HAMBAKUKU 2
2
Na hemana i MIRI lai Hambakuku
1Ka kuhei la lewatu ngia pakuki-nggu wàngguka, dàngu ka kunedi-nya jàka nggàraya na papanii-nangga i MIRI, dàngu jàka nggikina wàna nahema-nanya na pangodungu-nggu.
2Tuna nu nahema-nangga i MIRI, “Huratu paloha-nyawa la kapipi tana wurungu, jàka nggàraya na papanii-nggunggau nyumu, kapeku mudana ba mbahaya. 3Ndàtaya nuna, nadu ba ndedi rehi-ananya nàhu. Na nyuna na rehi nuna lu tàka-ama-naka, dàngu jàka nggàraya nu na papanii-nggunggau nyumu jiangu-ma napa nanjadi. Jiapa-kai ka hama tuna mamandai-ya, na nyuna patiangu bia! Na rehi nuna jiangu-ma natàka dàngu nda jia panedi-anyapa. 4Dàngu namuya: Ba nda na-malundungu-a#Talànga wanguna na-njenjangu ningu-mapa ba tuna yia na ihina: nda na-malundungu-a. na tau akatu, tàka na tau na mawànya na pawuku-na i Ala napa na luri ruku tuturu-na lai Ala,” wànangga.
Na ràtungu nduma tau akatu
5Na pawulu wàngu#Na pawulu wàngu; jàka ndia: na kaleka. nakàli panyonga tau. Na tau ma-malumbangu na-abungu dàngu nda nangudu na etina. Hama tuna na meti, tuumbuna nyuna ba nda napeka dirana, da-pandutu - pandutungu da banjaru ba na-njàkapu-ha. 6Tàka mbuu ndàbada da pa-roduku-na da-payudi dàngu da-paaka-nya. Napa dapanii, “Nanggàna-kau ràtungu bau pa-uhingu malanja nda mangumu! Nggi tuu-manapa mandaina bau pawulu-ya na wikimu wàngu hàni-muha da tau ma-parutangu lai nyumu pa-mbayaru-ha da wutangu-da?” wàna.
7Tàka dàngu nda pàda-munya, nyumu mambàda rodukungu tau hawiangu, napa uparutangu-mbu dàngu pahàni-kau la pa-pambayaru-ha da anada. Napa damai da muhumu hi da-pamangàdatu-kau. Napa nyuda damai paramba-nja da pawulu-mu! 8Nyumu mbàda danguka banjaru paramba-mu, tàka na nyuna da banjaru da ma-mangalangu pa-hinggilu, napa da rambanggau nyumu, rukuna na pambàda wundamu bau pameti tau, dàngu rukuna na mbana etimu hàngganja da tana, da paraingu dàngu da ma-mandapu-nja.#da tana ... ma-mandapu-nja; jàka ndia: na ma-mandapu-nya na pinu tana dàngu da paraingu-na.
9Nanggàna-kau ràtungu! Nyumu upawulu-ya na kuru umamu wàngu utumu da pangala-mu wàngu mbana etimu, ka na mambiru meha na umamu dàngu ka na-hinggilu welingu la handuka dàngu la tàparu. 10Tàka na pa-kakangu-mu nuna pa-makia-ma-amunya na kuru umamu. Bau rambangu banjaru dangu, parunggi-munya wikimu. 11Jiapa da watu la kangeli dawa - wara paràtu-nggau nyumu, dàngu da kambaniru uma da-pawolaku-nya na wara nuna.
12Nanggàna-kau ràtungu! Nyumu mutura paraingu la lata akatu dàngu hiu pahada-nya wàngu pameti-mu tau. 13Nda ningua linguna ba dira pa-mukarungu-ha da banjaru pa-roduku-mu, dàngu mbuu ndàba da pa-pahada-da dakehi pa-mbutangu la epi. Mbuu ndàbada nuda pawuku-na i MIRI Hupu Mambiha-ya. 14Tàka na nyuna hama tuna na tehiku ba nambinu-nya wai, tuna numbu napa na pinu tana ba nambinu-nya papingu wàngu rukuna i MIRI dàngu na kawaha-na.
15Nanggàna-kau ràtungu! Bau pawawa-ha dàngu upamakia-ha da lihi umamu; upawiti-nya hi kiri mbembatu - mbembatu-da hama tuna tau maüku. 16Nàhu tàka-nanyaka na rehimu ka pa-makia-kau, dàngu nda jia-aya ka tembikau. Na patembi wàngukau na-pambeli-ya la pangia wawa wàngu. Napa nahàni-kau i MIRI pa-ngunungu la kaba wai ma-paihingu hukungu ndumamu nyumu. Napa unungu lundu maüku-mu dàngu hi mbembatu - mbembatu-mu. 17Nyumu upunggu ai la Limbanongu, tàka nàhu nyumu wikika papunggu. Nyumu upameti-ha da bandana, tàka nàhu da banda da pa-mangàdatu-kau nyumu. Mbuu ndàbada nuda da njadi rukuna na pameti-mu tau dàngu na mbana eti pambàda wundamu hanggangu la ta - tana, la parai - paraingu dàngu da ma-mandapu-nja.#ta - tana ... ma-mandapu-nja; tàngaru-ya la 2:8.
18-19Nanggàna-kau ràtungu! Nyumu mupanii dànya na kadipu ai, “Hadangu-wa!” ba wàmu, jàka ndia na hau watu bokulu, “Kidiwa!” ba wàmu. Na-ngalangu na hau kahala hada patiki-nggau ngga - nggàra? Talànga wanguna pa-padambakungu àmahu marara dàngu mabara-ya nu na kahala hada, tàka nda ningua lurina. Nggàra linguna nuna na kahala hada marapu? Nyuna pa-pandoi tau-aya. Na pangala-mu welingu lai nyuna, mbulungu ma-kambàliku ju - jua-ma-aya. Na ma-pandoi-ya na marapu kahewa-ma-ana na pawaina la ruku limana, na manda pingu pa-kareuku, wàna.
20I MIRI ninya la Umana na ma-matua; màtawa mbuu ndàba na tau la pinu tana ka pàdi wàda la hanggana Nyuna.
Currently Selected:
HAMBAKUKU 2: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
