YERIMIA 1

1Na ihina na mbuku yiana jiaha da paniina i Yerimia anana i Hilikia, na haàtu ratu welingu la paraingu Anatutu la ngaba Mbanyamingu. 2I MIRI napanii lai Yerimia la ndaungu hakambulu tailu ba na-katangu pareta i Yuhia anana i Amungu hanganji Yahunda. 3Hàlaka nu i MIRI nda na-pambirangu bia pahili panii dànya, piti welingu la rehi pareta-na i Yuyakimu anana i Yuhia lupa la ndaungu hakambulu hau la rehi pareta-na i Hendikia anana i Yuhia. La wulangu lima la ndaungu nuna jia-duyaka na rehi paleli-nanya na tau na mangia-nya la Yeruhali ba ngàndiha la ngia pawàrungu-ha.

Na ngera paaunya i Yerimia

4I MIRI napanii lai nyungga, 5“Ndedimbu kuwulu-kau la kambu inamu, dàngu ba ndedi mudedi nyumu mbàda pindinggu-nggauka la patukau wunangu la ba - banjaru,” wàna.

6Kuhema nyungga, “Dou MIRI Mahupu-jangga, nda kupingua duku pa-kareuku nadu nyungga ba lalu kanguraku-nggupa,” hi wànggu.

7Tàka nahema i MIRI, “Àmbu pekadu nyumu ba lalu kanguraku-mu. Jàka ku-palewa-kau nyumu lai nggamu bia, mulaku-ma bàdi dàngu mbuu ndàbana na papanii ba wànggunggau, mu-patàka-manya bàdi lai nyuda. 8Àmbu mangàdatu-dunja, nadu Nyungga ba ndutu-manggunggau la pa-katindi-kau. Nyungga, MIRI, mambàda panii!” wàna.

9Hàlaka patuna nu, i MIRI na-pajola-nya na limana, hi nadàmaya na ngarunggu, hàla hi napanii, “Patingi-nja dàngu bobaru-ha da pulungu da patiki-nggu yiada. 10La lodu nàhu nyumu kuwua-nggau kuaha la ba - banjaru dàngu la pa-hanganji - pa-hanganji la pa-panjoru-ha dàngu la pa-nyungguru-ha, la pakilu-nja dàngu la pa-palàjaru-ha, la pa-pahadangu dàngu pa-pamula,” wàna.

Da paita ba dua ngiada

11I MIRI na-paàrangga, “Nggàraya na paita-mu Yerimia?” wànangga.

Kunapa-ya nyungga, “Kuitangu kahanga pingi ai mbandamu, MIRI,” wànggu.

12“Tubangu-ma,” wàna i MIRI, “Nyungga kumangga#kumangga; na lawiti kareuku yiana hama linguna na lawiti kareuku Imbarani: “badam”. hàlanya na papanii-nggu ka na-patutungu wànggu,” wàna.

13Hàla, i MIRI nahili paàra-ngga, “Hili nggàrayai na paita-mu?” wànangga.

Kuhema nyungga, “La mbara dia ku-itangu wurungu maningu ihingu, ba talànga wura kanggàhaku-na, natika pa-hanggubalu hanggangu yiahu,” wànggunya.

14I MIRI napanii, “Weli diangu napa wuha-nanyaka na hanggàmaru na ma-handauni hàlaya na ma-mandapu-nya na tana yiana. 15Napa Nyungga ku-paràha-nya mbuu ndàbana na ba - banjaru weli diangu pamai pa-kuaha-ya na Yeruhali. Da kangeli da ma-winggiru-nya na paraingu yiana hamanai da pindu bokulu-na, dàngu mbuu ndàbada da paraingu la Yahunda napa dawàhi-ha. 16Napa Nyungga kuhuku-nya na banjaru-nggu, nadu nyuda ba danjala dàngu ba da-taluru-ngga. Nyuda da-maraku-njaka kameti da marapu - marapu, dàngu dapandoi-ka kahala hada hi da-marubuku-nja. 17Rima hahangu padua, Yerimia! Luawa kau patàka-nja nyuda, mbuu ndàbada da papanii ba wanggunggau. Àmbu mangàdatu-dunja, ka àmbu kuhilu rihi pa-mangàdatu-dukau bau hangganja nyuda. 18-19Patingingu! Napa dapapa-nggau nyumu paraïda da ma-mandapu-nya na tana yiana, nu da hanganji Yahunda, da ngara ma-katangu pareta, da ngara ratu, dàngu na rayatu. Na nyuna la lodu nàhu wuanggu-nggauka pa-kapàru wàngu la palawa-nja nyuda. Napa nyumu beri hama paraingu pa-tindingu-kau, hama kambaniru bàhi, dàngu kangeli wudu. Nda damàka-a nyuda patalu-kau nyumu, nadu napa Nyungga ku-karianggau la pa-kahiri-kau. Nyungga, MIRI, mambàda panii,” wàna.

Currently Selected:

YERIMIA 1: KAM

Highlight

Copy

Compare