàkangu-nggu. 20Dàngu nyimi mbuu ndàbami pambàda wàrunggu la Mbambilu, patingi-nya jàka nggàraya na papanii-nggu Nyungga, MIRI,’ wàna.
21I MIRI Mahupu-mbiha, Ala Ihirailu, mbàda panii-manaka na rukuna i Ahàpu anana i Kolaya, dàngu rukuna i Hendikia anana i Maaheya da mawànya na tamuna i MIRI ba da-patàka-nggai hangia - hangia manda deningu. Napanii i MIRI ba pakata-nanjaka nyuda napa la kuaha-na i Nembukatunehàru hanganji Mbambilu, napa na-pameti-ha nyuda la hangga matami nyimi. 22Jàka era ràtungu-da tau napa da tau pambàda palaüngu la Mbambilu welingu la Yeruhali, napa dapanii, ‘Màla àru i MIRI ka na-palua-nggau lima hama tuna lai Hendikia dàngu i Ahàpu da pambàda tunu kaluri-na na hanganji Mbambilu,’ wàna. 23Nu-duyaka na ura dedida nyuda nadu ba dawunda-duka njala bokulu la Ihirailu; nyuda da-kajari, dàngu ba dawànya na tamuna i MIRI la papanii-ya na hangia - hangia na manda tubangu. Nuna ndubaku-nanya na pambuha-na i MIRI. Napi-manya duna Nyuna jàka nggàra ulada, dàngu Nyuna wiki-maka na ma-hakahii lawanja nyuda.#ulada, dàngu Nyuna ... nyuda; jàka ndia: ulada, naita-ha nyuda ba dawunda-ha nuda. I MIRI mambàda panii,” wàna.
Na huratu-na i Hamaya
24-25I MIRI Mahupu-mbiha, Ala Ihirailu na-wuangu-ya na lii pa-patàkangu-na lai nyungga ndumana i Hamaya, tau Nehelàmu, nadu ba na-pangàndingu huratu wàngu tamu wikina nyuna la mbuu ndàbana na tau ma-mandapu-nya na Yeruhali, lai Ratu Hapanya anana i Maaheya, dàngu mbuu ndàbada da ratu hawiangu. Daa la huratu nuna i Hamaya na-tulihu tuna yia lai Hapanya: 26“I MIRI nawotu-kauka nyumu la paratu hiluya i Yuyanda, dàngu nàhu nyumuka ma-katangu marihi jangga la Umana i Miri. Na patanggu-mu jiaya la pa-wuangu pareta, ka hondu wànya nggili bàhi la nggoruna nimbihu na tau katoba na mapeka wikina wunangu-ka na mawàna. 27Tàka nggikina nyumu hi ndau pa-luangu limamu lai Yerimia na tau Anatutu na ma-pahada wunangu la honga banjaru-nda nyuta? 28Hulunya bàdi na ngaruna na tau nuna, nadu ba napeka-nja da angunda nyuta la Mbambilu ba mandai-danyapa nyuda pa-ngiangu lai nu. Dàngu jia-duyaka nu, hi napanii, màta ka dawulu uma dàngu ka datungu woka dàngu ka dapàda-nya hàmuna na ruku limada,” wàna.
29Na huratu nuna nambaha-ngganya paraïna i Ratu Hapanya lai nyungga. 30Jia-duyaka i MIRI hi na-paràhangga 31pa-pangàndingu langu rukuna i Hamaya la mbuu ndàbana na tau Ihirailu da pa-wàrungu la Mbambilu. Yiana-yaka na lii langu, “Mbàda panii-naka lai nyimi i Hamaya ba na-pahada wunangu; tàka làti duna Nyungga, MIRI nda ku-palewa-aya nyuna. Nadu ba mbàda pawiti-nanggaika hi kiri waiminya na kareuku kambàliku, 32dàngu ba mbàda paràha-nanggaika la palawa-ngga Nyungga, napa kuhuku-nya dàngu wàla wuana. Nda haàtu-a welingu lai nyuda napa ma-ndàdiku la hongami nyimi la paita-ha da mahàmu - mahàmu-ka na pa-paloku-nggunya na banjaru-nggu. Nyungga, MIRI, mambàda panii,” wàna.
Currently Selected:
YERIMIA 29: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
