NDANIALU 1

NA NGALA LURIDA I NDANIALU DÀNGU DA ANGUNA

1:1–6:28

Da bidi mini Yahundi la uma maràmba i Nembukatunehàru

1Tailu mbua ndaungu la hambeli pareta-nanya na Yahunda paraïna Maràmba Yuyakimu, i Nembukatunehàru nanjungu-nya na parai Yeruhali dàngu hi na-nggupulu-ya. 2I MIRI na-pahia-nya nyuna pa-pakàku-ya na Maràmba Yuyakimu dàngu la paramba-nja hawiangu da kanaingu pa-wilingu la Umana i MIRI. Da tau pa-tanawangu nangàndi-ha la uma marapu-na la Mbambilu, tàka da kanaingu, paramba-na, na-pahàmu-ha la nggu - nggudangu nu la uma marapu.

3Tunaka nu na maràmba nawua-nya pareta i Àhapenàhu na ngora kuru uma maràmba, ka napindi tau tanawangu welingu la Ihirailu nda pira bidi mini wàla maràmba jàka ndia ma-kabihu tau bokulu-kai. 4Nyuda nu lupangu-ma bidi mini manda ningu nyurangu-ha bàdi. Lupangu-ma da-paràka miningu, natoma hàmu na hakola-da, halimu kotu dàngu nadangu da papida dàngu ma-paràkangu papawai ngaba la uma maràmba. Lupangu-ma i Àhapenàhu na-papeka-nja nyuda padiha dàngu pa-tulihu hilu Mbambilu. 5Na kawuku-mbuya na maràmba da pangangu da pa-ngunungu ndumada nyuda nu na pahama-ma bàdi dàngu da pa-paloku-nja da ihi umana na maràmba. Ba hàlaka pa-pandama-nja tailu mbua ndaungu, lupangu-ma nyuda nu dalua la hangga maràmba ka dapawai ngaba la uma maràmba. 6La hongada da bidi mini nuda nimbunya i Ndanialu, i Hananya, i Mihailu dàngu i Aharia, mbuu ndàbada welingu la kabihu Yahunda-ha. 7Na ngora kuru uma maràmba na-pahilu-nja da tamuda nyuda, hi da-tamungu Mbelutaharu, Hàndaràku, Meha dàngu i Ambitunenggu.

8-9Wàngu pa-ndulangu-na i Ala, nanamu dàngu nambuha-nya i Ndanialu paraïna i Ahapenahu. I Ndanialu kita-mananya na etina, panda kajari wikina wàngu pangangu dàngu wai angguru welingu la uma maràmba, tuna nuduka hi nakarai lai Àhapenàhu ka peku ngalangu-na pangangu hawiangu. 10Paraï pa-mangàdatu-nya na maràmba, panii-nanyaka i Àhapenàhu, “Na maràmba wikima ma-kawuku-ya na pangangu na pangunungumu, jia ba tuna pa-namatu-nya na patàpu-na jàka na-kawawaku na hayandalu-mu welingu la bidi mini hawiangu ba itakau, jiangu-maka duku napa na-pameti-ka nyungga,” wàna.

11Tunaka nu i Ndanialu napanii wànya rukuna nuna la matanggu dai na pa-pangaba-na i Àhapenàhu pa-tanara-ha i Ndanialu dàngu da anguna da madua haàtu-da, 12“Kamanggamawa nyuma hakambulu lodu; wua bia-nggama rii murua dàngu waia ka mangangu mangunungu. 13La hambeli hakambulu lodu, pamenja-nggama dàngu da bidi mini mangangu pangangu pa-kawuku-na na maràmba, hàlaka nu kau botaya palata-nya na kinjumu-nggama,” wàna. 14Na matanggu dai na patunju-ya dàngu hi nakama-nja la hakambulu lodu. 15Ba natoma-ka na rehi, nyuda nu da rihi hayandalu dàngu darihi pariipa ba itaha welingu la bidi mini mambàda ngalangu pangangu welingu la menja maràmba. 16Piti welingu la rehi nu nda na-paloku-anjapa pangangu pa-ngunungu da pa-kawuku-na na maràmba paraïna na matanggu dai, mbulungu rii muru dàngu wai jua-maaka.

17I Ala nawua-nja da bidi mini nuda pa-kapatu-da manggàna dàngu hupu pingu lawiti luluku dàngu papingu wàngu. Hinggilu-da nuda i Ndanialu pa-wuangu pingu-mbuya la pa-kalokangu harii mata dàngu manggadipangu.

18La hupu njàpuna na tailu mbua ndaungu na rehi pa-pekangu pa-kawuku-na na maràmba, karia-nanjaka paraïna i Àhapenàhu mbuu ndàbada da bidi mini nuda palua la hanggana na Maràmba Nembukatunehàru. 19Ba hàlaka pa-pa-katanangu dàngu nyuda mbuu ndàbada nalàda-ya paraïna na maràmba ba dira pinguha i Ndanialu, i Hananya, i Mihailu dàngu i Aharia la mbuu ndàba kaloka ràma welingu la anguda hawiangu. Ka pa-kiringu-danyaka papawai ngaba la uma maràmba. 20Handàka patàka - handàka pa-tàkangu-na lii pa-lumungu na maràmba ka pa-habola-ya dàngu ka kakaya, narongu-ha da panaungu dàngu da kanandingu-da da mapatu da bidi mini nuda, da-pa-hakambulungu parihi hàmu welingu la mbuu ndàbada da ma-manyura-ka dàngu da mapingu alimu la nggubulu pa-maràmba-na.

21I Ndanialu daingu pangaba-na la uma maràmba lundu nabera-ya na Mbambilu paraïna Maràmba Korihu welingu la Perihia.

Currently Selected:

NDANIALU 1: KAM

Highlight

Copy

Compare