LUHU 7
7
1I MIRI napanii-nya i Muha, “Nyumu napa kutukau hama tuna Ala la hanggana na hanganji, tàka i Harungu angumu paluhu ka napanii lai nyuna hama tuna wunangu-munya. 2Patàka-nja lai Harungu mbuu ndàbada da pambàda panii-nggunggau. Paràha-nya i Harungu ka na wàlahu-nya na hanganji, ba na-pahia-manja bàdi da tau Ihirailu pa-dunjaku-nya na tana Mehiru. 3Na nyuna napa Nyungga ku-pamalihu-ya na katiku-na na hanganji. Napa nyuna nda na-wàrihu-akau, jiapa-kadu ka ku-patàka-nya ura pàda da - dangu la Mehiru. 4Jia-duyaka nu napa kuhuku-nya na Mehiru ba kuwànya hukungu mambotu jua, tunaka nu hi kumangu pa-karia hàlanya nggubulu-na na banjaru Ihirailu, na banjaru-nggu, paluhu welingu la tana nuna. 5Nu hina-duka napa na tau Mehiru hi napinya Nyungga yia ba MIRI-ka, nu la rehi huku-nggunya dàngu ba ku-karia-nyaka paluhu na Ihirailu welingu la tanada,” wàna. 6I Muha dàngu i Harungu danunju-maya na pareta-na i MIRI. 7I Muha walu kambulu ndaunaka na lurina, tàka i Harungu walu kambulu tailu mbua ndaunaka, ba jiaya na hurungu-da la hanganji Mehiru.
Na tokungu-na i Harungu
8I MIRI napanii-nja i Muha dàngu i Harungu, 9“Jaka nakarai-kai na hanganji, tu bàdi pa-hangàtarungu ka tandaya jàka wànanggai, paràha-nya i Harungu ka napiti-ya na tokungu-na ka natòku-nya la tana la hanggana na hanganji. Napa nuna na tokungu na-pambeli-ya ularu,” wànanja. 10Ka lua-danyaka i Muha dàngu i Harungu pa-hurungu la hanganji, dàngu hi dawànya jàka nggàraya na pareta-na i Ala. I Harungu natòku-nya na tokungu-na la hanggana na hanganji dàngu da panggawi-na, ka pambeli-nanyaka ularu nuna na tokungu. 11Jia-duyaka na hanganji-mbu hi napaau-nja da tau maningu alimuu dàngu da mamàhi pa-kabeli mata, dawàngu-mai matungu nu ba dawàngu kabeli matada. 12Datòku-nja da tokungu-da la tana, ka pambeli ularu-madu-haka. Tàka na tokungu-na i Harungu na-kawàluku-maanja da tokungu-da nyuda. 13Jiapa ba tuna nu, dàingu-mana na hanganji ba na-malihu katiku-na, nda na-wàrihu-aha da paniida i Muha dàngu i Harungu, hama tuna ba mbàda wàna i MIRI.
Da ura pàda la Mehiru
Na wai na-pambeli-ya ria
14Tunaka nu panii-nanyaka i MIRI lai Muha, “Na hanganji nuna lalu mbana malihu katiku-ya, nda nabihu-a papuli-nya na tau Ihirailu palaku. 15Jia-duya lua toma-yawa nu la mba - mbaru, ba talànga puruna la Luku Nilu. Ngàndi-maya na tokungu na mapeku pa-pambeli-ya ularu dàngu kau napaya na tàkana la hingi luku. 16Kau pekanya na hanganji: i MIRI, Ala tau Imbarani, na-palewa-ka pa-patàka-nggau nyumu Miri, kau pulinya na banjaru-na palaku palumu-nya Nyuna la maràda telangu. Ba tuna lundu nàhu nyumu Miri ndau bihuma pa-patingingu. 17Jia-duyaka i MIRI hi napanii tuna yia, ‘Rukuda jàka nggàraha da pa-patumbu-nggu napa, hina-duka hiu pingga Nyungga ba MIRI-ka. Wànya na tokungu yiana napa nyungga kupalu-ya na pinu wai luku, hi na-pambeli-ya wai ria. 18Da iyangu napa dameti, na luku yiana napa nawau muhungu, hi lupa nda pekuna na banjaru Mehiru la paunu-nya na waina,’ wàmunya,” wànanya.
19I MIRI napanii-nya i Muha, “Paràha-nya i Harungu ka napiti-ya na tokungu-na, ka na-jakaru-nya la mbuu ndàbada da luku, da londa dàngu ramuku la Mehiru. Na waina napa na-pambeli-ya wai ria, dàngu la nggubulu tana Mehiru napa ria juaya, lupa la karaba - karaba ai dàngu la mbàlu - mbàlu watu,” wànanya.
20I Muha dàngu i Harungu dawa hàla-manya na pa-pareta-nanja i MIRI. La hanggana na hanganji dàngu da panggawi-na, i Harungu na-jakaru-nya na tokungu-na, hi napalu-ya na wai Luku Nilu, ka pambeli waria-madua-yaka na waina. 21Ka meti-danyaka da iyangu la luku, hi nawau muhungu ailulu, hi lupa nda peku-napa na tau Mehiru la paunu-nya na wai. La nggubulu tana Mehiru ria juaya. 22Tàka da tau mapingu kabeli mata datumai duda ma-hamangu ba dawàngu kabeli matada, ka lupa pa-daingu duna-nyaka na hanganji pa-malihu katiku-na. Hama tuna ba mbàda wàna i MIRI, nda nabihu-ma duna na hanganji parongu-ha i Muha dàngu i Harungu. 23Màlai ba nabeli la uma nda ana ihilii-mananya duna hawutu nuna na matumbu. 24Mbuu ndàbana na tau Mehiru daàki lambongu la hingi luku ba dahimbu wai pa-unungu, nadu na wai luku ba nda peku unu-danya.
25Pihu mbua lodu ma-làpahu la hambeli ràtu-nanya na Luku Nilu i MIRI.
Currently Selected:
LUHU 7: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
