LUHU 36

1I Mbahaleyilu, i Ahuliapu dàngu mbuu ndàbada da mamàhi paràma da ma-ngalangu pamàpi wàngu, dàngu hupu màhi welingu lai MIRI, dapinya na huri paloku-ya mbuu ndàbana na paihi wàngu ba wuluya na Maüna i MIRI. Nyuda daràma hàla-maya bàdi hama tuna na pareta pambàda wuana i MIRI,” wàna.

Na banjaru Ihirailu nawua padangu pa-ndulangu-na

2I Muha napaau-nja i Mbahaleyilu, i Ahuliapu dàngu mbuu ndàbana na tau na ma-ngalangu hupu màhi welingu lai MIRI dàngu na mawàngu etina pa-pambapangu, hàla hi na-paràha-nja pa-pakiringu. 3I Muha nawua hàlanja da pawotu-na na tau Ihirailu ndumana na paràma ba wuluya na Maüna i MIRI. Ba tuna na banjaru Ihirailu ngàndi - ngàndi biana-nyapa pawotu-na lai Muha hau mbaru - hau mbaru. 4Hàla da mamàhi paràma da ma-talànga paloku-ya na paràma 5da-patàka-nya i Muha, “Da malanja pa-pandulangu wàna na tau lalu rihi-daka welingu la paràma wànya na paràma na pa-patanggu-na-nggama i MIRI,” wàda.

6Ka pakada-nanyaka i Muha la nggubulu ngia pa-pamaüngu ba jàmu-daka da pa-ndulangu wàngu nduma Maüna i MIRI; jia-duyaka hi na-jiaka na tau pahili ngàndi ngga - nggàra. 7Da paràma wàngu da pambàda pa-ndulangu wàda darihi-njaka da pa-palundu wànya mbuu ndàbana na paràma - paràma-ka.

Da mamàhi paràma dawulu-ya na Maüna i MIRI

(Lu. 26:1-37)

8Tunaka nu da marihi màhi welingu lai nyuda da mamàhi paràma wulu-danyaka na Maüna i MIRI. Na Maü nuna da wulu wànya hakambulu mbàla tera linangu tamainangu na patinu wàngu tera hawulu kawuru, mbaü atu dàngu rara, hàla hi pahiku-nya nggàmbaru patau awangu.#patau awangu; Tàngaru-ya la 25:18. 9Hawàla - hawàla hama hukutu-mada; na malaina na hawàla hakambulu dua metiru-na, na mbàlaru-na dua metiru-na. 10Da lima mbàla pautu panuangu-ha hi hawàla liruna, tàka da lima mbàlai jia-manyai ba tuna nu. 11La halinggi-da nuda da liru ba dua mbàlada tunja pa-kànangu-da tera kawuru, 12lima kambulu pa-kànangu la hawàla - hawàla liru hi lupa hamawa biada. 13Hàla hi pandoi lima kambulu ketu àmahu rara da ma-pandekilu-nja da liru da madua mbàlada.

14Hàlaka nu ràma-danyaka natoku ndiduna na Maü, wàngu hakambulu hawàla tera wulu ihi kamàmbi. 15Hawàla - hawàla hama hukutu-mada, na malaina na hawàla hakambulu tailu metiru-na dàngu na mbàlaru-na dua metiru-na. 16Da lima mbàla pa-panuangu-ha hi hawàla liru-ana, tàka da nomu mbàla anguda, tuna numai na pandoi-na. 17Da lima kambulu pa-kànangu pautu-ha la halinggi liru kawunga-na, tàka da lima kambulu pa-kànangu la halinggi liru na padua mbàla wàna. 18Hàla hi pandoi lima kambulu ketu wudu ka pandekilu wànja da liru ba dua mbàlada da patuu toku ndiduna na Maü. 19Hàla patuna nu hi da-pandoi dua mbàla pandàda-na na Maü, na hawàla manula mbimbi bumbu pandongu, tàka na hawàla manula malijangu.

20Tunaka nu da-pandoi-nya kapambalu-na na Maü welingu la ai akahia da ma-ndolaku tinjangu. 21Hapungu - hapungu kapambalu na janggana patu metiru tàka na mbàlaru-na nomu kambulu nomu hiti-metiru-na. 22La hapungu - hapungu kapambalu patungu kandutuku ma-papapangu hi peku pakeingu-da hapungu dàngu hapungu. 23Ndumana la hapapa mbara luruna na Maü pandoi-nya dua kambulu kapambalu 24dàngu patu kambulu lata àmahu bara, dàmbu la wawa nimbihu kapambalu ndumada da kandutuku-na da madua mbunguda. 25Ndumana la hapapa mbara diana na Maü pandoi-nya dua kambulu kapambalu, 26dàngu patu kambulu lata àmahu bara, dàmbu la wawa nimbihu kapambalu. 27Ndumana la kajia Maü la patama lodu, pandoi-nya nomu kapambalu 28dàngu dua mbungu kapambalu ndumana la kabihu-na. 29Da kapambalu la kabihu pa-hàmburu-nja la pingida lupa tàka hu dita la hupu ditada. Da dua mbungu kapambalu da matunya kabihu-na tuna numai na huri pandoi-ha. 30Jia ba tuna, mbuu ndàbada waluda da kapambalu dàngu hakambulu nomu lata àmahu bara, dàmbu la wawa nimbihu kapambalu.

31Hàla hi da-pandoi hakambulu lima ai borungu welingu la ai akahia, lima mbungu ndumana la hapapa karaha Maü, 32lima la hapapa karaha hau, dàngu hi lima ndumana la kajia Maü la patama lodu. 33Na ai borungu la padua datuya la padeni padua-na na janggada da kapambalu welingu la hupu lupa la hupu hauna na Maü. 34Da kapambalu-na na Maü dàngu da ai borungu-na na Maü pa-kamburungu àmahu raraha, hàla hi tuha da kara àmahu rara da mapàtu-ha nuda da ai.

35Da-pandoi-mbu tera pindu, tera linangu tamainangu da patinu wàngu lulu kamba kawuru, mbaü atu dàngu rara, hàla hi pahiku-nja nggàmbaru patau awangu.#patau awangu; Tàngaru-ya la 25:18. 36Ka tiwalu-nya nuna na tera da-pandoi patu mbungu punduku ai akahia da pa-kamburungu àmahu rara dàngu ketu àmahu rara, da patuu la pinu patu lata àmahu bara. 37Da-pandoi-mbu tera dimbaku-na na pindu Maü welingu la tera linangu tamainangu na patinu wàngu lulu kamba hawulu kawuru, mbaü atu dàngu rara dàngu hi pa-mananda wànya pa-hikungu. 38Ndumana nuna na tera pindu da-pandoi lima mbungu punduku ka panuwa wànja ketu. Da hupuda dàngu da ma-panua-nja nuda da punduku lima mbungu pa-kamburungu àmahu raraha, tàka da latada ba limada wuduha.

Currently Selected:

LUHU 36: KAM

Highlight

Compare

Copy