YAHAYA 55
55
I MIRI na-kamahingu pa-wuangu mila etina
1Napanii i MIRI,
“Mai ndàbawa dimi nyimi mamadau,
unungu-wa, ninguma wai.
Maiwa dimi nyimi manda ningu àmahungu,
keiwa uhu nggàndumu panda
mbayaru dàngu nganguwa!
Ninguma wai angguru dàngu wai huhu,
kei jua-hawa.
2Nggàra ihi wàngu hi kei ngga - nggàra manda nggàna la eti,
dàngu nggàra ihi wàngu hi ràma panda mbihu wàngu?
Tundu-nyawa na pareta-nggu, napa minganya na mahàmu,
dàngu hi mupàda-nya na pangangu na mapali mangàba.
3Rongu dimi, ha banjaru-nggu, maiwa lai Nyungga,
napa kuwua-nggainya na luri na ma-langatàka.
Lumuna na mbuhangu dàngu na tuturu panjanji-nggunya i Ndautu,
kutura pa-njanjingu ma-palupangu dàngu nyimi.
4Langatàka, kutuya nyuna liku uru dàngu mini la ngora,
ma-hakahii-nya na kuaha-nggu la ba - banjaru.
5Napa mipaau-nja da ba - banjaru hangàdangu,
hi daluma rengga papamai lai nyimi,
lumunggu Nyungga, MIRI Alami, Ala matua Ihirailu,
nadu ba mbàda pa-bokulu-nggunggaika,” wàna.
6Beliwa lai MIRI la ngala ba napeku-ipa;
kamahi-nyawa Nyuna la ngala ba na-mareni-ipa.
7Màlawa na tau akatu ka na-pahàmu-ya na lurina,
dàngu ka na-panjilu-nya na katiku halaku kanandingu-na.
Màtawa ka nabeli lai MIRI,
ka nangala-nya na paaï panamungu-na Nyuna.
Màlawa ka na-pambelingu la Alanda nyuta,
nàdu ba namàja i MIRI la pa-jàmangu njala.
8Napanii i MIRI, “Na pangàdangu-nggu nda pangàdangu-mu nyumu-aya,
na àndanggu nda àndamu nyumu-aya.
9Hama tuna na janggana na awangu welingu la pinu tana,
tuna numbu na janggana na pangàdangu-nggu welingu la pangàdangu-mu,
dàngu na àndanggu welingu la àndamu.
10Hama tuna na urangu na mapuru welingu la awangu, ba nda nahilu beli,
tàka na-pambaha-ya na tana,
na-pakamboka-ha dàngu na-patumbu-ha da pa-tondungu,
natuu wuana na pa-hàbarungu napa dàngu na pangangu,
11tuna numbu na pulunggu na maluhu welingu la ngarunggu
ba nda nabeli jua lai Nyungga,
tàka na-ngalangu pawunda-ya jàka nggàraya na pambuha-nggu,
natàka-nja mbuu ndàba da pawuku-nggu.
12Napa nyimi mi-dunjaku-nya la Mbambilu ba dàngu hawola-mi,
hi karia-nggai paluhu dàngu mànjaku.
Da palindi dàngu da tandula da-hanggela dàngu hi dawara da-kayaka,
da pingi ai la woka da-kapòkukungu lima.
13Da pingi kajiu napa dahilu-ha da pingi rii madàka,
da pingi wàla mbunga dahilu-ha da wuku jemi.
Nu hi tuna nu ka bobaru pakada-ngga Nyungga;
ka tanda ma-palupangu manda mbulangu-ya,” wàna.
Currently Selected:
YAHAYA 55: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
