YAHAKIALU 14

I Ala nahuku-nja da ma-lumungu marapu

1Nda ana mapira-ha welingu la liku uru banjaru Ihirailu damai lai nyungga pa-paàra-nya na pambuha-na i MIRI. 2Ka panii-nanggaka i MIRI, 3“Ha dumu tau nda payatangu, da tau yiada mbàda pa-jàmangu-daka wikida la marapu hi da-kanabu la njala. Nggiki hama mbuhangu bianggu ka da-paàrangga Nyungga?

4Jia ba tuna, panii-njawa nyuda ba tuna yia na liinggu Nyungga, MIRI Hupu Majangga, ‘Nimbihu-na na tau Ihirailu na mambàda pa-jàmangu wikina la marapu dàngu na ma-màtangu wikina pa-kanabu la njala, hàla hi mai-danyai pakarai lii panaungu la haàtu wunangu, napa kuhema wikiya Nyungga wàngu hema ma-paràkangu nduma marapu-na da madangu! 5Mbuu ndàbada nuda da marapu mbàda pa-marau-danyaka na banjaru-nggu welingu lai Nyungga, na nyuna màta àruki rukuna nuna na hemanggu ka pabeli wànanya na banjaru-nggu lai Nyungga,’ wàna.

6Peka-mbunja da tau Ihirailu ba panii-nggunya Nyungga, MIRI Hupu Majangga lai nyuda, ‘Panjilungu-wa welingu la nja - njalami dàngu dunjaku-njawa nuda da marapu-mi da ma-palabu eti,’ wàna.

7Nimbihu-na na tau Ihirailu jàka ndia na tau hangàdangu na ma-ndàdiku la honga banjaru Ihirailu, na mamarau-ngga Nyungga hi na-pajàmangu wikina la marapu, hàla hi karai-nanyai lii panaungu la haàtu wunangu, Nyungga wikima napa mahema-ya. 8Napa Nyungga ku-rawaku-ya nyuna hi kutuuya ngerangu nduma tau hawiangu. Napa ku-pahinggilu-ya nyuna welingu la panggolu banjaru-nggu, ka pi-duna-nggaka banjaru-nggu ba MIRI-ka Nyungga.

9Jàka ningu haàtu wunangu pambàda panyonga hi na-wuangu hema manda tubangu, Nyunggama mambàda panyonga-ya. Napa Nyungga Ala Hupu Majangga ku-pahinggilu-ya nyuna welingu la tau Ihirailu. 10Nunakai na wunangu hamangui nyuda nu da makarai-ya na lii panaungu-na, napa da-ngalangu hukungu ma-pahama. 11Hi kuwunda-ha nuda mbuu ndàbada màta na tau Ihirailu ka àmbu nahili maraungga dàngu ka àmbu nahili pa-iraku wikina wàngu njala. Tuna nuduka napa nyuda hi banjaru-ngguha, tàka Nyungga hi Alada nyudaka,” wàna. Nyungga yia, MIRI Hupu Majangga mambàda panii.

I Nuhu, i Ndanilu dàngu i Ayupu

12I MIRI napanii-ngga, “Ha dumu tau nda payatangu, 13jàka ningu hau tana manjala dàngu manda tuturu-ngga Nyungga napa kuhuku-nya nuna na tana. Napa ku-patàlaru-ha da pangangu parima hahana, ku-patàka-nya rimba pa-nggàbalungu dàngu ku-pameti-ha, ka tauya ka bandaya-kai. 14Jiapa ka da-ngiangu-kai lai nu i Nuhu, i Ndanilu#i Ndanilu: Talànga wanguna na-njenjangu ningu-mapa ba haàtu mini la ngoraya la luluku tana Kanaàngu wungangu. Na-kawulangu na tamuna ruku manundu-na. I Ndanilu yiana nda jia-aya na mini la ngora la Mbuku Ndanialu. dàngu i Ayupu, na hàmuda nyuda pa-katailu-da pamara-danya luri wiki-ma-ada. Nyungga yia, MIRI Hupu Majangga mambàda panii.

15Talànga wanguna ku-patàkangu banda bohu pahoba-ha da mangia-nya nuna na tana, hi lupa kanjupu pa-hanggàmaru wànguya na pangia lai nu dàngu nda haàtu-a matoru mbeni pali lai nu. 16Jiapa ka da-ngiangu-kai lai nu i Nuhu, i Ndanilu dàngu i Ayupu tàka kuhara wànya na wikinggu Nyungga, Ala Maluri, MIRI Hupu Majangga, nda da-ngalangu-a pa-pamara-ya jiapa ka nggamu-yakai jiapa ka jiaha da ana wikida ndiambu. Mbulungu nyuda wikia mamara, tàka nu na tana nanjadi-ya maràda bulu.

17Talànga wanguna ku-patàka-nya pabera nuna na tana, dàngu ku-pangàndingu madàka ma-wirungu ka patàlaru-ya, ka tauya, ka bandaya-kai. 18Dàngu jiapa ka da-ngiangu-kai lai nu da tau matailu nuda kawai, kuhara wànya na tamunggu Nyungga, Ala Maluri, MIRI Hupu Majangga, nyuda nu nda jia ngalangu-ada pa-pamara-ya jiapa ka nggamuya-kai, jiapa da ana wikida ndiambu. Mbulungu nyuda-ma-a da mamara.

19Talànga wanguna ku-patàka-nya kanyaki pa-nggàbalungu nuna na tana dàngu ku-hanubuku-nya na hàngganggu lai nu hi lupa da-tàlaru, ka tauya, ka bandaya-kai. 20Dàngu jiapa ka da-ngiangu-kai lai nu i Nuhu, i Ndanilu dàngu i Ayupu, kuhara wànya na tamunggu Nyungga, Ala Maluri, MIRI Hupu Majangga, nda jia ngalangu-ada pa-pamara-ya jiapa ka nggamuya-kai, jiapa da ana wikida ndiambu. Mbulungu da luri wikida nyuda-ma-a da mamara ruku hàmuda nyuda,” wàna.

21I MIRI Hupu Majangga napanii, “Napa kupuha-ha ba patuda da hukungu-nggu da ma-kanjupu mbàringu la Yeruhali pa-patàlaru-ya ka tauya, ka bandaya-kai. Nuda da hukungu jiaya: na pabera, na rimba pa-nggàbalungu, banda bohu dàngu kanyaki. 22Ngera hama tuna jàka era ningu ma-ngalangu paluhu hi da-pamara-ha da anada, hamata-maha jàka damai lai nyumu. Tàngaru-ha ba kanjupu akatu-ha nyuda, ka pàdangu-dimi-nyaka wikimi ba ràka-mana na pa-luangu-nggu lima pahuku-nya na Yeruhali. 23Ka pi-dimi-nyaka ba ma-palatangu-ya mbuu ndàbana na-paluangu-nggu lima. Nyungga yia MIRI Hupu Majangga mambàda panii,” wàna.

Currently Selected:

YAHAKIALU 14: KAM

Highlight

Copy

Compare