YAHAYA 21

Na paita ruku na tanyànggaru-na la Mbambilu

1Yiana-ya na lii langu na ngerana na Mbambilu: Hama tuna na ngilu kaputi ahu na makanduu ba na-pàlaku maràda wara, tuna nu na tàkana na ura pàda welingu la paraingu ma-mbàringu. 2Nyungga kuita-ya la harii mata rukuna na matumbu - matumbu na pa-mangginggitungu; rukuna na makei kuu dàngu na ma-patàlaru.

Ndàharangu-wa, ha tanatara Elàmu, kaluluku-wa! Ha tanatara Mandai, nggupulu-wa. I Ala panjàpu-nanyaka napa na mayila na paruku-na na Mbambilu.

3Nu na harii mata na pambingu-ka hi lupa nda peku ita nda peku rongu-anggupa. Dira mangàdatu dàngu dira katiu-ka hama tuna kawini na ma-talànga paana. 4Naliu laü na etinggu; paraï pa-mangàdatu jia hi kunggai ridu. Na rudungu parinju-nggu tàka hi ngàndi-nangga panggai ridu wàngu bia.

5Kuita-mbuya na pamangu mbabu na pambàda pa-yemangu, da ngia pa-mandapu-na na pa-dundangu ningu-maka. Nyuda ngangu ngunungu-danyaka. Tàka hi jia rongu biada pareta, “Ha dimi parawira! Rimanja da temingu-mi!” na mawàna.

6Hàla panii-nanyaka i MIRI lai nyungga, “Lakuwa kau bànjalu haàtu tau madai la uma dai dàngu paràha-nya ka na-patàka-nya jàka nggàraya na paita-na. 7Jàka na-itangu pamba la njara da mamai madua - madua, da pamba ma-kaliti kalandai dàngu ota, màta ka na-hamata pahàmu-nja,” wàna.

8Tunaka nu na madai#Na hau pa-haleli ndai: na madai; Imbarani: hinga. ka nawara, “Miri, nyungga mbàda daingguka rudungu lodu,” wàna.

9Tàngaru, jia-duhaka nyuda! Da pamba la njara da mamai madua - madua. Tunaka nu na madai nahili panii, “Nanjoru-ka na Mbambilu! Da kahala hada palumu-da da-kaweraku tapàlangu la tana,” wàna.

10Oi banjaru-nggu Ihirailu! Nyumu mbàda papari - rinakau-ka hama tuna na karohu uhu nggàndumu. Nàhu ku-patàka-nggau lii langu hàmu na parongu-nggu welingu lai MIRI Mahupu-mbiha, na Ala Ihirailu.

Na nyuraya ngerana na Endumu

11Tuna yia na lii langu ngerana na Endumu.

Ningu tau mawara-ngga welingu la Endumu, “Ha, madai, namandai-pa nàhu na rudungu? Pira njàmu-napa ba ndedi nambaru?” wàna.

12Kuhemaya, “Na mbaru napa nàmunya, tàka na rudungu-mbu. Jàka mu-mbuhangu pa-paàrangu, mai bia kau paàrangu-ki,” wànggunya.

Na nyuraya ngerana na Arapu

13Yiana-ya na lii langu ngerana na Arapu:

Ha, tau Ndendàngu, da pajuru danggangu-mu da-pamaüngu la tana Arapu la ma-pajemingu. 14Ha mangia-nya na tana Tema, wuanja pa-unungu da tau mamadau da mamai lai nyumu dàngu wuanja pangangu da ngara ma-lelingu. 15Nadu nyuda ba mbàda palai-daka welingu la hapanda pa-binjiru, welingu la pàndi pa-pandàngi, dàngu welingu la pabera na ma-mbàringu.

16Hàla panii-nanyaka i MIRI lai nyungga, “Hau ndau tuda-kia-naka na talu mehada da banjaru Kendàru ba nanjàpu. 17Da mini pana Kendàru tau marihi kaborangu-ha. Ba tuna ana hawutu-ada welingu lai nyuda napa da mamara. Nyungga, MIRI Ala Ihirailu mambàda panii,” wàna.

Currently Selected:

YAHAYA 21: KAM

Highlight

Copy

Compare