YAHAYA 22

Na panyura ngerana la Yeruhali

1Yiana-yaka na lii langu ngerana la Lolangu Harii mata:

Ha, mangia-nya la Yeruhali, nggikina nyimi hi mihei la toku ndidu uma?#toku ndidu uma; Tàngaru-ya la 15:3. 2Nda ràka-ana na nggubulu paraingu ba naremi dàngu ba na-kayaka kakàlaku mbaha eti.

Nadu da mini mbeni hanggangu-mi da mameti la pabera nda metida ba dapakangaburu-a. 3Mbuu ndàbada da liku-urumi mbàda palai-daka dàngu pa-tanawangu-haka dàngu ndedi tungudu haumbu ana pana. Mbuu ndàba da tau kapàru-mi pa-tanawangu-mbuha jiapa ka mbàda palai marauda. 4Àmbi ihi lingga nyungga; pahia biangga nyungga ka ku-paduduru-nja da tau welingu la banjaru-nggu da mameti. Àmbi kamangu-du paomba-ka. 5Tubangu-ma, i MIRI Mahupu-jangga dàngu Mahupu-mbiha mbàda kawuku-mana-nyaka na lodu yiana ba lodu pariu raüngu-ya, lodu kanggupuku dàngu lodu kanyaüru-ya la Lolangu Harii mata. Da kangeli paraingu pa-nyungguru-haka. Natalia wara karai pa-ndulangu parongu-ya la tandula - tandula.

6Da tau Hiria damai la njara dàngu kareta pabera, da tau Elàmu da-dàkangu pàndi dàngu pana. Da tau Kiru da-payemangu temingu-da. 7Da lolangu kamboka la Yahunda dambinu wànguka kareta pabera. Da pamba la njara rimangu-da padua la ngaru pindu boku - pindu bokulu la Yeruhali. 8Nggubulu-na na ngia pa-torungu-na na Yahunda da-tanyungguru.

La rehi nuna, hamata-miha da dàka pabera la kuru madàka. 9-10Nyimi hunggu-minjaka da maràta - ràta la kangeli Yeruhali da paràka pa-pahàmu. Nyimi ihamata ndàbaha da uma la Yeruhali, mi-nyànggaru-ha ba nda pirada la hongada tàka da watuda hi mi-pahàmu wànja da kangeli paraingu. Ka pa-uhingu wai, 11nyimi mi-pandoi ma-patàmangu daa la paraingu dàngu hi pandema-nya na wai welingu la ma-patàma memangu. Tàka nyimi ndai eti wànya i Ala ba mandai-manaka la pa-pakaka-nya nuna mbuu ndàbana dàngu hi kiri tumbuna nuna.

12La rehi nu i MIRI Mahupu-jangga dàngu Mahupu-mbiha na-paràha-nggai kai hii dàngu kai pa-dudurungu, kai kikiru-ha da katiku-mi dàngu kai kalambungu hinggi karungu. 13Tàka na nyuna, nyimi hawola-minya dàngu remi pàku-minya. Hambàli-minya mbimbi dàngu hapi hi ingangu tolungu dàngu unu-minya wai angguru bai warangu, “Maiwa ka tangangu ka ta-ngunungu, nadu haromu ba meti-ndanyaka!” wàmi.

14I MIRI Mahupu-jangga dàngu na Mahupumbiha na-pawuwangu wikina lai nyungga hi napanii-ngga, “Langatàka, na akatu-da nyuda nda kujàma-anja lundu dameti. Nyungga, MIRI, mambàda panii,” wàna.

Ba panamu-nya na Hepuna

15I MIRI Mahupu-jangga dàngu Mahupu-mbiha na-paràha-ngga palua lai Hepuna na kapala la kuru uma hanganji, la pa-patàka-nya yiana na liina i MIRI, 16“Bau kaka wikimu, nyumu na nggamukau? Nggàra hàku-muka hi mukobu retimu la palindi watu? 17-18Rimangu, nyumu napa kuwàru pamarau - raukau. Nyungga napa ku-njàkilu-kau dàngu kukulu-kuluru-nggau hi kukilu - kilunggau hanggangu la parai bokulu hama tuna mbola. Lai nu nyumu hi mumeti la karaha-da da kareta pa-hamela wàmu. Nyumu mbàda pairaku-munyaka na tamu kuru uma mirimu. 19Jia-duyaka nu nyumu hi ku-pukalu-kau dàngu hi ku-papuru-nggau welingu la pànggatu-mu na majangga.

20La rehi nu napa kupaau-nya na atanggu i Eliyakimu anana i Hilikia. 21Da paki ràmamu dàngu da boru bànggimu napa ku-panggàna-nya nyuna. Mbuu ndàbada da kuaha-mu napa ku-pakata-nja lai nyuna. Nyuna napa ama-danyaka paraï da mangia-nya la Yeruhali dàngu Yahunda. 22Nyunaka napa na ma-kuaha lundungu la wawa hanganji wàlana i Ndautu. Nyuna napa na makata-nya na kuhi pa-hanganji. Nyuna jàka na-bunggahu-haka nda ningu-apa mamàka pa-pandàbi-nya, tàka jàka na-pandàbi-nyaka, nda ningua mamàka pa-bunggahu-ya. 23Nyuna napa kuwua-nya pa-mandapu ma-undungu hama tuna na paku na papaku pa-undungu la dindingu. Nggubulu-da da kuru umana patembi ndàbaha rukuna nyuna.

24Tàka da nua kalembi-na dàngu da patanggu-na napa jia-haka da bukuna. Nyuda napa da-kanderungu-maaka lai nyuna, hama tuna na wurungu na-patiwalungu la paku. 25Jàka tunaka nu, napa na paku na papaku pa-undungu, napa tambukalu-nanyaka duna hi na-kanabu. Dàngu nuna jia-yaka na dirana na nua kalembi-na hamanai mbuu ndàbana na ma-kanderungu lai nyuna. Nyungga, MIRI, mambàda panii,” wàna.

Currently Selected:

YAHAYA 22: KAM

Highlight

Copy

Compare