LUHU 30

Na ngia pawotu maraku ngia patunu dupa

(Lu. 37:25-28)

1Nahili panii i MIRI lai Muha, “Pandoi hau ngia pawotu maraku ngia patunu dupa welingu la ai akahia. 2Na hadana lupangu-ma ka na-palarangu; na nunjuna dàngu na ndàbaru-na nimbihu-da 45 hiti-metiru-da, tàka na janggana 90 hiti-metiru-na. La patu mbua kabihu-na kau pandoi-nya kaduna na ma-panuangu dàngu na ngia pawotu maraku. 3La mangia dita, jia ndàbaha da patu mbua karaha-na dàngu da kaduna lupangu-ma kamburu wànja àmahu rara ihi mbangina dàngu ka tunya nggàpi àmahu rara winggiru-na. 4Pandoi-nya dàmbu kara la wawa nggàpina hapapa - hapapa ngia pa-pahau-nja da ai dukuna na ngia pawotu maraku. 5Da ai duku lupangu-ma ka pandoi-ha welingu la ai akahia dàngu kamburu-nja àmahu rara. 6Bànjalu-ya nuna na ngia pawotu maraku la hambeli tera pa-tiwalungu la hangga Pàti Pa-ràndingu, na ngia pa-pahàmburu dànggunggau nyumu napa. 7Nimbihu mbaru i Harungu ba namai pa-paloku-ha da palita, lupangu-ma ka natunu dupa hiritu la pinu ngia pawotu maraku nuna. 8Na matuna nu lupangu-ma ka nawà-manyai ba namai pa-paroka-ha da palita la malingu. Na hunggu maraku wàngu dupa tungu nu màta ka nawa mànunya lundu ngeru - ngeru. 9Àmbu maraku wàngudu la pinu ngia pawotu maraku nuna dupa pa-hiringu, kameti banda jàka ndia pa-mangejingu; màtangu-mbu paburi-nya wai angguru la pinuna. 10Handàkangu hau ndaungu lupangu-ma i Harungu na-paloku-ya na lii hawari ngia pawotu maraku, ba nawàngu pa-paiharu-nja wai ria banda kameti maraku jàmangu njala nu da patu mbungu kaduna na ngia pawotu maraku. Na matuna nu lupangu-ma na-pangala tilangu ba wànya nimbihu ndaungu lundu pirangu bia. Nuna na ngia pawotu maraku lupangu-ma na matua nggubulu-na dàngu ka panuda-ngganya ndumanggu Nyungga,” wàna.

Da pawotu nduma Maüna i MIRI

11I MIRI napanii-nya i Muha, 12“La rehi paloku-ya na diha nggubulu nimbihu-na na mini lupangu nawotu-ma bàdi lai Nyungga àmahu palohu pa-pahàla wàna wikina, ka àmbu nanggàna-ya ura pàda nu ba talànga paloku-ya na diha nggubulu. 13Nimbihu-na na tau na matama la diha nggubulu, lupangu na-wuangu-ma bàdi àmahu tundunya na pabota hama bilana na pakàli wàngu la Maünggu, nuda nu jia-haka da hunggu pa-panuda-ngga Nyungga. 14Nimbihu-na na tau na padiha nu la diha nggubulu, jia-duyaka na mini na mambàda dua kambulu ndauna jàka ndia rihi kai lupangu na-wuangu-ma bàdi hunggu panudangu tungu nu. 15Na tau na mawulu ka lupangu nawua pa-rihingu bàdi nda wànda-a, tàka na tau mila àmbu nawua pa-wawangu-du, nu la rehi wuangu-da àmahu palohu pa-pahàla wàda wikida. 16Pahuru-nja da àmahu nuda la banjaru Ihirailu, kai paloku wànya na lii pa-lumungu la Maünggu. Mbuu ndàbada nuda jia-haka da àmahu palohu pa-pamara wàda wikida, tàka Nyungga duku jiangu-ma napa ba kunamu mànuya la pakuru mangganja nyuda,” wàna.

Na karaba wudu

17I MIRI napanii-nya i Muha, 18“Pandoi hau karaba wudu, tàka na latana ka wudu-mayai. Tuya nuna na karaba la manggawa Maü dàngu ngia pawotu maraku, hàla ka paihi-nya wai.

19Nuna na wai ndumada i Harungu dàngu da anana ka dabaha wàngu lima dàngu wihida 20-21ba ndedi da tama la Maü dàngu la palihi-nya na ngia pawotu maraku ba dangàndi kameti maraku patunu. Na kalaratu nuna lupangu-ma ka danunju-ya nyuda dàngu da wàla wuada lundu nu - nu,” wàna.

Na mina ba lumungu lii

22I MIRI napanii-nya i Muha, 23“Pitiwa rungu marihi hàmu, 6 kilu muru maningu waingu, 3 kilu kaninggu, 3 kilu tibu hiritu, dàngu 6 kilu ai mbii kati. 24Mbuu ndàbada pa-timbangu-ha tundunya na timbangu na pakàli wàngu la Maünggu. Bonja wànya 4 litaru mina haitungu, 25pandoi mina palumu wàngu lii, pakoru-nja hama tuna na mina mbii kati. 26Jiaha nuda da pawàngu bai katua-ya na Maünggu, na Pàti Pa-ràndingu, 27na menja dàngu mbuu ndàbana na pamàtu wàna, na tandai palita dàngu na pamàtu wàna, na ngia pawotu maraku ngia patunu dupa, 28na ngia pawotu maraku pangia kameti maraku patunu dàngu mbuu ndàbana na pamàtu wàna, lupa na karaba wai dàngu na latana. 29Tuna nu na pawàngu bàdi bau panuda-nggaha Nyungga mbuu ndàbada nuda ka peku matua-da mbuu ndàbada. Nggàra biaya na ma-jonggaru-ya nuna na ngia pawotu maraku lupangu wua-ngganya bàdi Nyungga MIRI, dàngu nggàmu biaya na ma-jonggaru-ya napa na-hanggàmaru ruku mbangatu-na na matua-na.#na-hanggàmaru ruku mbangatu-na na matua-na; tàngaru-ya la 29:37. 30Katua-mbuya i Harungu anguda anana ka peku undungu-na na pakata-da ba ratuha malumu-ngga Nyungga. 31Pekanya na banjaru Ihirailu, nuna na mina palumu wàngu lii ba pa-panudangu lai Nyunggaya lundu pirangu bia. 32Na mina nuna nda uku paburi-nya la àtalu tau bia. Àmbu pandoi-du mina ma-hamangu ba nawàngu pa-pakorungu tungu nu. Nuna mina matua-ya, dàngu reki-maya ba ma-matua-ya. 33Na tau na ma-pandoi mina ma-hamangu, jàka ndia na matunya na tau na manda ratu, nyuna nda pareki-ayapa ba anggota banjaru-nggunya,” wàna.

Na dupa

34I MIRI napanii-nya i Muha, “Pitiwa ma - màtu rungu ma-pahama dangu, nu da rutuhu kàhi, da tàda njaki, da rutuhu ai mbii kati dàngu dupa weli wingungu. 35Wànja nuda mbuu ndàbada ka pandoi pakoru-nja patuu dupa mambii kati. Bonjanya mehi ka na-padaingu ba ihi mbàngi-nanya bai wànya lai Nyungga. 36-37Hawiangu welingu la dupa nuna lupangu-ma bai pa-kangudahu-ya. Ngàndiya nuna la Maünggu, ka wewaru-nya la hangga Pàti Pa-ràndingu. Na dupa nuna lupangu-ma kareki-ya ba ma-matua-ya na pa-panuda-ngga ndumanggu Nyungga. Àmbi pandoi-du dupa pa-pakorungu wàngu rungu ma-hamangu nduma wikimi nyimi. 38Nggamu ma-pandoi mbii kati ma-hamangu, nda pareki-ayapa ba anggota banjaru-nggunya,” wàna.

Currently Selected:

LUHU 30: KAM

Highlight

Compare

Copy