YAHAKIALU 18

1I MIRI napanii-ngga, 2“Ka nggikina duna la tana la Ihirailu hi kàli panii wànya na lawiti yiana?

‘Da ama dangangu wua angguru ma-mayilu,

tàka da-mayilu ningu da ngàndu anada, hi wàna’ wàna.

3Kuhara wànya na wikinggu Nyungga, Ala Maluri, MIRI Hupu Majangga, na lawiti nuna nda pahili tiki-ayapa la Ihirailu. 4Nimbihu-na na tau na lurina mangunggu Nyungga-ya, ka lurina na amaya, ka lurina na anaya-kai. Na tau na manjala nyunama duna na mameti.

5Ngera hama tuna ninya na tau hàmu, na-padeningu dàngu natànji. 6Nda na-lumungu-a duna marapu tau Ihirailu jàka ndia nda nangangu-a kameti maraku la ngia palumu - ngia palumu-nja da marapu. Ndedima duna na-paànga papaha tau hawiangu jàka ndia la pa-katuda angungu kawini mahau katàri. 7Ndedima duna na-panyonga jàka ndia na-rambangu. Jàka nggàraha da pa-bànjalu tau ma-parutangu lai nyuna na-pabeli mànu-manja. Na tau ma-rimbangu nawua-nya pangangu dàngu na tau manda ningu kalembi-na, nawua-nya paki. 8Ndedima duna nawua parutangu ma-paana. Nda na-mbuhangu-a pawunda ma-akatu dàngu la palu - lumungu-ka na-wuangu botangu ma-padeningu. 9Na-patundungu la hupu liinggu dàngu na-manundu la u - ukunggu. Na tau tungu nu jiaya na ma-padeningu dàngu napa na-padaingu paluri. Nyungga yia, MIRI Hupu Majangga mambàda panii.

10Na nyuna ngera hama tuna na tau nuna ka ningu anana ma-mbuhangu pa-rambangu, pa-pameti tau dàngu dadangu da ma-akatu hawiangu pawunda-na#Talànga wanguna na-njenjangu ningu-mapa ba tuna yia na ihina: ma-mbuhangu ... pawunda-na. 11da panda ana wundana na amana. Nyuna nangangu kameti maraku la ngia palumu - ngia palumu-nja da marapu. Nyuna na-paànga hi na-katuda angungu papaha tau hawiangu. 12Nyuna na-mbuhangu pa-panyonga tau mila, na-rambangu, napàtu-ha da malanja pa-bànjalu tau ma-parutangu lai nyuna. Nalua la u - uma marapu tau manda tandaya i MIRI dàngu na-lumungu marapu pa-mayitangu. 13Nyuna nawua parutangu ma-pa-ana. Naluri ihu napa na tau tungu nu? Ndia-a! Nyuna mbàda wunda ndàba-nahaka nuda da pawunda pa-mayitangu, dàngu jiangu-ma napa nameti! Na metina ruku pawunda wiki-mana.

14Ngera hama tuna nuna na tau na mawunda padangu ma-akatu ka ningu anana tàka nu na anana naita ndàbaha da pawunda amana, na nyuna nda nakiku-anya. 15Nuna na anana nda na-mbuhangu-a pa-lumungu marapu tau Ihirailu, jàka ndia pangangu kameti maraku la ngia palumu - ngia palumu-nja da marapu. Ndedima duna nyuna na-paànga papaha tau hawiangu, 16jàka ndia nda haàtu-ma duna pa-kapidihu-na, jàka ndia paramba-na. Da malanja pa-bànjalu tau ma-parutangu lai nyuna na-pabeli mànu-manja. Na tau rimbangu nawua-nya pangangu dàngu na tau manda ningu kalembi-na nawua-nya paki. 17Ndedima duna nawunda ma-akatu#Da pa-haleli ndai da manda pirada: wunda ma-akatu; (tàngaru-mbuya la ndalaru 8); Imbarani: welingu la tau mamila. jàka ndia pawua parutangu ma-paana. Nyuna na-manundu la u - ukunggu dàngu na-patundungu la hupu liinggu. Nuna na anana nda jia meti-ana ruku njala amana, tàka pa-daingu lurina duna. 18Tàka hauya duna, na amana na ma-mbuhangu pa-panyonga, pa-rambangu#Da pa-haleli ndai da manda pirada: rambangu. dàngu pawunda ma-akatu hawiangu, napa nameti rukuda da njala pa-pandoi wiki-mana.

19Na nyuna talànga wanguna ningu tau ma-paàrangu ka nggikina duna nuna na anana hi nda na-handepa-mbuha da njala amana. Na hemana yiana-ya, rukuna ba nahàmu dàngu na pa-deningu nuna na anana. Nyuna na-karadaku la u - ukunggu dàngu na-tuturu panunju-ha, hi pa-daingu lurina. 20Na tau na mawunda manjala, jiaya duna napa na mameti. Na ana nda lupangu-a ka na-handepa-ha da njala amana, na njàngana, na ama nda lupangu-a ka na-handepa-ha da njala anana. Na tau hàmu napa na-ngalangu limba hàmu ruku pawunda-na na mahàmu. Tàka na tau akatu napa napàda-nya na wunda akatu-na.

21Jàka nda nahili wunda manjala na haàtu tau akatu, dàngu hi na-pakiringu pa-karadaku-nja da u - ukunggu, dàngu ka nawunda mahàmu dàngu ma-padeningu, nyuna nda nameti-a. 22Mbuu ndàba da njalana napa pa-jàmangu-ha; napa naluri-ya, ruku wundana mahàmu. 23Màla nu la pa-ngàdangu-mu nahàmu ihu na etinggu Nyungga MIRI Hupu Majangga jàka nameti na tau akatu? Ndia langatàka-ma! Kurinju-nya ka namàta-nja da njalana ka pa-daingu lurina.

24Na nyuna jàka nda nahili wundapa mahàmu na haàtu tau hàmu, tàka hi pakiringu bia-nanya pawunda ma-akatu, dàngu mbuu ndàba pawunda pa-mayitangu da pakàli wunda tau akatu, na-padaingu ihu paluri? Ndia-a! Da pawunda - pawunda-na da mahàmu, nda ana hau-mbupa pahili pangàdangu. Napa nameti rukuna ba nawunda manjala dàngu ba nda na-tuturu lai Nyungga.

25Talànga wanguna ningu mapanii tuna yiana, ‘Na-paluangu-na lima i MIRI hanjàliru-nanya,’ wàna. Ronguwa dumu ha tau Ihirailu! Hanjàliru-nggunya nu na-paluangu-nggu lima? Nyimima ma-hanjàliru. 26Jàka nda nahili wundapa mahàmu na tau hàmu, tàka hi pakiringu bia-nanya pawunda ma-akatu, napa nameti, rukuna na akatu pawunda-na. 27Na nyuna jàka nda nahili wundapa manjala na tau akatu, tàka na-pakiringu pawunda ma-padeningu dàngu mahàmu, napa namara na lurina. 28Mbàda tanda-naka wiki la mbuu ndàba pawunda-na hi na-pànjangu pawunda njala. Ba tuna nu nyuna nda nameti-apa tàka pa-daingu lurina. 29Tàka nyimi dimi, ha tau Ihirailu. Na-paluangu-na lima i MIRI hanjàliru-nanya wàmi. Hanjàliru-nggunya nu na-paluangu-nggu lima dumu Ihirailu? Ndia-a! Nyimima ma-hanjàliru!” wànanja.

30I MIRI Hupu Majangga napanii, “Ha dimi tau Ihirailu, napa Nyungga ku-patanda-nya ngerana nimbihu-na na tau hama tudana na pawunda-na. Panjilungu-wa welingu la nja - njalami. Àmbu màtanja da njalami pa-patàlaru-ya na wikimi. 31Pànja-njawa mbuu ndàba da akatu pawunda-mi tàka màtawa ka nabidi na kanandingu dàngu na etimi. Ka nggikina hi lupangu imeti? 32Nda nahàmu-a na etinggu jàka nameti na haàtu tau. Dunjaku-njawa da njalami ka pa-daingu lurimi. Nyungga yia MIRI Hupu Majangga mambàda panii,” wàna.

Currently Selected:

YAHAKIALU 18: KAM

Highlight

Copy

Compare