LUHU 31

I MIRI Ala ba napindi mapingu pawulu Maü dàngu na pamàtu wàna

(Lu. 35:30–36:1)

1I MIRI napanii-nya i Muha, 2“Nyungga kupindi-yaka i Mbahaleyilu anana i Uri umbuku-na i Huru welingu la kabihu Yahunda, 3dàngu kuwua-nyaka na mbihanggu.#na mbihanggu; jàka ndia: na Ngahunggu. Nyuna kuwua-nya kanandingu ma-jàngapu, màpi dàngu pa-duluku wàna la paràma hangia - hangia na ma-manandangu: 4la pa-pandoi hahaya la kanandingu wàngu hupu pinguna la patuku àmahu rara àmahu bara dàngu wudu; 5la padeli watu mata tawuru ka pa-mananda-nya; la pa-huratu ai dàngu la paràma hangia - hangia ma-manandangu. 6I Ahuliapu anana i Ahihamàku welingu la kabihu Ndàngu mbàda pindi-nggunyaka ka na-pambapa dànya. Kuwua-mbunja pamàhi wàngu nda ningu hamada da tukangu mapingu ka da-ngalangu pa-pandoi-ya jàka nggàra biaya na pareta pawua-nggunja: 7na Maünggu, na Pàti Pa-ràndingu dàngu nggàbina, dàngu mbuu ndàbada da ihina na Maü, 8na menja dàngu da pamàtu wàna, na tandai palita àmahu rara ihi mbàngina dàngu da pamàtu wàna, na ngia pawotu maraku na ngia patunu dupa, 9na ngia pawotu maraku pangia kameti maraku patunu dàngu mbuu ndàbada da pamàtu wàna, na karaba wai dàngu na latana, 10da paki da pa-lumungu wàna i Harungu dàngu da anana, da papaki-da ba talànga paloku-danya na paratu wàda, 11na mina palumu wàngu lii dàngu dupa mbii kati ndumana na Rowa Matua. Nuda mbuu ndàbada lupangu-ma da-pandoi-ha, nunju pawingu-nya na pa-paita-nggunggau nyumu,” wànanya.

Na Hambatu, na lodu hangahu

12I MIRI nawua-nya pareta i Muha, 13la pa-pakada-nya la banjaru Ihirailu, “Mbabunya na lodu Hangahu, na lodu na pambàda kawuku-nggu ba lodu hangahu-ya. Lundu nu - nu na lodu nuna jiaya na lodu maràngga pangàdangu-nda nyimi dàngu Nyungga, ka peku piminya Nyungga ba MIRI-ka, dàngu ba mbàda panjadi-nggunggaika banjaru wikinggu. 14-15Na lodu hangahu nuna lupangu-ma kai tembiya ba lodu matua-ya. Nyimi kuwua-nggai nomu mbua lodu paràma wàmi, tàka na lodu papihu wàna lodu bokulu-ya na pa-panuda-ngga ndumanggu Nyungga. Nggamuya na manda tembiya, tàka hi ràma bia-nanya la lodu nuna lupangu-ma pa-hukungu metiya bàdi. 16Na banjaru Ihirailu lupangu dambabu-manya bàdi na lodu nuna lundu ana umbuku-da ba jiaya na tanda pa-ràndingu. 17Na lodu nuna pa-daingu-mananya ba lodu maràngga pangàdangu-ya la banjaru Ihirailu dàngu Nyungga, nadu Nyungga MIRI, ba mbàda padika-nggunyaka na awangu dàngu na tana la dalu nomu mbua lodu, tàka la lodu papihu wàna hi ku-pànjangu paràma dàngu hi ku-hangahu,” wàna.

18Ba nahàla-ka papanii dànya i Muha la pinu Palindi Hinai, nawua-nyaha i Muha paraïna i Ala da watu pipi da madàmbu-da da ngia pa-tulihu-naha i Ala da lii pareta-na.

Currently Selected:

LUHU 31: KAM

Highlight

Compare

Copy