YERIMIA 26
26
Ba kàlaya i Yerimia la ma-patandangu ngera
1Ba hanganji Yahunda-kiyaka i Yuyakimu anana i Yuhia, 2napanii-ngga nyungga i MIRI, “Luawa kau ndolaku la talora Umanggu dàngu panii-njawa da ma-mandapu-nya na Yahunda da mamai pa-lumungu lai nu. Patàka-nja nyuda da pareta papanii-nggunggau mbuu ndàbada da papeka-nja ba wànggu. Àmbu jia pa-kawawaku-dumunya hawutu. 3Raï ai duna hi jia patingingu biana yiana na banjaru, hi da-pànjangu patuu ma-akatu, hi lupa ku-manjabili-ya na pawuku-nggu ka pa-hanggàmaru-ha nyuda pa-jàngapu-nya na pawunda-da na ma-akatu,” wàna.
4I MIRI na-paràha-ngga ka tuna yia na pa-patàkangu-ha, “Nyungga, MIRI, mbàda wua-nggunggaika pareta kai karadaku-ngga Nyungga dàngu kai wànja da ukunggu da pambàda wua-ngguggai nyimi. 5Màta kai patingi-mbunja bàdi jàka nggàra wàda da atanggu, da wunangu da papalewa nainggu lai nyimi. Ba tuna ndai bihua nyimi pa-patingi-nja nyuda. 6Jàka jiapa-makai bai patidungu, napa na uma ngia pa-lumungu yiana ku-palua-nya lima hamana la Hilu,#Hilu: tàngaru-ya la 7:12-15. hi lupa mbuu ndàbana na banjaru la pinu tana da-ràtungu wànya na tamuna na paraingu Yeruhali,” wàna.
7Mbuu ndàbada da papanii-nggu la Uma Ala darongu-maya paraï ba hapajia-ha da ratu, ba hapajia-ha da wunangu dàngu na rayatu. 8Ba ku-palundu-kinyaka pa-pakada-nya mbuu ndàbana na pa-patàkangu ba wàna i MIRI hama tuna na pareta pawua-na, ka yàpa-danggaka pa-kariangu warangu-da, “Lupa umetima bàdi!” wàdangga. 9“Mutoru mbeni pàku nyumu papanii bau palata-nya la tamuna i MIRI, ba hama tuna la Hilu napa yiana na Umana, dàngu ba pa-pamolu-nya napa yiana na paraingu hi nanjadi pangia panda ngiangu, ba wàmu,” wàdangga. Nu ka karunggi-nanggaka paraï tau dangu.
10Ba darongu-ka da mapawai ngaba la pareta Yahunda rukuna nuna na matumbu, lu manyamalu-danyaka paluhu welingu la uma hanganji hi dalua la Umana i Miri, tàka hi da-mandapu la Pindu Bokulu Bidi. 11Ba hapajia-ha da ratu dàngu da wunangu dapanii-nja nuda da mapawai ngaba dàngu na rayatu, “Huku pameti-maya bàdi na tau yiana, nadu ba mbàda tungu-naka kareuku-na na ma-ndubaku-ya yiana na paraingu-nda. Mbàda rongu wiki-mami-nyaka nyimi,” wàdanja.
12Hàla hi kupanii nyungga, “I MIRI-ma na ma-palewa-ka pa-patàka-nya na pa-patàkangu ba wàna na ma-ndubaku-ya na Umana i Miri dàngu na paraingu yiana hama tuna na parongu-mi. 13Jia ba tuna panjilu-nyawa na huri lurimi dàngu da pawunda-mi; karadaku-nyawa i MIRI Alami, ka na manjabili-ya na pawuku-na la pa-pahanggàmaru-kai nyimi. 14Jàka jiaya na wikinggu nyungga, nimangga-ka la kuaha-mi nyimi la pawunda-ya jàka nggàraya na pambuha-mi. 15Na nyuna namuya, jàka mi-pameti-ka nyungga, nyimi dàngu na ma-mandapu-nya na paraingu yiana napa tanggu-minyaka na njala bai pameti-ya na tau manda njala. Nadu, ba i MIRI-maka na ma-palewa-ka la papanii hahanggai nyimi,” wàna.
16Ba hapajia-ha da mapawai ngaba la pareta dàngu na rayatu dapanii-nja da ratu dàngu da wunangu, “Na tau yiana panii-nanya la tamuna i MIRI Alanda, nda ràka-ana jàka huku pameti-ya,” wàda.
17Hàlaka nu, ba mapira-ha la hongada da liku uru banjaru da-ndàharungu la hangga hi dapanii dànja da tau da mapauhi lai nu, 18“Ba hanganji-ya i Hihikia la Yahunda, i Wunangu Mika welingu la Morehitu na-patàka-nya na rayatu na pulungu yiana welingu lai MIRI Mahupu-mbiha,
‘Na Hiungu napa pa-kabanda-ya hama tuna woka,
na Yeruhali napa pabundu kanànda-yaka,
dàngu na Tandula Umana i MIRI napa omangu-yaka,’ wàna.
19Ba tuna i Hanganji Hihikia dàngu tau Yahunda nda da-pameti-aya i Mika. Ka mangàdatu-nanyaka i MIRI nyuna i Hihikia hi na kamahingu ka namila-nya eti. Ka yàlitu-nanyaka paraïna i MIRI na pangàdungu-na la pa-pahanggàmaru-ha nyuda. Tàka nàhu, hawutu-amaka làti hi nda ta-patàka-nya na pa-hanggàmaru wàngu la wikinda nyuta,” wàda.
20Nimbunyai handàkangu na haàtu na tau na mapanii ndubaku-ya na paraingu dàngu na banjaru yiana la tamuna i MIRI, hama tuna nu nàhu nyungga. Na tau nuna jiaya i Uria anana i Hamaya welingu la Kiriyàtu-Yiaarimu. 21Ba narongu-ka i Hanganji Yuyakimu hamanai da parawira-na dàngu ba hapajia-ha da mapawai ngaba la pareta nu da papanii-na i Uria, patikingu-nanyaka na hanganji la pa-pameti-ya. Tàka narongu-ka i Uria na rukuna nuna ka mangàdatu-nanyaka hi napalai la Mehiru. 22Tàka i Hanganji Yuyakimu hi na-palewa-ya i Elinatàngu anana i Àkumburu anguda ba mapira-ha da tau hawiangu palua la Mehiru papiti-ya i Uria. 23Hi dakaria belinya lai Hanganji Yuyakimu. Tunaka nu na hanganji hi na-paràhangu pa-pameti-ya, na metina hi wàrunya la pangia reti tau dangu.
24Nàhu nyuna ruku pa-ndulangu-na i Ahikàmu anana i Hapàngu, nyungga Yerimia nda pawua-aka la rayatu la pa-pameti-ka.
Currently Selected:
YERIMIA 26: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
