LUHU 37

Ba pandoiya na Pàti Pa-ràndingu

(Lu. 25:10-22)

1I Mbahaleyilu na-pandoi-ya na Pàti Pa-ràndingu welingu la ai akahia, na nunjuna 110 hiti-metiru-na, na ndàbaru-na dàngu na janggana 66 hiti-metiru nimbihu-da. 2Na kuruna dàngu na liuna pa-patapu-nya àmahu rara ihi mbàngina, hàla hi pandoi-nya halaya àmahu rara la winggiru-na. 3Tunaka nu hi pandoi-nya patu mbua kara àmahu rara ndumada da ai duku, hi tuha la patu mbungu wihina na pàti, dàmbu kara la karaha-na hapapa - hapapa. 4Na-pandoi-mbunya ai dukuna welingu la ai akahia, tàka hi kamburu-nya àmahu rara, 5hàla da ai duku nuda hi pahaunja la kara la karaha-na hapapa - hapapa. 6Tunaka nu hi na-pandoi-nya nggàbina welingu la àmahu rara ihi mbàngina, na nunjuna 110 hiti-metiru-na, na ndàbaru-na 66 hiti-metiru-na. 7Na-pandoi-mbunya dàmbu patau awangu#patau awangu; Tàngaru-ya la 25:18. àmahu rara patuku, 8hau la nimbihu hupuna nuna na nggàbina. Da kahala hada patau awangu patuu pa-nuangu-ha dàngu nuna na nggàbina 9dàngu da-kawara pa-hanggangu ba na-pandoi-ha, ba dàngu tawàlahu-da da ruu kàpada ba da-panggàbalu-nya na nggàbi pàti.

Pandoi menja pangia roti mangejingu

(Lu. 25:23-30)

10I Mbahaleyilu na-pandoi menja ai akahia, na nunjuna 88 hiti-metiru-na, na ndàbaru-na 44 hiti-metiru-na, tàka na janggana 66 hiti-metiru-na.

11Na menja nuna natapu wànya àmahu rara ihi mbàngina, tàka hi natuu winggiru-nya halaya àmahu rara. 12Hàla na-pandoi-nya halinggi-na na menja na mbàlaru-na 7,5 hiti-metiru-na. Nuna na halinggi-na na-pandoi-nya halaya àmahu rara la winggiru-na. 13Na-pandoi-nya patu mbua kara pangia-da da ai duku, da patuu la patu mbua kabihu-na la wihi menja. 14Da karana da ngia pa-pahau-nja da ai dukuna patuu la lihi halinggi menjaha. 15Nuda da ai duku papandoi welingu la ai akahia-ha, dàngu hi kamburu-nja àmahu rara. 16Napandoi-mbuha da kawinga, da kaba wai, da kadihi dàngu da moku nduma hunggu maraku wai angguru. Mbuu ndàbada da pamàtu wàna na menja, na-pandoi-ha welingu la àmahu rara ihi mbàngina.

Ba pandoi tandai palita

(Lu. 25:31-40)

17I Mbahaleyilu na-pandoi tandai palita welingu la àmahu rara ihi mbàngina. Na latana dàngu na polana pa-pandoi-ha welingu la àmahu rara patuku. Da wàla ai pa-manandangu wàna hamanai da kapunju-da dàngu da tanga wàlada pa-panuangu-hàlaha dàngu na tandaina.

18Nu la tandaina na-pandoi-nya nomu mbua kahanga, tailu mbua kahanga hapapa - hapapa. 19La nimbihu kahanga-na na-pandoi-nja pa-manandangu wàda tailu wàla ai mbandamu mangu kapunju dàngu tanga wàlada. 20La tandaina na-pandoi-nya pa-manandangu wàna wàla ai mbandàmu mangu kapunju dàngu tanga wàlada. 21La lumbu kahanga ma-pambapangu na-pandoi-nya hau kapunju. 22Mbuu ndàbana na tandai palita dàngu da kapunju-na dàngu da kahanga-na pa-pandoi-ha welingu la hapungu àmahu rara patuku maihi mbàngina. 23Nu la tandai palita na-pandoi-nya pihu mbua palita dàngu pa-paili wànja da humbu palita dàngu na kaba pandemangu kalatu-da welingu la àmahu rara ihi mbàngina. 24Ka pandoi wànya na wihi palita dàngu da pamàtu wàna 35 kilu àmahu rara ihi mbàngi-mana pa-payemangu.

Pandoi ngia pawotu maraku ngia patunu dupa

(Lu. 30:1-5)

25I Mbahaleyilu na-pandoi welingu la ai akahia hau ngia pawotu maraku ngia patunu wàngu dupa. Na ngia pawotu maraku nuna na-palarangu; na nunjuna dàngu na ndàbaru-na marangga 45 hiti-metiru-da dàngu na janggana 90 hiti-metiru-na. Nu la patu mbua kabihu-na mbara dita na-pandoi-nja kadu ma-panuangu dàngu ngia pawotu maraku.

26Mbara dita la pinu la patu mbua karaha-na dàngu da kaduna pa-kamburu wànja àmahu rara ihi mbàngina, tàka la winggiru-na natunya halaya àmahu rara. 27Na-pandoi-mbunya dàmbu kara la lumbu halaya àmahu rara la karaha-na hapapa - hapapa ngia papahau-nja da ai dukuna na ngia pawotu maraku. 28Nuda da ai duku pa-pandoi welingu la ai akahia-ha hi kamburu-nja àmahu rara.

Pandoi mina lii dàngu dupa

(Lu. 30:22-38)

29I Mbahaleyilu na-pandoi-mbu mina lii dàngu dupa ihi mbàngina mambii kati, pa-pakorungu hama tuna mina mbii kati.

Currently Selected:

LUHU 37: KAM

Highlight

Compare

Copy