YAHAYA 54
54
Na mbuhangu-na i Ala la Ihirailu
1Ha Yeruhali, àmangu hama kawini-mbutakau nyumu
na manda peku la pa-paana.
Tàka nàhu payaa aunguwa,
dàngu ludu hawola-wa!
Nadu da anamu ba kanjupu danguha,
rihi-nyapa na kawini panda wàru lei.
2Palera-njawa da maü tera ngia pa-ngiangu-mu;
pamalai-ha da likuda dàngu pamàndu-nja da kanditiku-da!
3Napa mu-bonjangu pa-lerangu la kawana dàngu la kalai,
da ma-mandapu-nggau napa da-mandapu-nja da tanada da banjaru
hi dangia-nja da paraingu-da ma-malinggitu kahàna la rehi nàhu.
4Àmbu mangàdatu, nyumu napa nda pahili pa-makia-akaupa;
nda pa-paakangu-akaupa hiu kamakihu.
Napa nyumu mu-maromba-nya na nda tuturu-mu ba bidi taukau;
dàngu ndau namu-ayapa na didi mehakau ba kawini meti leikau.
5Na ma-padika-nggau beri lei-munyaka,
i Ala matua la Ihirailu jiaya na ma-pamàna-nggau.
I MIRI Mahupu-mbiha nuya na tamuna,
Nyuna Ala ma-kuaha pa-nggubulu awangu-ya.
6Ha Ihirailu, nyumu beri bidi kawini papaha-kau
na ma-hawina ba na-dunjaku-nya leina.
Tàka i Ala napaau beli-nggauka
hi napanii tuna yia,
7“Ana hambàdiku-ana ba kutuu kajia-kau nyumu;
tàka wàngu kanjupu mbuha-nggunggau kupiti belikau.
8Ndedi pira mandai-ana ba ku-handaluru-nggau nyumu
ruku mbumbaru-na na ma-karaü.
Tàka wàngu mbuhangu ma-palupangu ba kumbuha-nggau nyumu,” wàna.
Nuya na paniina i Ala ma-pamàna-nggau.
9“Hama tuna la rehina i Nuhu ba ku-paràndingu
ba nda nahilu lumburu-anyapa iwa obungu na pinu tana,
tuna numbu nàhu ba kuràndi-ya ba nda kuhilu mbeni
jàka ndia la pahilu pangàdu-nggai nyimi.
10Jiapa-kai ka da-yoyangu da palindi dàngu da tandula,
nda jia jiaka-anggu la pambuha-nggau nyumu.
Na pa-njanjingu la pa-papeku na patura-nggu ku-pamàndu-manya duku,”
wàna i MIRI na mambuha-nggau nyumu.
Na Yeruhali bidi
11Napanii i MIRI,
“Ha Yeruhali paraingu maura dedimu,
dira-mamuka dàngu nda ningua ma-panggaüru-kau.
Napa kutuu beliha da latamu,
wàngu watu ma-pawilingu.
12Da tindingu-mu napa ku-pahada wànja watu ndalima,
da pindu bokulu-mu kuwànja watu kalilangu,
da kangeli-mu kuwànja ma - màtu watu itangu.
13Mbuu ndàbada da ma-mandapu-nggau jia-haka da pa-ajaru-nggu,
napa nyuda daluri mbokaru daluri peku.
14Nyumu pa-pahadangu-kau la lata ma-padeningu,
pa-pamarau-kau welingu la bàrangu dàngu la ma-pakapidihu.
15Jàka era ningu ma-kaluluku-nggau, nda Nyungga-a ma-paràha-nya,
nggamu biaya na ma-tàndalu-kau jiangu-ma na-hanggubalu.
16Nyunggama ma-padikangu tukangu bàhi
na ma-hailaru epi la patuku madàka.
Nyunggama mawulu-ha da panjuri
da mawànja nuda da madàka la pa-pameti tau.
17Na nyuna nimbihu-da da madàka da patuku ka ndubaku-kau nyumu,
nda jia luhungu-ada.
Dàngu nimbihu-da da pa-panjala wàngukau la hangga ma-patandangu ngera
napa mu-wuangu-ma dumu mbuti ba njala-danya.
Napa Nyungga kuwua juanja patalu
wàngu da atanggu,”
nuya napanii-na i MIRI.
Currently Selected:
YAHAYA 54: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
