LUHU 38

Pandoi ngia pawotu maraku nduma kameti maraku patunu

(Lu. 27:1-8)

1I Mbahaleyilu napiti ai akahia, hàla hi na-pandoi hau ngia pawotu maraku nduma kameti maraku patunu. Na ngia pawotu maraku nuna na-palarangu, na nunjuna dàngu na ndàbaru-na da-maràngga 2,2 metiru, na janggana 1,3 metiru. 2La patu mbua kabihu-na mbara dita na-pandoi-nja kadu da ma-panuangu dàngu ngia pawotu maraku. Mbuu ndàbada pa-kamburungu wuduha. 3Na-pandoi-mbuha da kawalu, da huru, da moku, da njàkapu dàngu na pangia epi. Mbuu ndàbada da pamàtu wàna pa-pandoi welingu la wuduha. 4Na-pandoi lulu wudu pa-jilungu, jiaya na paremba wànya la wawana na ngia pawotu maraku, na janggana na padeni pa-duangu na janggana na ngia pawotu maraku. 5Hàla na-pandoi patu mbua kara ndumada da ai duku da patuu la patu mbua kabihu mbara wawa. 6Da ai duku nuda pa-pandoi welingu la ai akahia-ha, da pa-kamburungu wàngu wudu. 7Hàla nuda da ai duku dua mbungu pahaunja la karada da maninja la karaha ngia pawotu maraku hapapa - hapapa. Na ngia pawotu maraku nuna na-pandoi-ya welingu la kapambalu, na kuruna na parowa-nya.

Pandoi karaba wudu

(Lu. 30:18)

8I Mbahaleyilu na-pandoi karaba wudu dàngu na latana wudu-mayai. Nuda da wudu jiaha da kaninu wududa da tau kawini da ma-paloku la pindu Maüna i MIRI.

Na talora Maüna i MIRI

(Lu. 27:9-19)

9I Mbahaleyilu natunya okana na talora Maüna i MIRI, naoka wànya tera linangu tamainangu. La karaha mbara luru, na malaina 44 metiru-na, 10na pàtu wànya dua kambulu punduku wudu, hapungu - hapungu patuha la lata wudu, tàka da ketuda dàngu da pa-kànangu-da àmahu baraha. 11La karaha mbara dia jia-mayai ba tuna nu. 12La patama lodu patungu liruya, na malaina 22 metiru-na, dàngu hakambulu punduku dàngu hakambulu latada; da ketuda dàngu da kapala pàtuda àmahu baraha. 13La pahunga lodu na maningu pindungu na malaina na liru 22 metiru-mbuna. 14-15La kalai la kawana pindu natu-manyai liru, nimbihu-da na malaida 6,6 metiru-da, dàngu tailu mbungu punduku dàngu tailu mbua latana. 16Mbuu ndàbada da liru la winggiru-na na talora, pa-pandoi welingu la tera linangu tamainangu-ha. 17Da latada da punduku pa-pandoi welingu la wuduha, tàka da ketu, da kapala pàtu dàngu da kapuka punduku pa-pandoi welingu la àmahu baraha. Mbuu ndàbada da punduku la winggiru talora da-kawàra pakeingu wàngu kapala pàtu àmahu bara. 18Na tera dimbaku-na na pindu bokulu la talora pa-pandoi welingu la tera linangu tamainangu-ya, na patinu wàngu lulu kamba hawulu kawuru, mbaü atu dàngu rara, dàngu hi pa-mananda wànya pa-hikungu. Na malaina 9 metiru-na tàka na janggana 2 metiru-na, hama-mada na liru la talora. 19Nuna na tera pindu napàtu-ya patu mbungu punduku wudu. Mbuu ndàbada da ketu, da ndàbi kapuka-da dàngu da kapala pàtuda pa-pandoi welingu la àmahu baraha, 20tàka da kandutuku ndumana na Maü dàngu ndumana na okana pa-pandoi welingu la wuduha.

Da àmahu pawàngu la Maüna i MIRI

21Yiada-haka najuru dihada da àmahu pawàngu la Maüna i MIRI, na ngia pa-pahàmu-ha da watu ba dàmbuda da ngia pa-tulihu-ha da Hakambulu Ukuna i Ala. Nuna najuru dihada hi pandoi-ya ba lii pareta-na i Muhaya tàka hi da-wandalu pajuru-nja paraï da tau Lewi da pa-kapipi-na la paràma i Itamàru anana i Ratu Harungu.

22I Mbahaleyilu anana i Uri, umbuku-na i Huru kabihu Yahunda, na-pandoi-ha mbuu ndàbada da maninja la pareta pawua-na i MIRI. 23Na ma-pambapa dànya jiaya i Ahuliapu anana i Ahihamàku kabihu Ndàngu, nyuna tukangu matanggu huratu-ya, ma-pakaka hahangu-ya dàngu ma-tinungu tera linangu tamainangu, dàngu tera hawulu, mbaü atu dàngu raraya.

24Da àmahu rara da pawotu lai MIRI nduma-na na Maü Matua nggubulu ndàbada 1000 (harata) kiluda, da pa-timbangu tundunya na timbangu pakàli wàngu la Maüna i MIRI. 25Da àmahu bara da pa-ngalangu la diha nggàbalu la banjaru Ihirailu nggubulu-da 3.430 (tailu rata patu ngahu tailu kambulu) kiluda, da pa-timbangu tundunya na timbangu na pakàli wàngu la Maüna i MIRI. 26Nggubulu-da nuda hama dangu-mada da pawotu-na mbuu ndàbana na tau na-patulihu la rehi diha nggàbalu. Nimbihu-na na tau nawotu tundunya na bila na pambàda bota, na pa-timbangu tundunya na timbangu na pakàli wàngu. Nu la diha nggàbalu na tau na padiha 603.550 (nomu ngahu tailu rata lima ngahu lima kambulu)-ya na mini na mambàda dua kambulu ndau rihina.

27Welingu la àmahu bara nuda ningu 3.400 (tailu rata patu ngahu) kiluda da pawàngu ba pandoi-ha da hangahu lata punduku-na na Maüna i MIRI dàngu tera pinduna. Nimbihu-na na lata 34 kiluna na mbotuna. 28Na rihida da àmahu bara, ba 30 kiluda, i Mbahaleyilu na-pandoi-ha da kapala pàtu dàngu da ketu ndumada da punduku dàngu da ndàbi kapuka-da da punduku. 29Da wudu da pawotu lai MIRI nggubulu ndàbada 2.425 (dua rata patu ngahu dua kambulu lima) kiluda. 30Da wudu nuda jiaha da pawàngu ba pandoi-ya na lata pinduna na Maüna i MIRI, na ngia pawotu maraku dàngu na lulu wudu pa-jilungu dàngu mbuu ndàbada da patoma wàna na ngia pawotu maraku, 31na latana na la winggiru-na na talora dàngu na pindu bokulu-na, mbuu ndàbada da kandutuku-na na Maü dàngu na talora la winggiru-na.

Currently Selected:

LUHU 38: KAM

Highlight

Compare

Copy