YAHAKIALU 46

Na maningu kawahangu dàngu da kalaratu mbabu

1Napanii i MIRI Hupu Majangga, “Na pindu bokulu pahunga lodu na ma-orangu la talora mbara dalu lupangu-ma pa-daingu kabitangu-na la nomu mbua lodu ràma. Na pindu nuna mbulungu la lodu Hangahu dàngu la mbabu Wulangu Bidia hi peku la pa-bunggahu-ya. 2La lodu nuda na maningu kawahangu nalii ningu la rowa bokulu ba natama-ya welingu la talora mbara lua la hambeli hi na-ndolaku la lihi kambaniru pindu bokulu, ba talànga wotu-daha da maraku patunu dàngu da maraku papeku wàngu welingu la maningu kawahangu paraï da ratu. Nu la pindu bokulu lupangu-ma na patika dàngu na-marubuku-nya i MIRI, hi namangu palaku. Hàlaka na, àmbu bita-dunya lundu rudungu na pindu bokulu. 3La hangga pindu bokulu nunambu, lupangu-ma mbuu ndàba na rayatu da patika pa-marubuku-nya i MIRI la nimbihu lodu Hangahu dàngu la Mbabu Wulangu Bidi.

4La lodu Hangahu lupangu-ma nawotu maraku patunu lai MIRI na maningu kawahangu nomu ngiu ana mbimbi dàngu heu mbimbi bumbu, mbuu ndàbada nuda àmbu ningudu nyurada. 5Karia-na na mbimbi bumbu lupangu-mbu nawotu maraku uhu nggàndumu 17,5 litaru; karia-da da nimbihu ana mbimbi, lupangu-ma nawotu maraku uhu nggàndumu pira bia pambuha-na. Nimbihu-da da maraku uhu nggàndumu lupangu-ma wotu pa-karia-nja maraku mina haitungu tailu litaru.

6La Mbabu Wulangu Bidi, da maraku nuda lupangu-ma ka heu hapi mini, nomu ngiu ana mbimbi dàngu heu mbimbi bumbu, mbuu ndàbada àmbu ningudu nyurada. 7Nimbihu hapi mini dàngu mbimbi bumbu, lupangu-ma nawotu pa-karia-nja maraku uhu nggàndumu maràngga 17,5 litaru, dàngu karia-da da nimbihu ana mbimbi, pira bia pambuha-na. Nimbihu-da da maraku uhu nggàndumu lupangu-ma nawotu pa-karia-nja maraku mina haitungu tailu litaru.

8Jàka nalua pa-lumungu la Umanggu na maningu kawahangu, lupangu-ma nali ningu la rowa bokulu ba natama, hamangui ba nabeli lai numbuya nali ningu. 9Hauya duna, jàka namai na rayatu la lodu - lodu bokulu palumu-nya i MIRI, nyuda da mali ningu li pindu bokulu mbara dia ba datama, ba dabeli lupangu-ma dali ningu la pindu bokulu mbara luru ba dahàla ka pa-lumungu. Tàka nyuda da mali la pindu bokulu mbara luru ba datama, ba dabeli-ha; lupangu-ma dali ningu la pindu bokulu mbara dia. Àmbu pahia-dunja da tau la ànda tamada ba dabeli-ha. Lupangu-ma dabeli li ningu la pindu bokulu mbara papana. 10Lupangu-ma na maningu kawahangu natama karia-nya na rayatu la Umana i MIRI dàngu dabeli pa-kariangu-mbu.

11La lodu - lodu mbabu dàngu lodu remi, nimbihu hapi mini dàngu nimbihu mbimbi bumbu lupangu-ma wotu pa-karia-nja 17,5 litaru uhu nggàndumu, tàka kariada da nimbihu ana mbimbi pira bia pambuha-na na tau na ma-lumungu. Nimbihu maraku uhu nggàndumu lupangu-ma watu pa-karia-nja maraku mina haitungu tailu litaru.

12Jàka na-mbuhangu pawotu maraku wàngu etina lai MIRI na maningu kawahangu, ka kameti maraku patunu-ya hamangui ka kameti maraku papeku wànguya, lupangu-ma bowanya na pindu pahunga lodu na ma-hanggangu la talora mbara dalu ndumana nyuna. Ba nawotu-ya na kameti maraku nuna lupangu-ma na-pahama na pawunda-na hama tuna la lodu Hangahu, na nyuna jàka mbàda beli-naka, lupangu-ma bita belinya nuna na pindu bokulu,” wàna.

Da maraku nimbihu lodu

13Napanii i MIRI, “Nimbihu lodu la mbaru, lupangu-ma wotunya kameti maraku patunu i MIRI heu ana mbimbi mahau ndauna dàngu manda ningu nyurana. 14Hinggilu-na nu, lupangu wotumbu la nimbihu mbaru dàmbu kilu uhu nggàndumu dàngu hau litaru mina haitungu, ka pa-haüru-nya na uhu nggàndumu pawotu mànu nimbihu lodu lai MIRI; na kalaratu nuna na-pangalangu lundu nu - numa. 15Nimbihu mbaru lupangu-ma wotunya maraku i MIRI: heu ana mbimbi, maraku uhu nggàndumu dàngu mina haitungu,” wàna.

Na tana mangu maràmba

16Na-wuangu pareta i MIRI Hupu Majangga, “Jàka nawua-ya hawiangu na tana kangeha-na paraïna maningu kawahangu na ma-pareta la haàtu anana mini, nuna na tana manguna na anana mini-yaka dàngu mangu ihi uma-nanya. 17Na nyuna jàka nawua-ya hawiangu na tana kangeha-na paraïna nuna na maningu kawahangu la haàtu atana, nuna na tana namangu belinya paraïna nuna na maningu kawahangu la Ndaungu Pa-belingu.#Ndaungu Pa-belingu; Handàkangu la nimbihu 50 ndaungu, lupangu-ma mbuu ndàbana na tau Ihirailu da-pamaraha da tau da angu banjaru-da da manjadi ata ruku wutangu. Lupangu-mbu nyuda da pabeli-nja la mapingi mangunja da tana kangeha pa-danggangu ruku wutangu. Nuna na tana manguna nyunaya dàngu mbulungu nyuna-a dàngu da anana mini da mapeku pamangu pangala-nya nuna na tana. 18Nda peku-ana nuna na maningu kawahangu papiti ana hawutu mangu kangeha rayatu-na. Mbulungu tana kangeha wikina nyuna-ma-a bàdi hi peku wua-nanja da anana mini hi nda haàtu-a banjaru-nggu pa-pahewangu welingu la tana manguna,” wàna.

Da uma aü la Umana i Miri

19Tunaka nu nali karia-ngga la pindu lihina na pindu bokulu paraingu nuna na tau mini patama-nja da kuru - kurungu matua da ma-hanggangu hu dia. Nuda da kurungu pa-payemangu nduma ratuha. Na-patuji hanggangu la rowa mangia hupu la patama lodu nuna na tau mini, 20hi napanii, “La pangia lai niha da-manahu ningu maraku podahu njala dàngu maraku pa-belingu runggi da ratu. Da maraku uhu nggàndumu lai nimbu na ngia pa-handara-nja ka àmbu ningu ana hawutu welingu la maraku nuna pangàndi la talora mbara lua la hambeli hi na hanggàmaru na rayatu,”#na-hanggàmaru na rayatu: Tàngaru-ya la 44:19. wàna.

21-22Hàlaka nu hi na-kariangga la talora mbara lua la hambeli hi na-paita-ngga ba maràngga ningu talora marihi kudu la patu mbua kabihu-na, 20 metiru nunjuna dàngu 15 metiru ndàbaru-na. 23Nimbihu-da nuda da talora da-winggiru-nja dindi watu, dàngu ningu tuluru-da nuda da dindi watu. 24Napanii-ngga nuna na tau mini, “Yiada jiahaka da uma aü ngia pa-manahu-daha da kameti maraku rayatu paraï da ma-paloku la Umana i MIRI,” wàna.

Currently Selected:

YAHAKIALU 46: KAM

Highlight

Copy

Compare