LUHU 40

Ba da-pahada-nya na Maüna i MIRI dàngu pa-panuda-nya i MIRI

1I MIRI napanii-nya i Muha, 2“Pahada-nyawa na Maünggu la kawunga lodu kawunga wulangu. 3Patama-nya daa na Pàti Pa-ràndingu, pangia-da da Hakambulu Pareta, dàngu hakalu-nya na tera dimbaku la hanggana. 4Tuya lai nu na menja dàngu da pamàtu wàna. Patama-mbunya na tandai palita dàngu pakehi-nja da palita-na. 5Bànjalu-ya na ngia pawotu maraku àmahu rara na ngia patunu dupa la hangga Pàti Pa-ràndingu, dàngu tiwalu-nya na tera dimbaku la pindu Maü. 6Tuya na ngia pawotu maraku nduma kameti maraku patunu la hangga pindu Maü. 7Tuya na karaba wai la manggawa Maü dàngu na ngia pawotu maraku, hàla paihi-nya wai. 8Tunaka nu wàlahu-ha da liru weli winggiru-nya na talora-na na Maü dàngu tiwalu-nya na tera dimbaku pindu bokulu talora.

9Tunaka nu na Maü dàngu mbuu ndàbana na pamàtu wàna lupangu-ma kau maraku wànya lai Nyungga bau wàngu pa-pamina wànya mina lii, nu mbuu ndàbada pa-panudangu-haka lai Nyungga. 10Maraku wànyawa na ngia pawotu maraku dàngu mbuu ndàbana na pamàtu wàna, bau wànya na matuna nu, ka panuda-ngganya Nyungga nggubulu-na. 11Tumunya numai na karaba wai dàngu na latana.

12Hàlaka nu, paràha-nya i Harungu dàngu da anana ka da-hurungu la pindu Maü dàngu ka dabaha wikida. 13Panggàna-nya da paki ratuna i Harungu, dàngu kau pamina-nya ka peku panuda-ngganya la palumu-ngga Nyungga ba ratuya. 14Hàla kau paràha-nja da anana ka da-hurungu pa-mareni dàngu kau panggàna-nja kamenja nyuda. 15Hàla kau pamina-nja hama tuna bau pamina-nya na amada, ka peku lumu-dangga Nyungga ba ratuha. Wànya na lii pa-minangu nuna, na kabihu-da nyuda lundu wàla wuada, jia-haka da makata-nya na waingaba ratu,” wàna.

16I Muha nalaku hàla-manya hama tuna na pareta pawua-na i MIRI. 17La kawunga lodu kawunga wulangu, la ndaungu padàmbu wàna ba da-dunjaku-nyaka na Mehiru paraï da tau Ihirailu, pandàngi-danyaka na Maüna i MIRI. 18I Muha na-bànjalu-ha da latana, na-pahada-nja da karangga-na, natuha da ai borungu-na dàngu hi na-pandolaku-ha da punduku-na. 19Hàlaka wàlahu-nanyaka na toku ndiduna na Maü ba na-pandàbi-nya dita la hambeli-na hama tuna na pareta-na i MIRI. 20Tunaka nu hi na-patama-nja da watu da madàmbu-da daa la Pàti Pa-ràndingu. Hàla i Muha hi natuya na ndàbi pàti, hi napahau-nja da ai duku daa la karana. 21Hàla hi na-bànjalu-ya nuna na pàti daa la Maü dàngu hi na-tiwalu-nya na tera dimbaku la hanggana, hama tuna na pareta-na i MIRI lai nyuna.

22Tunaka nu i Muha hi na-bànjalu-ya na menja daa la Maü, la mbara dia la hambeli tera, 23hàla la pinu menja na-bànjalu-ha da roti mangejingu, hama tuna na pareta pawua-na i MIRI lai Muha. 24Na tandai palita na-bànjalu-ya daa la Maü, la mbara luru da-papapangu dàngu na menja, 25hàla, hi paroka-ha da palita la hanggana i MIRI. 26Na ngia pawotu maraku àmahu rara na-bànjalu-ya daa la Maü la hangga tera dimbaku, 27hàla tunu-nanyaka dupa mbii kati hama tuna na pareta pawua-na i MIRI lai Muha. 28I Muha na-tiwalu-nya na tera pindu Maü, 29dàngu la hanggana na pindu natuya na ngia pawotu maraku nduma kameti maraku patunu. La pinu ngia pawotu maraku nuna na wotu hunggu maraku patunu dàngu hunggu pa-mangejingu. 30Na karaba wudu natuya la manggawa Maü dàngu ngia pawotu maraku, hàla hi na-paihi-nya wai. 31I Muha, i Harungu dàngu da anana dabaha wihi dàngu limada lai nu, 32handàka tama - handàka tamada la Maüna i MIRI dàngu jàka dalihi-nya na ngia pawotu maraku. 33La winggiru-na na Maü dàngu na ngia pawotu maraku nyuna i Muha na-wàlahu-nya liru dàngu hi na-tiwalu-nya tera na pindu bokulu talora. Ka lundungu hàla-duna-nyaka nuna na paràma.

Na panggàbalu-nya karumangu na Maüna i MIRI

(Di. 9:15-23)

34Tunaka nu puru-nanyaka na karumangu hi na-panggàbalu-nya na Maüna i MIRI, tàka na Maü hi na-hulungu wàngu handaraku ba ninya i MIRI. 35Jia-duyaka hi nda peku tamana nu la Maü i Muha. 36Handàka dita - handàka dita-naka na karumangu welingu la Maüna i MIRI, nyànggaru-danyaka na ngia pa-pamaüngu-da na banjaru Ihirailu hi da-lelingu la hau pangia. 37Tàka jàka ndedi nadita na karumangu, nda jia hadangu-ada welingu lai nu. 38Nu ba mandai tuna nu ba na-njadangu na banjaru Ihirailu, nimanya duna i MIRI ba na-pahada karumangu la lodu dàngu ba na-pahada epingu la rudungu.

Currently Selected:

LUHU 40: KAM

Highlight

Compare

Copy