HANGGAI 2
2
Na mangarangu-na na Umana i MIRI na mabidi
1La tànggalu dua kambulu hau, wulangu pihu la ndaungu nuna, nahili panii i MIRI la ngaruna i Wunangu Hanggai. 2I MIRI na-paràha-nya i Hanggai papanii-nya i Nggumbunuru Herumbambilu, i Ratu Bokulu Yuhua, hamangui na rayatu, ka patàka-nya na lii langu yiana, 3“Ningu la hongami nyimi manamu-yapa jàka nggi tuna mangarangu-na yiana na Umanggu àmangu? Tàka nàhu nggikina na hadana, wàmi? Nda ana palii eti ndoku-ana? wàngguka. 4Na nyuna, àmbu jia mbota monungu dimi, ha nyimi nggubulu-mi! Pangala bianya na paràma, ba pa-dàingu ndula-manggunggai. 5Bai luhu welingu la Mehiru, mbàda njanji-manggu-nyaka la paopa-nggai nyimi. Tàka nàhu opa-manggu-nggaipa nyimi. Ba tuna, àmbu nggàradu pa-mangàdatu-mi.
6La rehi na ma-dànggitu napa kuyoya-nya na awangu dàngu na tana, na mara dàngu na tehiku. 7Napa ku-pakanggupuku-ya mbuu ndàba na banjaru, tàka da banda da malanja-da hi ngàndiha yiahu, hi lupangu na-hulungu na Umanggu wàngu pawulu-da nyuda. 8Mbuu ndàbada da àmahu marara mabara la pinu tana yiana mangunggu Nyungga-maha. 9Na Umanggu na mabidi, narihi mangarangu-pa napa welingu la ma-wungangu, dàngu lai nu napa kuwua-nya peku dàngu luri mbokaru na banjaru-nggu,” wàna. I MIRI Hupu Mambiha-ma na mambàda panii, wàna.
I Wunangu Hanggai na-pahama dànja da ratu
10La tànggalu dua kambulu patu, wulangu hiwa, la padàmbu wàna na ndaungu pareta-na i Hanganji Ndariu, nahili panii i MIRI Hupu Mambiha lai Hanggai, 11“Karai-yawa na botangu-da da ratu rukuna na lii yiana: 12Ngera hama tuna jàka ningu haàtu mapiti ha-kadipu tolungu welingu la kameti pawotu lai MIRI, hi nangàndi-ya la làpitu kalembi malaina ba nabeli-ya, hàlaka nu wàngu kalembi nuna na-jonggaru roti jàka ndia pa-manahu hangia-kai, jàka ndia angguru, jàka ndia mina haitungu, jàka ndia ngga - nggàra pangangu bia, da-matua-mbuka ihu napa nuda mbuu ndàbada?” wàmu wànanya.
Ba na-patàka-nyaka na pa-àrangu nuna i Hanggai, dahema da ratu, “Ndia-a,” wàda.
13Tunaka nu nahili pa-àrangu i Hanggai, “Ngera hama tuna jàka ningu haàtu ma-iraku rukuna ba na-jonggaru mameti, hàlaka nu hi na-jonggaru hangia welingu la pangangu nuda, na-iraku-mbuka ihu nuna na pangangu?” wànanja.
Dahema da ratu, “Jia, ka tu-manaka-duna!” wàda.
14Hàla hi nahili panii i Hanggai, “Na kalaratu nuna nanggàna-mbuya na banjaru Ihirailu la tana yiana dàngu mbuu ndàba da ihi paraï-da. Ba tuna, nggàra biaya na pawotu-da la ngia pawotu maraku-yiana jiangu-ma na-iraku, wàna i MIRI,” wànanja.
I MIRI nanjanji-ya na kanyuru-na
15Napanii i MIRI, “Màla pangàda-nya jàka nggàraya na manjadi ba ndedi tàkanya na lodu nàhu, nu ba ndedi pakiringu pa-pahàmu-ya yiana na Umanggu! Nggikina na ngerami la rehi nu? 16Ilua pa-tàngaru kanguku uhu nggàndumu dàngu ikakaya, napa ingalangu dua ngahu kilu, tàka hi 100 kilu anai. Ilua pataku 100 litaru angguru welingu la tongu angguru, tàka na maninya 40 litaru anai. 17Mbàda papuru-nggunyaka na ngilu mbana dàngu na ura watu mboka pa-pakabu-ha mbuu ndàba da ihi wokami, tàka nyimi ndai bihumbu pabeli lai Nyungga. 18La lodu nàhu, la tànggalu dua kambulu patu wulangu hiwa, mbàda lundungu-naka ba tuya na latana na Umanggu! Hamata-ya jàka nggàraya napa na manjadi piti welingu la rehi nàhu. 19Jiapa-kai ka nda ningu-apa uhu nggàndumu marihi, dàngu ba ndedi dawua da pingi angguru, da pingi kapilitu, da pingi njalima dàngu da pingi haitungu, tàka na nyuna piti welingu la rehi nàhu ku-pakanyuru-nggai!” wànanja.
Na njanjina i MIRI lai Herumbambilu
20La lodu nuna, la tànggalu dua kambulu patu wulangu hiwa, i MIRI na-patàka-nya lii langu pa-pandua wundangu wàna i Hanggai, 21ka na-patàka-nya lai Nggumbunuru Herumbambilu. Napanii i MIRI, “Nda namandai-apa napa kuyoya-nya na awangu dàngu na tana, 22napa ku-nyungguru-ha da pa-hanganji dàngu ku-pakabu-ha da kawaha-da. Da kareta pabera dàngu da ma-kaliti-ha ku-kabeli patiri nggubulu-nja; napa dameti mbuu ndàba da njara tàka da ma-kaliti-ha napa da-pameti dua wikida. 23La lodu nuna, nyumu Herumbambilu, atanggu, napa kuwotu-kau pa-pareta wànya na tamunggu. Ba nyumu-duka pambàda lehanggu,” wàna i MIRI wàmunya. I MIRI Hupu Mambiha mambàda panii, wàna.
Currently Selected:
HANGGAI 2: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
