YERIMIA 25

Na muhu weli diangu

1La ndaungu papatu wàna ba hanganji Yahunda-yaka i Yuyakimu anana i Yuhia, ku-ngalangu lii langu welingu lai MIRI na manggàna-ya nggubulu-na na tau Yahunda. La rehi nu kawunga ndaungu pareta-nanya i Nembukatunehàru ba hanganji Mbambilu-ya. 2Kupanii-nya mbuu ndàbana na banjaru Yahunda dàngu na ma-mandapu-nya na Yeruhali, 3“La ngala dua kambulu tailu mbua ndaungu, piti welingu la ndaungu pa-hakambulu tailu wàna na pareta-na la Yahunda i Yuhia anana i Amungu, mbàda panii-nanggaka i MIRI lundu lodu nàhu dàngu ndedi ku-handàkangu-a panda patàka-nggainya jàka nggàraya na pambàda paniina Nyuna. Tàka nyimi ndai kawelangu-a. 4Nutakungu-mananya i MIRI papalewa wunangu da atana lai nyimi, tàka nyimi ndai bihua pa-patingingu dàngu paeti wanja. 5Da-paràha-nggai pa-dunjaku-nya na huri lurimi na ma-akatu, dàngu da paula - paulami da manjala, màta ka peku pa-engangu-mi la tana yiana na pambàda wuana i MIRI lai nyimi dàngu la boku la mangilu-mi ka mangu kangeha-minya. 6Nuda da wunangu dahiri-nggai la pa-marubuku dàngu la palumu-nja da marapu hawiangu. Dahiri-nggai pa-marubuku-nja da marapu pa-pandoi wikimi, nadu na rukuna nuna ba pahàngga wànanya i MIRI. Jàka mitundu-nya nuna na pareta-na i MIRI, nda nahuku-anggai. 7Tàka i MIRI wikima duna na mapanii ba ndai patingi-nya Nyuna. Jiapa wuda-kimi-nyaipa na pambeni wàna rukuda da marapu-mi. Nyimi wikima dimi ma-patàka-nya na hukungu la tàda ihi wikimi.

8Ba ndai bihu pa-patingi-nja da papanii-na Nyuna, ka panii-nanyaka i MIRI Mahupu-mbiha, 9‘Napa Nyungga kupaau-nja mbuu ndàbada da banjaru weli diangu, dàngu na ata-mbunggu, i Nembukatunehàru hanganji Mbambilu. Napa ku-pauhi-nja nyuda la pa-pabera dànya na Yahunda dàngu na ma-mandapu-nya, hamanai mbuu ndàbana na banjaru la winggiru-na. Na banjaru Yahunda dàngu da banjaru la lihina ku-palàjaru-ha napa dàngu kumàta-nja pa-taweharu lundu nu - nu. Da tau da maita-ha napa da-katàtaku dàngu da-mangginggitu. Nyungga, MIRI, mambàda panii. 10Da talia lii hanggela hawola-da dàngu da remi ba dambabu pamaü papa, napa ku-papànja-nja. Nda ningua napa mina nduma palita-da, dàngu danjàpu-nja napa uhu nggàndumu. 11Nggubulu-na yiana na tana napa kupuli-nya pa-làjaru hi lupa na-mahàna wàngu. Da banjaru la winggiru-na napa daata la hanganji Mbambilu pihu kambulu ndaungu mandaina. 12Hàlaka nu napa kuhuku-nya na banjaru Mbambilu dàngu hanganji-na ruku njalada. Na tana Mbambilu napa kunyungguruya dàngu hi kupuli-nya pa-taweharu lundu nu - nu. 13Na Mbambilu napa kuhuku-nya ba kuwànja mbuu ndàbada da ura pàda na pambàda pakaka-nggu ndumada da banjaru da pambàda panii-nggunya i Yerimia – nu mbuu ndàbana da ura pàda da pa-tulihu daa la mbuku yiana. 14Da pawunda-da da tau Mbambilu napa kutunja himbalu, napa nyuda na-paata-ha paraï hanganji - hanganji bokulu dàngu paraï da banjaru dangu,’ ” wàna.

Nahuku-nanja da banjaru i Ala

15I MIRI, Ala Ihirailu, napanii-ngga nyungga, “Pitiya na kaha angguru yiana na pambàda paihi-nggu angguru hàngganggu. Ngàndiya la banjaru mbuu ndàbada la ngia pa-palewa-nggunggau. Paràha-nja ka daunu-nya na angguru yiana. 16Jàka daunu-nyaka napa huruku - huruku-daka dàngu na-mbulangu na patandangu-da rukuna na pabera na pa-patàka-nggunja nyuda,” wàna.

17Ka kei-nggunyaka na kaha angguru nuna welingu la limana i MIRI, dàngu hi kulua la mbuu ndàbana na banjaru na ngia papalewa-nangga i MIRI, hi ku-pambana-ha nyuda la paunu-nya nuna na angguru. 18Na Yeruhali dàngu mbuu ndàbada da paraingu Yahunda anguda da hanganji dàngu da mapawai ngabada, kuwua-nja paunu-nya nuna na angguru, hi lupa hama tuna na maràda mbila màdu pa-mangginggitungu-ha. Lundu tàka la lodu nàhu da tamuda jiaha da pa-ràtungu wàngu.

19-26Yiada-haka da pa-ndàkingu-da da tamu tau hawiangu da ma-unungu-ma bàdi la kaha angguru-na i MIRI:

na hanganji Mehiru dàngu da panggawi dàngu da maningu wai ngabada;

mbuu ndàbana na tau Mehiru dàngu na tau hangàdangu la Mehiru;

mbuu ndàbada da hanganji la tana Uhu;

mbuu ndàbada da hanganji la parai - paraingu Pilitingu, la Àhakelungu, Nggaha, Ekurungu;

mbuu ndàbada da tau maluri-pa la Àndutu;

mbuu ndàbada da tau Endumu, Muapu dàngu Amungu;

mbuu ndàbada da hanganji la Tiruhu dàngu Hindungu;

mbuu ndàbada da hanganji la hingi Tehiku Padua;

da paraingu Ndendàngu, Tema dàngu Mbuhu;

mbuu ndàbana na tau na ma-kàtahu pa-kababa lunggina;

mbuu ndàbada da hanganji Arapu;

mbuu ndàbada da hanganji kabihu - kabihu ma-pakorungu la maràda telangu;

mbuu ndàbada da hanganji la Himuri, Elàmu dàngu Mandai;

mbuu ndàbada da hanganji hu dia, mamarau ma-mareni, haàtu mara haàtu.

Mbuu ndàbana na banjaru la nggubulu pinu tana daunu-manya bàdi na angguru nuna. Dàngu na tau na ma-malamiri dehi la paunu-manya bàdi na angguru nuna jiaya na hanganji Mbambilu.

27Hàla i MIRI napanii-ngga nyungga, “Pekanja da tau nuda, Nyungga, MIRI Mahupu-mbiha, Ala Ihirailu, ku-paràha-nja pa-unungu lundu maüku dàngu ka damu - muta. Napa ku-panjoru-ha hi nda dahilu hadangu beli, ruku pabera na pa-patàka-nggunja. 28Tàka jàka nda dabihu pakeiya na kaha nuna welingu la limamu la paunu-nya na angguru-na, pekanja ba i MIRI Mahupu-mbiha na ma-wuangu pareta la patuna nu. 29Napa ku-pakiri-nya na pa-làjaru wàngu la parai wikinggu Nyungga. Ka àmbu ninya la kanandingu-da nyuda ba nda pahuku-anja. Jiangu-maka ba hukunja nyuda ba patàka-nggunyaka napa na pabera la mbuu ndàba banjaru la nggubulu pinu tana. Nyungga, MIRI Mahupu-mbiha mambàda panii, wàna.

30Mbuu ndàbada da papanii-nggunggau nyumu, ha Yerimia, mu-patàka-manja bàdi. Paniinja nyuda,

‘Na liina i MIRI nda - ndàrana welingu la awangu;

dàngu welingu la pangia matua-na

na-kangguruku pa-ndubaku-ya na banjaru-na.

Nggubulu-na na ma-mandapu la pinu tana narongu-ya kayaka-na

hama tuna tau maràma na mapohu angguru la ngia pa-kalijaku angguru.

31Lupa la hupu tana narongu-ya na talia nggoruna;

i MIRI nawulu-nya palakara na ba - banjaru.

Mbuu ndàbana na tau pa-patandangu ngeraya napa

tàka na manjala napa pa-hukungu metiya,’ ” wàna.

32Napanii i MIRI Mahupu-mbiha,

“Welingu la hupu - hupu tana nakanduu na ngilu mbangatu;

na ura pàda nanggàna pandu - ndutunya na hau banja - hau banjaru,” wàna.

33La lodu nuna da metida da tau papunggiluna i MIRI napa da-palimbangu la nggubulu pinu tana. Napa nda pahii-anja nyuda, nda pa-padanda-mbunja ka taninja, pa-màtangu-maaha la tana hama pabundu kangudu.

34Ha dimi liku uru, ha dimi mapawa-nya na banjaru-na i MIRI! Hii kaladaku-wa! Nggi - nggilungu-wa wikimi la kumburu tana, nadu ba jia-yaka na rehina la pa-pameti-kai, tàka na mamara papai - ihangu-ya napa. Hama tuna mbàlu ma-pawilingu-kai nyimi napa na ma-kanabu hi nambera.#Hama tuna ... hi nambera; na hau pa-haleli ndai: napa minjoru nyimi hama tuna na mbimbi na-parupu. 35Jiangu-maka napa ba ndai luhu nyimi. 36-37Mihali urami nyimi dàngu mihii padudurungu ba mbàda patàlaru-nanjaka na banjaru-mi i MIRI paraï ruku hànggana dàngu na-palàjaru-ya na tanami na ma-mànjaku. 38Hama tuna na hinga na maluhu welingu la liangu-na, tuna numbu i MIRI ba naluhu pahuku-nya na banjaru-na. Na mbàringu-na na pabera dàngu na hànggana i MIRI na-panjilu-nyaka na tana yiana hi nadedi-ya maràda telangu.

Currently Selected:

YERIMIA 25: KAM

Highlight

Copy

Compare