LUHU 39

Pandoi ngaü ratu

(Lu. 28:1-14)

1I Mbahaleyilu dàngu i Ahuliapu dapandoi paki pa-lumungu wàngu tera hawulu kawuru, mbaü atu dàngu rara ndumada da ratu la rehi paloku-da la Rowa Matua. Da paki ratu ndumana i Harungu da-pandoi-ya hama tuna na pareta pawua-na i MIRI lai Muha.

2Na eputu pa-pandoi welingu la tera linangu tamainangu, tera hawulu kawuru, mbaü atu dàngu rara, dàngu lulu kamba àmahu rara. 3Datuku-ha da kambitaku àmahu rara hàla hi dairi - irihu-ha hi da-mirihu hama tuna lulu kamba, hàla hi datinu paangu-nja lulu kamba linangu tamainangu dàngu lulu kamba hawulu kawuru, mbaü atu dàngu rara. 4Hàlaka nu hi da-pandoi dua walangu liku kundu pahondu wànya na eputu na pautu la karaha-na. 5Na boru bànggi patinu pa-mapihungu da-pandoi-ya welingu la ma-hamangu tàka hi utuya la eputu hi da-mbulungu hama tuna na pareta pawua-na i MIRI lai Muha. 6Dadeli watu mata tawuru ndalima hi tuya la halaya àmahu rara. Ruku tanjiku-na na màhida da-huratu-ha da tamuda da hakambulu madua anana i Yakupu nu la watu. 7Tunaka nu nuda da watu datuha la liku kudu eputu ka tanda panamu wànja da hakambulu dàmbu kabihu Ihirailu, hama tuna na pareta na pawua-na i MIRI lai Muha.

Pandoi nggàbi kuru

(Lu. 28:15-30)

8I Mbahaleyilu dàngu i Ahuliapu da-pandoi nggàbi kuru hamada da pawàngu ba pandoi-ya na eputu, dàngu na pa-hikungu-na hama-mbuda. 9Na hadana na-palarangu ba lapitu padua-ya, na mbàlaru-na dàngu na malaina hama-mada nimbihu-da ba 22 hiti-metiru-da. 10Nu la nggàbi kuru, datuha ba patu ndalaru-da da watu mata tawuru. La ndalaru kawunga, watu mata tawuru ndalima, topahu dàngu mbainduri ma-paninu. 11La ndalaru padua wàna: watu jamurutu, watu nilamu dàngu itangu. 12La ndalaru patailu wàna: watu lanjuwandiru, akiku dàngu watu wàla mbunguru. 13La ndalaru papatu wàna: watu piruhu, yakutu dàngu ràtana ma-wingiru wàla. Nuda ba hakambulu dàmbuda da watu mata tawuru pahondu wàngu àmahu raraha. 14La nimbihu watu mata tawuru pa-huratu-ya na tamu haàtu welingu la hakambulu madua anana i Yakupu ba jiaha da tanda panamu wànja da kabihu Ihirailu. 15Hàla hi da-pandoi dua walangu lulu kanàtaru àmahu rara ihi mbàngina na pa-paputi likungu. 16Da-pandoi-mbu dàmbu kara àmahu rara da patuu la hupu dita hapapa - hapapa-na na nggàbi kuru. 17Hàla nu da dua walangu kanàtaru hi pahaunja la dàmbu kara àmahu rara nuda, 18tàka da hupu - hupu hapapa-da pahondu-ha la halaya ba dàmbuda, hi peku panuangu-na na nggàbi kuru la liku kundu ngia ngabana na eputu. 19Hàla hi da-pandoi dàmbu kara àmahu rara da patuu la nggàbi kuru, la hupu wawa mbara daluna na manggàna-ya na eputu. 20Hàlaka nu da-pandoi dàmbu kara àmahu rara da patuu ngia ngaba la liku kundu eputu ba dua walada, la lihi ngia pa-pajàmburu utuna mbara wawa hawutu, la dita boru bànggi na patinu pa-màpihungu. 21Nunjuya na pareta-na i MIRI lai Muha, na kara nggàbi kuru panua wànya liku kawuru la kara eputu, hi lupa na-padaingu na nggàbi kuru la dita boru bànggi tàka hi nda na-pahàlangu.

Pandoi hili hau paki nduma ratu

(Lu. 28:31-43)

22Na kalembi pahàlangu na pahau la pinu eputu nggubulu-na pa-pandoi welingu la tera hawulu kawuru-ya. 23Na mbowa nggoruna pautu pa-ndapilu-nya liku pa-tinungu ka àmbu namuda pa-kahira. 24-26La weli winggiru hingi wawana pandoi-nya pa-manandangu wàna wua ndalima welingu la tera linangu tamainangu dàngu tera hawulu kawuru, mbaü atu dàngu rara, pahe - henaku-nja ana katàngu àmahu rara nunjuya na pareta-na i MIRI lai Muha.

27Da-pandoi kamenja ndumana i Harungu dàngu da anana, 28dàngumbu tera lenju hakalaki kababa welingu la tera linangu, 29dàngu boru bànggi tera linangu tamainangu, tera hawulu kawuru, mbaü atu dàngu rara, pa-mananda wànya pa-hikungu, hama tuna na pareta-na i MIRI lai Muha. 30Pa-pandoingu-mbuya pa-manandangu wàna welingu la àmahu rara ihi mbàngina, tandana ba pa-panudangu ndumana i MIRI-ha. Nu la pa-manandangu wàda pa-huratu-ya na matuna yia, “Pa-panudangu ndumana i MIRI-ya,” wàna. 31Na pa-manandangu wàngu patuya la tera lenju la tuba kaba mata nunjuya na pareta-na i MIRI lai Muha.

Na njàpuna na paràma

(Lu. 35:10-19)

32La malamiri njàpu hàla-nanyaka na paràma ba wuluya na Maüna i MIRI. Da tau Ihirailu da tutu hàla-maya hama tuna na pareta-na i MIRI lai Muha. 33Nyuda dangàndinya i Muha na Maü dàngu mbu ndàbana na pa-pamàtu wàna, da ketuna, da ai boruna, da punduku dàngu latada, 34na ndàbi manula kamàmbi bumbu na pandongu, na ndàbi manula malijangu, na tera pandàdangu. 35Na Pàti Pa-ràndingu na ma-ihingu watu da madàmbu-da dàngu da ai duku dàngu na ndàbina, 36na menja dàngu mbuu ndàbada da pamàtu wàna dàngu da roti mangejingu, 37na tandai palita àmahu rara ihi mbàngina, da palita dàngu mbuu ndàbada da pamàtu wàda, mina nduma palita, 38na ngia pawotu maraku àmahu rara, mina lii, dupa mbii kati, na tera dimba pindu Maü, 39na ngia pawotu maraku wudu dàngu na lulu wudu pa-jilungu, da ai duku dàngu mbuu ndàbada da pamàtu wàna; na karaba ngia pabaha dàngu na latana, 40da liru ndumana na talora dàngu da punduku dàngu latada, na tera dimba pindu bokulu-na na talora lupa da liku, da kandutuku Maü; mbuu ndàbada da kanaingu da pawàngu daa la Maü, 41dàngu da paki pa-lumungu wàngu ndumada da ratu jàka rehi paloku-da la Rowa Matua dàngu da paki pa-panuda-nja i Harungu dàngu da anana. 42Na tau Ihirailu nanunju hàla-maya na paràma hama tuna na pareta-na i MIRI lai Muha. 43I Muha na-pareha hàla-maha hi naita-ya ba mbàda ràma-danyaka ba jia pawingungu-ma hama tuna na pareta-na i MIRI. Ka pakanyuru-nanjaka paraïna i Muha.

Currently Selected:

LUHU 39: KAM

Highlight

Compare

Copy