YAHAKIALU 47

Na mata wai la Umana i MIRI

1Na-karia belingga paraïna nuna na tau mini la pindu tama la Umana i MIRI. Ku-itangu wai ma-lulungu welingu la lumbu pindu nuna hanggangu la pahunga lodu, hama tuna na Umana i MIRI ba na-hanggangu la pahunga lodumbu. Nuna na wai na lulungu welingu la lumbu pàlaku pindu Umana i MIRI mbara luru nali ningu la karaha mbara luruna na ngia pawotu maraku. 2Hàlaka nu na-karia-ngga paluhu li ningu la pindu bokulu mbara dia paraïna nuna na tau mini hi nangàndi-ka la pindu bokulu pahunga lodu. Nuna na ana luku na-lulungu la karaha mbara luruna na pindu bokulu nuna. 3Ba dàngu hukutu wànguna ai hukutu-na, karia-nanggaka paraïna nuna na tau mini ba ma-namatu arihu luku hanggangu la pahunga lodu lima ngahu metiru marauna, hi na-paràhangga papala. Lai nu hupu kawudu kawita-aya na waina. 4Hàla nahili hukutu lima ngahu metiru, tàka lai nu hupu kambàku-ya na waina. Nahili hukutu lima ngahu metiru, tàka hupu bànggiya na waina. 5Nahili handàkangu pa-hukutu 500 metiru, tàka lai nu lalu manjolungu-naka na waina ka palaya la wihi. Jàka mbuhangu papala, wàngu pangeni-maka bàdi. 6Hi napanii-ngga nuna na tau mini, “Ha duma tau nda payatangu, hamata pahàmu-nja yiada mbuu ndàbada,” wànangga.

Hàlaka nu na-karia belingga namatu luku, 7hi ku-itangu ai madira danguha la karaha hapapa - hapapa-na nuna na luku. 8Napanii-ngga nyungga, “Yiana na luku naliya na tana yiana ba na-lulungu hanggangu la pahunga lodu hi naliya na Lolangu Yorundangu hanggangu la Tehiku Meti. Jàka natàka-ka la Tehiku Meti na waina, ka pahilu-nanyaka wai kàba nuna na wai tehiku mambàru. 9La nggi biaya na-lulungu ningu yiana na luku, lai numbu napa ba ningu ndàba iyangu dàngu banda hawiangu. Napa na pakàba-ya na waina na Tehiku Meti, dàngu la nggi biaya na-lulungu ningu nuna na wai, lai numbu napa ba ninya na luri. 10Welingu la katiku-da da luku la Eni-Nggendi lundu la katiku-da da luku la Eni-Ekilaïmu nawàngu pa-kapitilu na tau majala ba dadengi jalada la hi - hingida lai nu. Mbuu ndàba na ngara iyangu-ka ni ndàbanja napa lai nu, hama tuna da maninja la Tehiku Padua. 11Na nyuna na wai la ma-pakahala ma-nangangu dàngu na wai kalibuku la hingi-naka nuna na tehiku nda nakàba-a, tàka pa-daingu-mana ba pangia mehiya. 12La hi - hinggi-naka hapapa - hapapa nuna na luku natumbu-nya ma - màtu pingi wua ai pangangu. Nda ana malaï-mada da rauda nuda da pingi ai, dàngu nda ana njàpu-mada da wuada. Nimbihu wulangu nuda da pingi ai ba datuu wua bidida, nadu na wai ma-mangàpahu-nja ba lulungu welina la Umana i MIRI. Da wuada pangangu-ha tàka da rauda danjadi muru,” wàna.

Da padira tana

13Napanii i MIRI Hupu Majangga, “Yiada-haka da padira tana da pa-paberingu napa la hakambulu dàmbu kabihu Ihirailu. Na kabihu-na i Yuhupu na-ngalangu dua ngia.#dua ngia; Na kabihu Manahi dàngu Epuraïmu, da anana i Yuhupu da marangga hangia. 14Mbàda harangu-ngguka ba lupangu-ma kuwua-nja napa nuna na tana la boku la mangilu-mi. Jia ba tuna, piti-yawa kai paberi dàngu hàmu-minya dimi nuna na tana.

15Na padira mbara diana napiti welingu la Tehiku Padua hanggangu la pahunga lodu lundu la paraingu Hetilungu, hanggangu la Hamàtu, na-pangalangu la paraingu Hendàtu, 16la Mbirota dàngu Hipuraïmu (da pangia-da nuda da paraingu ba ndedi patàka-nya la Ndamàhiku welingu la Hamàtu), hàla hi mangupa la paraingu Hahàru-Enàngu, la padira-na na paraingu Hauràngu. 17Ba tuna, na padira mbara diana napiti welingu la Tehiku Padua hanggangu la pahunga lodu, la paraingu Hahàru-Enàngu; la mbara dia welingu la padira nuna-duyaka na ngabana la Ndamàhiku dàngu la Hamàtu.

18Na padira la pahunga lodu na-hanggangu hu luru, welingu la hau pangia ba ndedi patàka-nya la Ndamàhiku welingu la Hauràngu. Ba tuna na Luku Yorundangu jia-yaka na padira tana Ihirailu la patama loduna dàngu na Nggiliatu la pahunga loduna, lundu la Tamàru#Da pa-haleli ndai da manda pirada: Tamàru. la hingi Tehiku Meti.

19Na padira mbara luru na-hanggangu la patama lodu harangu hibitungu hakudu hu luru, welingu la Tamàru hanggangu la mata wai Kandihu-Marimba, hàla hi na-hanggangu la patama lodu harangu hibitungu hakudu hu dia nàhu la padira Mehiru lundu la Tehiku Padua.

20Na padira la patama lodu jiaya na Tehiku Padua, hàla hi-hanggangu hu dia la hau pangia la patama loduna welingu la ànda tama la Hamàtu.

21Paberi-nyawa dimi na tana dua wikimi, pa-namatu-nja da kabihu Ihirailu; 22dàngu mangu-mami-nyaka dimi nuna na tana lundu nu - nu. Da tau hangàdangu da ma-ndàdiku pa-daingu la hongami dàngu ningu anada madedi lai nu, lupangu-ma da-ngalangu-mbu nduma-da welingu la tana nuna. Lupangu-ma padiha-ha hama tuna ba tau Ihirailu weli wingungu-ha, dàngu lupangu-mbu pa-patamangu-ha nyuda la undi ka da-ngalangu tana ba pa-beringu tana la tau Ihirailu. 23Nimbihu-na na tau hangàdangu mangia-nya na tana lupangu-ma pawua pa-pohungu-ha tana dàngu kabihu Ihirailu la ngia pa-ndàdiku-da. Nyungga yia, MIRI Hupu Majangga mambàda panii,” wàna.

Currently Selected:

YAHAKIALU 47: KAM

Highlight

Copy

Compare