YAHAKIALU 13

Na manyura rukuda da wunangu kabàli

1I MIRI napanii-ngga, 2“Ha dumu tau nda payatangu, panjala-hawa da wunangu Ihirailu da matiki manyura pawulu wikida. Paràha-nja pa-patingi-nya na paniinggu,” wànangga.

3I MIRI Hupu Majangga napanii, “Nai a-ai da wunangu nduba nuda! Jiaya na laku kanandingu wiki-ma-ada na ma-runuku-ha dàngu na harii matada ma-kabàli-ma-aya. 4Ha dumu Ihirailu, da wunangu-mu nuda nda ningua linguda, hama tuna ahu rumba da ma-ngiangu la panga bundu watu tanyungguru paraingu-ha. 5Nyuda nda dadai-a la dindi watu da ma-tanyungguru, dàngu nda da-pahàmu-mbuha nuda da dindi watu. Ba tuna, nda peku-ana ka padàdu-nya na Ihirailu jàka natungu na pabera la lodu mainggu Nyungga, MIRI pahuku-nja. 6Da harii matada nyuda ma-kabàli-ha dàngu da manyura-da ma-kambàliku-ma-aha. Dapeka ba ngàndi-danya lii langu welingu lai Nyungga, tàka nda ana paràha-anggunja nyuda. Nggiki hama pekuna nyuda la pamonu-nja ba na-hàrangu napa na manyura-da? 7-8Nyungga, MIRI Hupu Majangga kupanii-nja nyuda, ‘Da harii matami nuda ma-kabàli-ha dàngu da manyura-mi ma-kambàliku-ha. Nyimi ipanii ba lii langunggu Nyunggaha nuda mbuu ndàbada, tàka nda ana panii dà-anggunggai duku! Tuna nu duka napa hi papa-mingga Nyungga. 9Napa kuhuku-nggai nyimi, ha dimi wunangu mapeka manyura kambàliku dàngu ma-pangàda-nya la laku kanandingu-mi da harii mata! Nda peku-amipa nyimi patama-nya na-wuangu botangu la ba - batangu-na na banjaru-nggu. Da tamumi pa-podahu-ha welingu la kabihu Ihirailu dàngu ndai beli-apa la tana wikimi. Ka pi-dimi-nggaka ba MIRI Hupu Majangga-ka Nyungga.

10Ha dimi wunangu kabàli! Mbàda panjàra-minyaka na banjaru-nggu, mbuu ndàbana lànyapu hàmu-nanyaka ba wàmi. Tàka nggi ma-ngiangu lànyapu-na! Na banjaru-nggu mbàda pahadangu-naka dindi watu wàngu watu rara ma-tayonggahu na wandalungu-da, hàlaka nu ka mai-minyaka nyimi pa-apihu-nya kapu. 11Ha dimi, wunangu kabàli, napa na-tanyungguru na dindi watumi. Napa ku-papurungu ura kawalu. Napa na-nàhaku-ya làpuru na dindi watumi dàngu na-pinjalu-nya ura watu mboka, 12hi lupa na-tanyungguru, tàka napa na-paàrangu ndàba na tau nggàra linguna ba apihu-nya kapu nina na dindi watu, wàda,’ ” wàna.

13I MIRI Hupu Majangga napanii, “Wàngu hàngganggu, napa ku-patàka-nya na làpuru, na ura kawalu dàngu na ura watu mboka pa-nyungguru-ya nuna na dindi watu. 14Kuwuku-ya la pa-nyungguru-ya na dindi watu na pa-apihu-mi kapu, palu - lunggaru-ya hi jiaya na lata-anaka. Napa na-pinjalu-nggai dàngu na pameti ndàbakai paraïna dindi watu nuna. Ka pi-dimi-nggaka ba MIRI-ka Nyungga.

15Nuna na dindi watu dàngu nyimi mambàda apihu-nya kapu napa ipàdanya na hàngganggu na ma-mbàringu. Hàlaka nu hi kupanii-nggai ba mbàda kabu-naka na dindi watumi hama tuna nyimi ma-apihu-nya kapu, 16ha dimi wunangu kabàli! Lànyapu hàmu-nanyaka na Yeruhali wàmi bai panii, tàka nggi ma-ngiangu lànyapu-na!” wàna. Tuna nu napanii-na i MIRI Hupu Majangga.

Na manyura ndumada da kawini wunangu kabàli

17Napanii i MIRI, “Nàhu ha dumu tau nda payatangu, hamata-hawa da kawini manyura la honga banjaru-mu. Panjala-hawa nyuda, 18dàngu patàka-njawa jàka nggàraya na papanii-nggu Nyungga, MIRI Hupu Majangga lai nyuda;

‘Nai a-ai nyimi dimi, ha kawini manyura! Nyimi ipandoi-nja kara boharu dàngu tamalingu mamendi nduma mbuu ndàba na tau, màta na tau na mapaki-ha ka na-kawaha-ya na luri tau hawiangu. Nyimi imbuhangu pa-kawaha-ya na luri dàngu na metina na banjaru-nggu, tàka hi ipakiya nuna na kawaha nduma pautu wàmi wikimi. 19Mbàda pawawa-minggaka la hangga banjaru-nggu keha ka ngalangu wàngu nda ana pira upu kamànggihu dàngu nda ana pira kadipu rotima-a. Da tau manda njala, ipameti-ha tàka da tau ma-ràkangu pameti imàtanja paluri. Ndumana nuna ikambàliku-nya na banjaru-nggu tàka hi darongu-kai nyimi,’ ” wàmunja wànangga.

20I MIRI Hupu Majangga napanii-nja nuda da kawini da ma-pahada wunangu, “Huda-manggunya ba kuita-ha da kara boharu papaki-mi ka kawaha wànya na luri dàngu na metina na banjaru-nggu. Napa ku-ràmbitu-ha nuda da kara welingu la limami, tàka hi ku-pahàla-ha da tau pa-kawaha-mi.#La ndalaru 20 (hilu Imbarani) hauna na lawiti kareuku na manda lohangu jàka nggàra wàna na ma-panduangu pa-mumuku. 21Da tamalingu mendimi napa kuhira-ha, tàka hi ku-pahinggilu-ya na banjaru-nggu welingu la pangaru akatu-mi lundu nu - nu. Ka pi-dimi-nggaka ba MIRI-ka Nyungga.

22Da tau hàmu da panda nggi - nggikinggu, ipakudu-ha da etida wàngu kambàliku-mi. Da tau akatu ipabokulu-ha da etida ka da-padaingu panjala hi nda pa-pahàla-ha. 23Nàhu dira-daka da harii mata kabàli dàngu da manyura kambàliku-mi. Ku-pahàla-ya na banjaru-nggu welingu la pangaru akatu-mi. Ka pi-dimi-nggaka ba MIRI-ka Nyungga,” wànanja.

Currently Selected:

YAHAKIALU 13: KAM

Highlight

Copy

Compare