YAHAKIALU 33

I Ala nawotu-ya i Yahakialu patanggu dai

(Yhkl. 3:16-21)

1Nahili panii-ngga i MIRI, 2“Ha dumu tau nda payatangu, panii-nyawa na banjaru-mu jàka ku-patàka-nya pabera na hau tana tuna yia na-pawàngu. Na mangia-nya nuna na paraingu dapindi la hongada haàtu matanggu dai. 3Jàka naita-ya paraïna madai ba nàmungu muhu, na-palingu-ya na tanda hanggàmaru ka na-rimangu ndàba na tau. 4-5Jàka nggamu marongu-ya nuna na tanda hanggàmaru tàka hi nda na-kawela-nya, ba natàka-ka na muhu hi na-pameti-ya, ka meti-nanyaka ruku njala wikina. Ngera hama tuna jàka naeti wànya nuna na tanda hanggàmaru, jianguma ba peku marana. 6Tàka na nyuna jàka naita-ya paraïna nuna na madai ba nàmungu muhu tàka hi nda na-palingu biaya na tanda hanggàmaru, hi na-pameti-ha muhu nuda da tau njala, na matanggu-nya hemana na metida nyuda ku-karuhi-ya lai nyuna.

7Ha dumu tau nda payatangu, kuwotu-kau nyumu panjadi matanggu daiya na banjaru Ihirailu. Patàka-njawa nyuda yiana ka panamu-nja: 8Jàka kupeka-ya ba nameti napa na haàtu tau akatu, tàka ndau panamu-anya ka na-panjilu-nya na huri lurina ka peku marana, jiangu-ma ba nameti ba haàtu tau njala-mayapa. Tàka na nyuna na matanggu-nya hemana na metina nyuna napa ku-karuhi-ya lai nyumu. 9Jàkau panamu-nya nuna na tau akatu tàka nda na-pànjangu-a nyuna pawunda ma-akatu, napa nyuna na-pameti tau njalangu, tàka nyumu wiki mara-munya dumu napa,” wànangga.

Na maràngga tanggu hema

10Napanii-ngga i MIRI, “Ha dumu tau nda payatangu, hili panii belinja da tau Ihirailu yiana na kareuku wikida, ‘Ma-mangonangu nyuma paraï pambotu da njala dàngu da akatu-ma. Nggiki hama pekuma paluri?’ ba wàda. 11Paniinja nyuda ba ku-harangu wàngu tamu wikinggu Nyungga, Ala maluri MIRI Hupu Majangga, nda nahàmu-a na etinggu Nyungga jàka nameti na tau akatu; na nyuna ku-rinjungu ka na dunjaku-nja da njalana ka pa-daingu lurina. Ha dimi tau Ihirailu pànjangu-wa pawunda akatu! Ka nggikina hi lupangu mi-mbuhangu pameti? wàmunja.

12Ba tuna, ha dumu tau nda payatangu, paniinja da tau Ihirailu, jàka nawunda njala na tau hàmu, nda jia ndula-ananya nyuna paraïna hàmuna la mangilu. Jàka na-pànjangu pawunda njala na tau akatu, nda jia huku-anya napa tàka jàka nawunda njala na tau hàmu, nda jia pamara-aya napa. 13Talànga wanguna mbàda njanji-nggunyaka pa-pamara-ya na tau hàmu, tàka na nyuna jàka na-pakiringu pawunda njala dàngu monungu-na ba pa-pamara-ya rukuda da hàmuna àmangu, hanjàliru-nanya. Nda jia pangàda-anggu-njapa da hàmuna da pambàda wundana dàngu jiangu-ma napa nameti rukuda da njalana. 14-15Talànga wanguna mbàda panamu-nggunyaka na tau njala ba jianguma napa nameti. Tàka na nyuna jàka na-pànjangu pawunda njala hi na-pakiringu pawunda mahàmu dàngu ma-padeningu, ngera hama tuna na-pabelingu malanja panggadi tau, jàka ndia malanja pambàda manganga-na hi na-karadaku-nja da uku paluri wàngu, nda jia meti-ana nyuna napa. 16Nda jia pangàda-anggu-njapa da njala pambàda wundana dàngu napa naluri ruku wundana ma-padeningu dàngu mahàmu.

17Na nyuna napanii nuna na banjaru ba nda na-patuba-a na-paluangu-nggu lima tungu nu! Tàka làti duna na-paluangu-da lima nyuda na manda patuba. 18Kuhili pa-kawàndi-kiya handàkangu, jàka na-pakiringu pawunda ma-akatu na tau hàmu, napa nyuna nameti. 19Jàka na pànjangu pawunda njala na tau akatu, hi na pakiringu pawunda mahàmu dàngu ma-padeningu, napa naluri duna nyuna. 20Jiapa-kai ba tuna nu na paniina na banjaru Ihirailu ba nda na-patuba-a na pa-luangu-nggu lima Nyungga. Langatàka, jiangu-ma napa ku-maràngga patanda-nja ngerada haàtu - haàtu nunjuya na pawunda-da,” wàna.

Na lii langu ruku mberana na Yeruhali

21La tànggalu lima wulangu hakambulu, la ndaungu pa-hakambulu dàmbu wàna na tanawangu-ma, namai na haàtu na mapeku pamara welingu la Yeruhali papanii-ngga ba mbàda mbera-naka nuna na paraingu. 22La rudungu ba ndedipa natàka mbàda pàda-nggunyaka na kawaha-na i MIRI. Ba tuna ba namai nuna na tau lai nyungga, mbàda peku kareuku-ngguka dàngu nda ku-kambànga-apa.

Na njalana nuna na banjaru

23Napanii-ngga i MIRI, 24“Ha dumu tau nda payatangu, dapanii da tau ma-ngiangu la tanyungguru-da da paraingu la tana Ihirailu, ‘I Ambarahàmu nangala-nya nggubulu-na yiana na tana, tàka didi meha-aya ba haàtu-na. Nyuta duta tadangu, ba tuna mangunda nyuta-maya yiana na tana,’ ” wàda.

25Rukuna nuna na-paràha-ngga nyungga i MIRI Hupu Majangga pa-patàka-nya yiana na lii langu lai nyuda, “Nyimi ingangu tolungu maningu wai riana; nyimi ilumungu marapu dàngu ipameti tau. Itoru mbeni pàkua papanii ba mangumi nyimiya yiana na tana. 26Nyimi imonu-nja da hapanda-mi. Na paluangu-mi lima pa-mayitangu-ya. Mbuu ndàbami nyimi injuraku. Itoru mbeni-mapa nu nyimi papeka-ya ba mangumi nyimiya yiana na tana?

27Ka-harangu wàngu tamu wikinggu Nyungga, Ala maluri, MIRI Hupu Majangga, da tau da ma-ngiangu la tanyungguru paraingu nuna napa pa-pameti-ha. Da ma-ngiangu la maràda napa nangaanja banda bohu. Da ma-kawiningu la palindi dàngu la liangu napa dameti la kanyaki pa-nggàbalungu. 28Napa ku-panjadi-ya maràda telangu malinggitu nuna na paraingu, dàngu na kawaha pa-bàkulu eti wàda napa na-kanjupungu. Da palindi la Ihirailu napa danjadi-ha pangia malinggitu kahàna, hi nda ana haàtu-a malii ningu lai nu. 29La rehi huku-nggunya nuna na banjaru ruku njalada dàngu ba ku-pa-malinggitu-ya nuna na tana, pi-duda-nggaka ba MIRI-ka Nyungga,” wàna.

Na ruku pamuangu-na na wunangu

30Napanii i MIRI, “Ha dumu tau nda payatangu, jiakau nyumu-maka papanii wàna na angu banjaru-mu jàka da maràngga pa-hàmburu la lihida da kangeli paraingu jàka ndia la hangga pindu - pindu uma. Da maràngga panii dua wikida, ‘Màlanda, ka talua pa-patingingu jàka nggàraya na lii languna i MIRI la lodu nàhu,’ wàda. 31Dapaju - jurungu ba damai ba banjaru-ngguha nyuda, da patingi-nya na kareuku-mu nyumu, na nyuna jàka nggàraya na pa-patàka-mu nda danunju-aya. La ngaruda da-kareuku wànya na pa-mbuhangu, tàka la etida jiaya na utuma-a na pa-kanandi-da. 32Haàtu mini ludu mahàmu nggoru-nanya dàngu mapingu pajungga-ya nyuna, na maludu wànya rukuna na pa-mbuhangu, wàdanggau nyumu. Deningu-mana ba da-patingi-nya na kareuku-mu nyumu tàka na nyuna nda danunju-aya. 33Mbuu ndàba da papanii-mu jiangu-ma napa da-hàrangu, tàka jàka jia-yaka na rehina, hina-duka hi dapinya ba mbàda ningu-maka làti haàtu wunangu la hongada nyuda,” wàna.

Currently Selected:

YAHAKIALU 33: KAM

Highlight

Copy

Compare