LUHU 6

I Ala na-paau-nya i Muha

1I Ala napanii-nya i Muha, “Nyungga MIRI-ka. 2Nyungga ku-paitangu wikinggu lai Ambarahàmu, i Ihàku dàngu i Yakupu, Nyungga ba Ala Mahupu-mbihaka, tàka ndedia kupeka-nja nyuda ba MIRI-ya#MIRI: tàngaru-ya la 3:14. na tamunggu. 3Nyungga kutura-mbuyaka na pa-ràndingu dàngu nyuda. Kuràndi-ha napa ba kuwua-nja nyuda na tana Kanaàngu, tana ngia pa-ngiangu-da ba tau tàkaha làti àmangu. 4Kurongu-mahaka kanjaïku-da da tau Ihirailu, ba daata-nja banjaru Mehiru, nu ka namu-dunggu-nyaka na pa-ràndingu-nggu. 5Jia ba tuna pakada-nyawa la banjaru Ihirailu, ba peka-nggunjaka nyuda: Nyungga MIRI-ka; nyimi napa ku-pahàla-kai welingu la ata-nanggai banjaru Mehiru. Napa ku-pajiliku-nya na mbihanggu na ma-mbàringu la pa-pamara-kai nyimi dàngu ba kupuha-nya hukungu mbotu na banjaru Mehiru. 6Nyimi kutukai banjaru-nggu, tàka Nyungga Ala-minggaka. Napa nyimi kai pinya Nyungga yia MIRI, Alami, na ma-pahàla-kai welingu la paata la Mehiru. 7Nyimi napa ku-karia-nggai la tana na paràndi-nggu wàngu harangu lai Ambarahàmu, i Ihàku dàngu i Yakupu; na tana nuna napa kuwua-nggaunya nyumu ka mangu wiki-munya. Nyungga MIRI-ka,” wàna. 8Nudaka da papanii-na i MIRI na-patàka hàla-manya i Muha la banjaru Ihirailu, tàka nyuda nda da-wàrihu-ayapa i Muha, nadu na dedida ata ba lalu mbàringu-ya, hi lupa nambota na monunguda.

9Tunaka nu i MIRI napanii-nya i Muha, 10“Luawa kau hurungu la hanganji Mehiru, kau paniinya, nyuna napuli-nya bàdi na banjaru Ihirailu pa-dunjaku-nya na tanana,” wàna.

11Tàka nahema i Muha, “Jiapa da tau Ihirailu wiki nda dabihu-mbu pa-patingi-ngga. Nggiki peku-naka na hanganji Mehiru ka na-patingingu tau manda pingu pa-kareuku hama tuna nyungga?” wàna.

12Tuna nuduka i MIRI ba na-pahuru-nja i Muha dàngu i Harungu pa-patàka-nya pulungu na banjaru Ihirailu dàngu na hanganji Mehiru, ba nyuda pa-patanggu-na i MIRI la pairu ngàndiya na banjaru Ihirailu paluhu welingu la Mehiru.

Na ruku dedida i Muha dàngu i Harungu

13Yiada-haka da ruku dedida i Muha dàngu i Harungu: i Rumbingu, kawunga anana i Yakupu, dapatu da anana mini: i Henuku, i Palu, i Hehirungu dàngu i Kàrami. Nyuda jia-duhaka da boku la mangilu-da da biliku la kabihu Rumbingu. 14I Hamiungu dàngu papaha-na na kawini Kanaàngu, da nomu da anada mini: i Yemuilu, i Yamingu, i Ohàtu, i Yakingu, i Hohàru dàngu i Haulu. Nyuda-duka da boku la mangilu-da da biliku la kabihu Hamiungu. 15I Lewi datailu da anana mini: i Nggerihongu, i Kehàtu dàngu i Marari; nyuda-duka boku la mangilu-da da biliku la kabihu Lewi. I Lewi natoma 137 mbua ndaungu na lurina. 16I Nggerihongu dadua da anana mini: i Lipuni dàngu i Himei; nyuda dadangu da wàla wuada. 17I Kehàtu dapatu da anana mini: i Àmuràmu, i Yihàru, i Hemburungu dàngu i Uhialu. I Kehàtu natoma 133 mbua ndaungu na lurina. 18I Marari dadua da anana mini: i Màhali dàngu i Muhi. Jia-duhaka nuda da biliku la kabihu Lewi dàngu wàla wuada nimbihu-da.

19I Àmuràmu na-kanoma-ya i Yòkuhembitu, erina kawini na amana, tàka da anada jiaha i Harungu dàngu i Muha. I Àmuràmu naluri 137 mbua ndauna.

20I Yihàru dua haàtu-da da anana mini: i Kora, i Nepiku dàngu i Hikiri. 21I Uhialu jia-mayai ba dadua haàtu da anana mini: i Mihailu, i Elihapàngu dàngu i Hitiri.

22I Harungu na-kanoma-ya i Elihemba, anana kawini i Aminandàpu; i Elihemba da paangu dedi dàngu i Nahahungu. I Elihemba na-paana-nja i Nandàpu, i Ambihu, i Eliahàru dàngu i Itamàru. 23I Kora dua haàtu-da da anana mini: i Ahiru, i Elikana, dàngu i Ambiahàpu. Nyuda jia-haka da boku la mangilu-da da nua biliku Kora. 24I Eliahàru, na anana mini i Harungu, na-kanoma-ya na haàtu na anana i Putialu, tàka na anada nyuda jiaya i Pineha. Nuda-haka mbuu ndàbada da kapala biliku dàngu da kapala kuru uma la kabihu Lewi.

25I Harungu dàngu i Muha jia-duhaka da pawua-na pareta i MIRI la pa-karia-nja da tau Ihirailu paluhu welingu la Mehiru. 26Nyuda pa-kadua-da da-hurungu la hanganji Mehiru ka na-pahàla-nja da tau Ihirailu.

I MIRI nawua-nja pareta i Muha dàngu i Harungu

27I MIRI ba napanii dànya i Muha la Mehiru, 28napanii i MIRI, “Nyungga MIRI-ka. Patàka-manya na hanganji Mehiru mbuu ndàba-daka da pambàda panii-nggunggau,” wànanya.

29Tàka nahema i Muha, “Dou MIRI, bau pi-madungga ba nda kupingu pa-kareuku. Nggiki peku-naka na hanganji ba na-patingi-ngga?” wàna.

Currently Selected:

LUHU 6: KAM

Highlight

Compare

Copy