YERIMIA 24
24
Da dàmbu katanga wua kapilitu
1Handàka ba na-hàlaka i Nembukatunehàru na hanganji Mbambilu pa-dundilu-ha i Yuyakingu anana i Yuyakimu na hanganji Yahunda karia-da da mapawai ngaba la pareta, da ma-maràna pa-karàmaku dàngu da mini hupu màhi pa-pandoi, nu ba tanawangu-ha welingu la Yeruhali ba ngàndiha la Mbambilu, i MIRI nawua-ngga hau harii mata. Kuita-ha dàmbuda da katanga ma-ihingu wua kapilitu da pa-bànjalu la hangga Umana i Miri. 2Na katanga na ma-wungangu pa-paihingu wua kapilitu maha - hàmu juaha, hama wua kapilitu pa-kawunga pàpu, tàka na katanga na padàmbu wàna pa-paihingu wua kapilitu mambàda muhungu, hi nda peku-apa panganja. 3Hàla, hi napanii dangga nyungga i MIRI, “Nggàraha da paita-mu Yerimia?” wàna.
Kuhema nyungga, “Wua kapilitu, MIRI. Da maha - hàmu kanjupu hàmuha, tàka da mamu - muhungu kanjupu muhungu-ha, hi lupa nda peku-apa panganja,” wànggu.
4Ka hili panii-nanyaka i MIRI, 5“Da tau da pamàta-nggu pa-dundilu la Mbambilu kureki-ha hama wua kapilitu mahàmu-ha hamada yiada; jiaduya Nyungga, MIRI, Ala Ihirailu, napa ku-paloku pahàmu-manja. 6Napa kumangga-manja dàngu napa ku-karia belinja la tana yiana. Napa ku-pahada-nja, nda ku-panjoru-aha nyuda; napa Nyungga ku-pamula-ha, nda kubuta-aha. 7Napa kuwua-nja la pa-rinjungu papinya ba MIRI-ka Nyungga. Napa nyuda banjaru-nggunja, tàka Nyungga Ala-dangga, nadu ba weli eti-mada pabeli lai Nyungga.
8Tàka i Hendikia hanganji Yahunda, hamanai da mapawai ngaba da malihi-nya nyuna, dàngu na rihina na tau Yeruhali da maenga pa-daingu la tana yiana jàka ndia da ma-haleli la Mehiru, nyuda mbuu ndàbada napa ku-paloku-ha hama tuna da wua kapilitu da mamu - muhungu yiada, da manda peku la panganja. Nyungga, MIRI, mambàda panii, wàna. 9Napa Nyungga ku-pahanggàmaru-ha nyuda hi lupa mbuu ndàbada da banjaru la nggubulu pinu tana da-mangàdatu hàla. La nggi bia ba ku-paiha-nja nyuda, napa da-paakanja, parikingu-ha dàngu pa-kamibingu-ha. Da tamuda nyuda jia-haka da pa-ràtungu wàngu. 10Napa Nyungga ku-patàka-nja pabera, rimbangu, dàngu hidu pa-nggàbalungu hi lupa dameti mbuu ndàbada dàngu nda ningu-apa ma-ndàdiku la tana yiana na pambàda wua-nggunja nyuda dàngu da boku la mangilu-da,” wàna.
Currently Selected:
YERIMIA 24: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
