YAHAYA 44
44
I MIRI, Ala Mahupu-kamehangu-ya
1Napanii i MIRI, “Ronguwa, ha Yakupu, atanggu,
ha Ihirailu, banjaru papindi-nggu!
2Nyunggama MIRI, mawulu-kau nyumu,
ma-unggulu-kau nyumu piti welingu ba la kambukau,
dàngu mandula-kau nyumu.
Àmbu mangàdatu, nyumu-maka atanggu,
banjaru papindi-nggu na pambuha-nggu.
3Nadu napa ku-paliri-nya wai na tana màdu,
dàngu ku-pahaliru-nya luku na tana ma-marokutu.
Napa kuwua-ya na kuaha-nggu la wàla wuamu,
dàngu ku-pakanyuru-nja da ana umbuku-mu.
4Napa nyuda datumbu kamboka hama tuna rumba la lihi wai,
hama tuna pingi langira la hingi luku.
5Napeka mara haàtungu napa na tau ba mangunggu Nyunggaha nyuda,
dàngu damai pa-pambulungu dàngu na wàla wuana i Yakupu.
Nimbihu-da da-tulihu-ya la limada: Manguna i MIRI,
dàngu dapeka wikida ba angu banjaru-na i Alaha,” wàna.
6Yiana-ya na puluna i MIRI Mahupu-mbiha,
Hanganji dàngu maopa-nya na Ihirailu,
“Nyungga Ala Mahupu-kamehangu-ka,
ma-kawunga dàngu ma-malamiri.
7Nggamu mahama-ngga Nyungga? Paràha-nya ka napeka!
Màtawa ka na-paloha-nya dàngu ka nawua-ngga mbuti!
Nggamu na ma-manyura-nya na rehi na manàmu-nya
piti welingu la kawunga-na lundu hupu njàpu rehi?#La lawiti Imbarani-na nda na-lohangu-a jàka nggàra wàna na ndalaru yiana.
8Ha banjaru-nggu, àmbu mangàdatu jàka ndia àmbu kandaudaku;
ka ndau pianya weli ndaingu lundu nàhu
ba mbàda nyura-nggunya jàka nggàraya na manjadi?
Nyimi-maka hakahii-nggu.
Ma-opangu hawiangu nda ningua
dàngu nda kutanda-a,” wàna.
Lumungu kahala hada pawunda maànga-ya
9Da tau da ma-pandoi kahala hada marapu nda ningua linguda dàngu da marapu palumu-da nda ningua linguda. Da malumu-nja da kahala hada nuda tau pokiha dàngu nda ana nggàra-a papida jia-duyaka hi da-handauningu pa-makia wàngu. 10Kahewa-maana ba pandoi kahala hada palala, tàka hi lumunja ba pa-marapu-ha! 11Langatàka, mbuu ndàbada da ma-lumungu kahala hada da-handauningu pa-makia wàngu. Da tau ma-pandoi-ha da kahala hada, tau àtalu tauha-kàdu. Paràha-nja ka da-ndàharu pa-kariangu; jiangu-ma napa da-mangàdatu dàngu da-makia.
12Na tukangu bàhi napiti hakadipu bàhi, hàla hi na-pandoi-ya la epi hi napàha wànya pàha. Nawua hàlaya na àtalu-na ba naràma-ya. Nu ba talànga ràmana, na manjuu, na madau dàngu nanjili.
13Na tukangu ai na-hukutu-ya na ai. Na huratu-ya na hadana wàngu kapu, na-paruku - paruku wànya paràma wàna, hi na-pandoi-ya kahala hada ma-panggepingu, hàla hi na-bànjalu-ya daa la umana. 14Talànga wanguna na ai na pawàna ma-pawelingu la pingi kajiu-ya, pingi eru jàka ndia pingi tarambatingu da papunggu-na la omangu. Talànga wanguna na-pamula-mbu ai lobungu, hàla na-patiangu lundu puruna na urangu na ma-pakalunga-ya. 15-17Hawiangu welingu nuna na ai natuya ai mutungu ba nadiru wàngu epi dàngu natunu wàngu roti jàka ndia na-handarangu wàngu tolungu, hàla hoda-nanyaka. Diru-nanyaka hi napanii, “Aiha, hàmu ailulu dàngu mamitu-yaka. Langatàka nanggàna la eti na epi yiana!” wàna. Na rihina na ai nuna tu-nanyaka pa-pandoi wàna kahala hada. Na-karuduku pa-marubuku-nya dàngu na-hamaya-nya, “Nyumu ala-nggunggau, pamàna-nggawa!” wàna.
18Lalu mbana ndubaha da tau tungu nu. Da-kapuda-maanja da matada dàngu da etida hi lupa nda nggàra ndoku pa-jàngapu-da la kanandingu-da. 19Na ma-pandoi-ya nu na kahala tau nda natoma-ma la pa-kanandi-nya, “Nuna na ai ku-pamutu-nya hawiangu, tàka na wàla epina kutunu wànya roti dàngu ku-handara wànya tolungu pangaa-nggu. Tàka na rihina nuna na ai, ku-pandoi kahala hada. Jia ba tuna, nàhu marubuku-nggunya na hakadipu ai!” nda wàna-a la kanandingu-na.
20Nu ba tuna nu hama-maana ba nangangu aü. Na tau nuna na-panjàra-nya paraï kanandingu ndubana, hi nda peku-anapa la pandula-ya. Nda na-duluku-a papeka-ya ba lii panyonga-ya nuna na kahala hada na maninya la limana.
I MIRI, ma-padikangu dàngu ma-pamànangu-ya
21Napanii i MIRI,
“Namu ndàbaha yiada, ha Ihirailu,
ba nyumudu atanggu.
Nyungga ma-unggulu-kau nyumu, tàka nyumu ata-nggunggau,
Ihirailu, nda jia maromba-angunggau!
22Da njalamu ku-payila-nja hama tuna karumangu,
da ndokumu ku-waura-ha hama tuna hambongu.
Beliwa lai Nyungga,
nadu ba mbàda pamara-nggunggauka!” wàna.
23Kayaka hawola-wa, ha awangu,
payaa aunguwa ha unu tana!
Kayaka hawola-wa ha palindi!
ha omangu-mbu dàngu nimbihu-da da pingi aina!
Nadu i MIRI na-paitangu-yaka na mangunju-na
ba na-palohu hi pahàla-ya na Ihirailu banjaru-na.
24Tuna yia na paniina i MIRI ma-pamàna-nggau
na ma-unggulu-kau nyumu piti welingu ba la kambukau,
“Nyungga MIRI-ka, ma-padika hàlanya,
ma-palàmbaru mehanya na awangu,
ba dàngu nda ningu ma-pambapangu ba padika-nya na pinu tana.
25Nyungga ma-pabeta-nya na panyura ma-manyura,
dàngu ma-pajulu wànja da ma-manyura.
Da pulu tau manggàna ku-pandia-ha,
na manggàna-da ku-palua-ya la nduba.
26Nyungga ma-paundu-nya na paniina na atanggu,
dàngu ma-paloku-ya na pa-pakaka-nggu papeka-da da papalewa-nggu,
kupanii Nyungga ba pahili ngiangu-ya napa na Yeruhali,
dàngu ba kutura beliha napa da paraingu Yahunda;
da kanànda-da ku-pahàmu beliha napa.
27Nyungga mapanii-nya na lata tehiku: Tambirihu-wa!
Ka ku-pamihi-ha da lukumu, wàngguka.
28Nyungga mapanii-nya i Korihu,
‘Nyumuka napa ma-pareta hurunggu Nyungga,
dàngu ma-paloku-ha mbuu ndàba da pambuha-nggu.
Wuangu-wa pareta ka hili pahada belinya na Yeruhali,
dàngu na Umana i Miri ka tunya latana,’ ” wàna.
Currently Selected:
YAHAYA 44: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
