YAHAKIALU 12
12
Ba tau yilangu-ya i Wunangu Yahakialu
1Napanii dàngga nyungga i MIRI, 2“Ha dumu tau nda payatangu, nyumu ngiangu-munya la honga banjaru patula ngganggangu. Ningu matada, tàka nda daita-a; ningu kahilu-da, tàka nda darongu-a, nadu ba da-mbuhangu pa-patula ngganggangu.
3-6Jia ba tuna ha dumu tau nda payatangu, ba naharii-ipa, kamomatu-ha da kanaingu-mu la kawuhuku hama tuna na pakàli wàda da tau pa-wàrungu. Ba ndedi na-rudungu, laku pa-lohangu-wa hama tuna tau pa-dundilu la ngia pa-wàrungu. Pandoi-wa mambowa la dindi umamu ba dàngu hakahii-nanya paraïna banjaru na ma-patula ngganggangu, dàngu luhu ngàndi-yawa nuna na kawuhuku kanaingu-mu la mambowa nuna. Dukuya la kundumu nuna na kawuhuku. Lakuwa la kapàta rudungu; pandàbi-nja da matamu hi ndau itaya na ànda ngia palimu. Màtawa nggubulu-na na banjaru Ihirailu ka naita-ya nuna na pawunda-mu ka pa-pangàdangu wànguya lai nyuda. Raï ai duna hi da-pàdangu bia wikida ba tau patula ngganggangu-ha nyuda,” wànangga.
7Hàla hi kununju-ya na hupu liina i MIRI lai nyungga. La lodu numa, ba naharii-ipa, ku-kamomatu-ha da kanaingu-nggu la kawuhuku, hama tuna na pakàli wàda da tau ma-yilangu. Ba na-rudungu-ka, kupandoi wàngu limanggu mambowa la dindi watuna na umanggu, hi kuluhu ningu la mambowa nuna. Ba dangu hamata ndàba-nangga tau, kuduku-ya la kundunggu na kawuhuku, hàlaka nu hi kulaku.
8Hadangu harii napanii dàngga i MIRI, 9“Ha dumu tau nda payatangu, na banjaru Ihirailu, nu na banjaru patula ngganggangu paàra-danggauka nyumu jàka nggàraya na pawunda-mu nàhu. 10Jia ba tuna patàka-njawa nyuda jàka nggàraya na papanii-nggu Nyungga, MIRI Hupu Majangga lai nyuda. Nuna na lii langunggu pa-pandumangu-ya na maràmba la Yeruhali dàngu mbutana na ihi paraingu. 11Kaloka-njawa nuna na pawunda-mu ba ninu maü-nanya napa na matàka-nja nyuda, jia duyaka: napa nyuda tau ma-yilangu dàngu ma-tanawangu-ha. 12Napa la kapàta rudungu naduku kawuhuku-na la kunduna hi nalaku na maràmba-da. Dapandoi-nya mambowa la dindi watu paraï da tau ka peku luhuda. Napa na-pandàbi-nja da wua matana hi nda naita-ya na ànda ngia palina. 13Tàka Nyungga napa kunduha-ya na jalanggu ka yàpaya nyuna. Hàla napa kungàndi-ya la parai Mbambilu lai nuya napa nameti ningu dàngu nda ana ita-nanya nuna na paraingu. 14Napa kupai - ihanja la nggi - nggini, mbuu ndàba da ma-ndàdiku la uma maràmba, pa-pohungu da ama bokulu dàngu ma-karaha-ya na maràmba. Napa nyuda kunyara-ha hi ku-pameti-ha.
15La rehi pai - iha-nggunja la honga ba - banjaru hawiangu la ta - tana tau hangàdangu, napa dapingga ba MIRI-ka Nyungga. 16Napa hakudu-ma-ada welingu lai nyuda da pa-pamara-nggu welingu la pabera welingu la rimbangu, dàngu kanyaki, màta la hongada nuda da banjaru hangàdangu ka da-pàdangu wikida ba kanjupu iraku-ya na pambàda wundada. Ka pajia-danyaka ba MIRI-ka Nyungga,” wàna.
Na wunangu na ma-kandàndaku
17I MIRI napanii-ngga, 18“Ha dumu tau nda payatangu, nda - ndànda-muwa ba talànga ngangumu, dàngu ra - rànggu-muwa paraï pa-mangàdatu ba talànga unumu. 19Patàka-nya na banjaru mbuu ndàbana jàka nggàraya na papanii-nggu Nyungga, MIRI Hupu Majangga la ma-mandapu-nya na Yeruhali da ma-ndàdiku-ipa la tanada. Napa nyuda nda - ndàndada ba talànga nganguda, dàngu ra - ràngguda paraï pa-mangàdatu ba talànga unuda. Napa nabulu na tanada ba panua likungu-madanya papangga uku mbuu ndàbada da tau ma-ndàdiku lai nu. 20Da paraingu mambinu ma-mandapu-nja nàhu, napa pa-pakabu-ha dàngu da woka napa maràda màduha. Ka pi-duda-nggaka ba MIRI-ka Nyungga, wàna wàmu,” wànangga.
Na lawiti pangerangu na-pambuhangu dàngu na lii langu panda mbuhangu
21I MIRI napanii-ngga, 22“Ha dumu tau nda payatangu, ka nggikina da tau Ihirailu hi da-mbuhangu pakàli tikiya na lawiti pangerangu yiana, ‘Na rehi na-pahilungu, tàka da panyura nda daera la pa-hàrangu’? 23Màla, patàka-nyawa lai nyuda ba yiana-ya na pahema wànggu Nyungga, MIRI Hupu Majangga: Na lawiti pangerangu nuna napa ku-podahu-ya hi lupa nda pahili tiki-ayapa la Ihirailu. Pekanja na hiluna, ba toma-nanyaka na rehi dàngu nimbihu-na na panyura napa na-hàrangu.
24Napa la Ihirailu nda ningu-apa harii mata dàngu manyura manda deningu, 25Nyungga, MIRI Hupu Majangga napa kupanii dànya na banjaru Ihirailu, dàngu mbuu ndàba da papanii-nggu jianguma napa da-hàrangu, wàngu nda hili pare - rehi-anyapa. Patingingu, ha dimi banjaru patula ngganggangu! Mbuu ndàba da pa-panamu-nggunggai napa ku-pahàra-nja la rehi lurimi. Nyungga yia, MIRI Hupu Majangga mambàda panii,” wàna.
26I MIRI napanii-ngga, 27“Ha dumu tau nda payatangu, dapanii da tau Ihirailu ba dira mandai-mayapa la lodu malamiri hi namangu pa-hàrangu na harii mata dàngu na manyura-na, wàdanggau. 28Jia ba tuna, panii-njawa nyuda ba Nyungga yia, MIRI Hupu Majangga màngu wàngu: Mbuu ndàba da papanii-nggu jianguma napa da-hàrangu, wàngu nda hili pare - rehi-anyapa. Nyungga yia, MIRI Hupu Majangga mambàda panii!” wàna.
Currently Selected:
YAHAKIALU 12: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
