YAHAKIALU 48

Na pa-beringu tana la kabihu - kabihu Ihirailu

1-7Na padira tana mbara dia na-tayili hanggangu la pahunga lodu, piti welingu la Tehiku Padua hanggangu la paraingu Hetilungu, na ànda tama la Hamàtu, la paraingu Hahàru-Enàngu, lundu la padira paraingu Ndamàhiku dàngu paraingu Hamàtu. Da kabihu da ma-pandàkingu yiada lupangu-ma da-ngalangu hangia welingu la tana matayilingu welingu la padira pahunga lodu hanggangu la patama lodu lundu la Tehiku Padua, tuna nu na pa-ndàkingu-da piti weli diangu hanggangu hu luru:

Ndàngu

Ahiaru

Nàputali

Manahi

Epuraïmu

Rumbingu

Yahunda

Na pangia pa-pahinggilu la puhuna nuna na tana

8Na marihi welingu la tana nuna lupangu-ma pa-kawàri-ya nduma ma-paihikungu. Na nunjuna lupangu-ma 12,5 kilu metiru piti welingu la padira mbara dia lundu hu luru. Na padira pahunga loduna dàngu patama loduna lupangu-ma da-pahama marau dàngu da kaloka pa-wuangu-ha da kabihu Ihirailu. Lai nuya napa na ngia pa-pahada ninya na Umana i MIRI.

9Hawiangu welingu la ngaba tana nuna pa-pahinggilu-ya ndumana i MIRI, nu na ha-kaloka tana maninya la puhuna na tana, 12,5 kilu metiru nunjuna dàngu hakambulu kilu metiru#Talànga wanguna na-njenjangu ningu-mapa ba tuna yia na ihina: hakambulu kilu metiru, (tàngaru-ya la 45:1); Imbarani: 5 kilu metiru. ndàbaru-na. 10La padua-na nuna na tana napa pa-pahadangu-ya na Umana i MIRI. Da ratu lupangu-ma da-ngalangu ndumada welingu la tana ma-matua nuna. Na ndumada nyuda 12,5 kilu metiru-na welingu la karaha pahunga loduna hanggangu la patama lodu, dàngu lima kilu metiru-na welingu la karaha mbara diana hanggangu hu luru. 11Na pangia pa-pahinggilu nuna napa ka manguda da ratu ana umbuku-na i Handuku-ya. Nyuda duda mbàda lumu dàngu tuturu-danyaka i MIRI dàngu nda hama tuda da tau Lewi angu kabihu-da, da manjala karia-nja da tau Ihirailu hawiangu. 12Jia ba tuna nyuda duda da ana umbuku-na i Handuku pa-pahinggilu mehangu tanaha ba wuanja, la pera tana pawua-nja da tau Lewi. Tàka na tana pa-pahinggilu nuna kanjupu matua-ya. 13Nuna na tana tau Lewi 12,5 kilu metiru nunjuna welingu la pahunga lodu lundu la patama lodu, tàka na ndàbaru-na lima kilu metiru-na weli diangu lundu hu luru dàngu la pera tanada da ratuya na pangia-na. 14Mili ana hapangga-a welingu la tana nuna àmbu jia dangga-dudanya jàka ndia àmbu jia njepa-dudanya; na tana na marihi hàmu la tana Ihirailu nda peku-ana pa-haleli la lima tau hawiangu, nadu ba pa-pahinggilu ndumana i MIRI-duyaka nuna na tana hi manguna Nyunaya.

15Mbara luru welingu la tana pa-pahinggilu nuna, ninyapa na marihi ba 12,5 kilu metiru-na nunjuna dàngu 2,5 kilu metiru-na ndàbaru-na. Nuna nu nda na-matua-a dàngu pekuna ka nangia-nya rayatu dàngu ka maràda rumbaya, la padua-na lupangu-ma pahada-nya hau paraingu. 16Nuna na paraingu lupangu-ma na-kapatungu kabihu-na bàdi, nimbihu karaha-na 2,25 kilu metiru hukutu-na. 17La winggiru mbutana nuna na paraingu lupangu-ma ka ningu ma-wailangu-na bàdi ma-125 metiru ndàbaru-na. 18La pahunga dàngu la patama lodu welingu la paraingu nuna ningu ma-wailangu-na da-maràngga 5x2,5 kilu metiru. Nuda da ma-wailangu da madàmbu-da lupangu-ma ka dapoka-ha woka bàdi paraï rayatu la paraingu nuna. 19Da tau - tauka welingu la mbuu ndàba kabihu Ihirailu da mangia-nya nuna na paraingu pekuda papoka-ya nuna na tana.

20Ba tuna, nggubulu-na na ngaba tana nuna, papohu-nya na tana pa-pahinggilu dàngu na tana nduma paraingu, na-kapatungu kabihu-na, 12,5 kilu metiru-na nimbihu karaha-na. 21-22Na tana la patama dàngu la pahunga lodu welingu la pangia pa-pahinggilu nduma Umana i MIRI, ndumada da ratu, da tau Lewi dàngu nuna na paraingu, jiaya na ndumada da maningu kawahangu da ma-katangu pareta. La pahunga loduna nuna na tana na tayilingu lundu la padira pahunga loduya, tàka la patama loduna lundu la Tehiku Padua-ya, tàka nangia padua welingu la tana Yahunda hanggangu la tana Mbanyamingu.

Tana nduma da kabihu hawiangu

23-27Na tana mbaru luru welingu nu na tana pa-pahinggilu, nduma da kabihu hawiangu-ya. Na lerangu-na nuna na tana napiti welingu la padira pahunga lodu nahanggangu la patama lodu lundu la Tehiku Padua, dàngu tuna yia ba paberi-nya piti weli diangu hanggangu hu luru:

Mbanyamingu

Hamiungu

Ihakàru

Hembulungu

Nggàtu

28Mbara luru welingu la tana Nggàtu ninya na padira mapiti welingu la tuba patama loduna harangu hibitungu hu luruna na Tamàru lundu nàhuya la mata wai Kandihu-Marimba, hàla hi nàhuya la patama lodu harangu hibitungu hu dia nàhu la padira Mehiru lundu la Tehiku Padua.

29Napanii i MIRI Hupu Majangga, “Tuna nu ba paberi-nya nuna na tana la kabihu - kabihu Ihirailu,” wàna.

Da pindu bokulu Yeruhali

30-34Da pindu tama la paraingu Yeruhali hakambulu dàmbuda. Da kangeli-na da mapatu-da da-maràngga 2,25 kilu metiru hukutu-da, dàngu ta - tailu pindu bokulu-da. Nimbihu pindu bokulu pa-patamungu tamu hau kabihu Ihirailu-ya. Da pindu bokulu mbara dia datamu-nja i Rumbingu, i Yahunda, dàngu i Lewi; da pindu bokulu la kangeli pahunga lodu, datamu-nja i Yuhupu, i Mbanyamingu, dàngu i Ndàngu; la kangeli mbara luru tamuda i Hamiungu, i Ihakàru dàngu i Hembulungu-ha; tàka la kangeli patama lodu datamu-nja i Nggàtu, i Ahiaru, dàngu i Nàputali. 35Nggubulu-na nu na kangeli 9 kilu metiru-na marauna. Dàngu piti welingu la rehi nàhu, na-patamu-nya tau, “I MIRI NINYA LAI NU!” wànanya.

Currently Selected:

YAHAKIALU 48: KAM

Highlight

Copy

Compare