YAHAKIALU 34

Da mini pawangu Ihirailu

1Napanii-ngga i MIRI, 2“Ha dumu tau nda payatangu, panjala-ha da maràmba Ihirailu, dàngu patàka-njawa nyuda jàka nggàraya na papanii-nggu Nyungga, MIRI Hupu Majangga lai nyuda, ‘Nai-a-ai nyimi dimi ha mini pawangu Ihirailu. Jiaya na ngera wikima-ami na-pakanandi-mi nyimi, nda jia-aya na ngerada da mbimbimi. 3Iununja da wai huhuda, ituha paki da wulu ihida, tàka da marihi mboka ihambàli-ha tàka hi inganja. Nda ana paloku-maminja da mbimbimi. 4Da mbimbi manda àtalu ndai kabida-anja, da mahidu ndai tuanja muru, da ma-manua ndai kamburu-anja, da ma-njàrangu dàngu da ma-mbulangu ndai himbu-aha ka ngàndi beliha. Jiapa iwàngu mbana eti-mbuipa la mbuu ndàbada nuda da mbimbimi. 5Ba nda ningu mapawa-nja pai - ihangu-danyaka nuda da mbimbi hi uhu banda bohuha. 6Ka njadangu-danyaka la tandula - tandula majangga dàngu la palindi - palindi da mbimbinggu. Da tanyalangu la nggubulu pinu tana, nda haàtu-a maeti wànja jàka ndia mahimbu-ha nyuda.

7Màla, ha dimi mini pawangu, patingi-nyawa jàka nggàraya na papanii-nggu Nyungga, MIRI Hupu Majangga lai nyimi: 8Kuhara wànya na wikinggu Nyungga Ala maluri, patingi pa-hàmungu! Mbàda njàkilu dàngu mbàda ngaa-nanjaka banda bohu da mbimbinggu, ba nda ningu mapawa-nja nyuda. Ndai ihilingu-a nyimi mini pawangu-nggu pahimbu-ha nuda da mbimbi. Kanandi-minya na nduma wikima-ami nyimi, ndai kanandi-anya na pahàmu wàda da mbimbimi. 9Ba tuna, patingingu-wa ha dimi mini pawangu, 10Nyungga, MIRI Hupu Majangga kupanii-nggai nyimi, ba muhu-mingga Nyungga. Napa kupiti beliha nuda da mbimbinggu welingu lai nyimi dàngu nda kuhili pakata-anjapa lai nyimi; nda kuhili pahia-anggaipa pa-kanandi-nya na pahàmu wàna na wikimi. Pamara-nggunjaka duku napa da mbimbinggu welingu lai nyimi hi nda dahili njadipa pangaami nyimi,’ ” wàna.

Na mini pawangu na mahàmu

11Napanii i MIRI Hupu Majangga, “Napa Nyungga kuhimbu wiki-ngguha duku da mbimbinggu hi kabubulu-ha, 12hama tuna na haàtu mini pawangu mahimbu dàngu ma-pauhi-nja da mbimbina da mapai - ihangu hi na-kabubulu-ha. Napa kungàndi beliha welingu la mbuu ndàba ngia pa-tanyalangu-da la lodu pa-nggumungu na lodu akatu nuna. 13Napa ku-paluhu-ha nyuda welingu la hongada da banjaru dàngu welingu la tana tau hangàdangu, hi ku-pauhi-nja pangàndi-ha la tana wikida. Napa kupawa-nja la palindi - palindi dàngu la lola - lolangu Ihirailu hi ku-karia-nja la maràda rumba mahàmu. 14Langatàka-ma, napa ku-panedi-nja maràda rumba ma-kamboka ndumada nyuda la ma-palindingu dàngu la lola - lolangu tana Ihirailu. Lai nu napa da-hangahu dàngu dangangu rumba wàngu mambiru-da. 15Nyungga wikima manjadi mini pawangu-da da mbimbinggu dàngu ma-panedi-nja ngia pa-hangahu ndumada nyuda; Nyungga, MIRI Hupu Majangga mambàda panii.

16Na ma-mbulangu kuhimbu-ya, na ma-njàrangu ku-karia belinya, na ma-manua ku-kamburu-nya, na mahidu kutunya muru; tàka na nyuna na mamboka dàngu na ma-àtalu ku-patàlaru-ya, nadu ba mini pawangu mawunda mahàmu ka duku Nyungga.

17Patingingu-wa, ha dimi mbimbinggu! Nyungga MIRI Hupu Majangga kupanii-nggai nyimi ba maràngga patanda-nggunggai ngerami napa, tàka hi ku-kawàri-ya na mahàmu welingu la ma-akatu, da mbimbi welingu la kamàmbi. 18La hongami nyimi ningu manda hodaya jàka nawàngu pa-pambuta rumba marihi hàmua, tàka da taro - rohaku-mbuya na rumba panda mbuhada pangàanya! Da-unungu wai kahingiru hi da-pa-kanubaru-ya na wai panda mbuhada paunu-nya! 19Da mbimbinggu hawiangu jianguma dangaanya na rumba pambàda taro - rohaku dàngu daunu-nya na wai pambàda pa-kanubaru.

20Jia ba tuna, Nyungga, MIRI Hupu Majangga kupanii-nggai nyimi, ha dimi mbimbi mboka, ba mainggunya napa panjadi hakimu la mbimbi ma-àtalu dàngu mbimbi ma-maluputu. 21Ida - dàhiku dàngu injukulu-nja nyimi da mbimbi hidu hi lupa payila-nja welingu la kabàba mbimbi. 22Tàka na nyuna Nyungga wikima napa ma-pamara-ha da mbimbinggu, ka àmbu hili palua-nja lima wàngu mbana eti. Napa ku-patanda-nja ngerada da mbimbinggu nimbihu-da dàngu ku-kawàri-ha da mahàmu welingu la ma-akatu. 23Napa kuwotu haàtu maràmba mahama-nya na atanggu i Ndautu, ka nanjadi-ya mini pawa kamehangu-da, dàngu nyuna napa ma-kabubulu-ha nyuda. 24Nyungga, MIRI-ka, Alada nyudaka, tàka na maràmba mahama-nya na atanggu i Ndautu napa na-hanggubu-nja nyuda. Nyungga yia MIRI mambàda panii. 25Napa kutura pa-njanjingu dàngu nyuda, na ma-pamàndu-nya na mambiru-da nyuda. Napa kuwàngga ndàbaha da banda bohu welingu la nggubulu-na yiana na tana, hi peku ndàdiku mambiru-da da mbimbinggu la maràda - maràda dàngu la oma - omangu.

26Napa ku-pakanyuru-ha nyuda dàngu ku-pahia-nja pa-ndàdiku la winggiru-na na tandula matua-nggu.#tandula matua-nggu: Tàngaru-ya la 20:40. Napa kuwua-nja urangu la rehina. 27Napa dawua da pingi ai, da woka da-wuangu ihida, dàngu mbutana na tau napa da-ndàdiku mambiru la tana wikida. Jàka mbàda bota-nggunyaka na nggili bàhi mahondu-ya na banjaru-nggu dàngu jàka mbàda pamara-ngguhaka welingu la tau ma-atanja nyuda, pi-duda-nggaka ba MIRI-ka Nyungga. 28Nda jia hili ramba-ada-njapa nyuda paraï da banjaru manda tandaka Nyungga, jàka ndia nda jia njàkilu-ananja banda bohu. Napa daluri mambiru, dàngu nda haàtu-mbupa mahili pa-mangàdatu-ha nyuda. 29Napa ku-pakamboka-ha da wokada hi nda hili ningu-apa ndaungu rimbangu la tana nuna. Nda jia pawawa-ana-njapa paraï da banjaru hawiangu. 30Ka pi-ndàba-nanyaka tau ba banjaru-nggu Nyunggaya na Ihirailu dàngu ba Nyungga maopa-nja. Nyungga yia, MIRI Hupu Majangga mambàda panii.

31Langatàka-ma, nyimi kabàba mbimbi-nggunggai pawua-nggu pangangu. Nyimi banjaru-nggunggai, tàka Nyungga Ala-mingga. Nyungga yia, MIRI Hupu Majangga mambàda panii,” wàna.

Currently Selected:

YAHAKIALU 34: KAM

Highlight

Copy

Compare