LUHU 29

Na kalaratu ba katua-ha i Harungu dàngu da anana la paratu

(Part. 8:1-36)

1“Tuna nu ba katua-ha i Harungu dàngu da anana ka peku lumu-dangga Nyungga ba ratuha. Piti heu hapi mini kamboka-na dàngu dua ngiu mbimbi bumbu na manda ningu nyurangu. 2Welingu la kanguta marihi hàmu, pandoi pa-haürungu panda tungu muru. Hawiangu na pa-haürungu lupangu-ma ka pandoi roti patungu mina haitungu, hawiangui panda tungu mina, dàngu na rihina pandoi-ya kanguta pado - dohangu mina. 3Tuha la mbola ka mangeji-ngganja dàngu nuda da kameti hapi mini lupa da mbimbi bumbu dua ngiu.

4Paràha-nja i Harungu dàngu da anana ka damai la pindu Maünggu dàngu ka dabaha wikida. 5Panggàna-nja da paki ratu lai Harungu: kamenja, eputu, kalembi pahàla-ngu ma-pandàbi-nya na eputu, na nggàbi kuru dàngu na boru bànggi. 6Wotunya na tera lenju la katiku-na dàngu ka hindiku-nya na tabilu àmahu rara la tera lenjuna, na maningu huratungu, ‘Pa-panuda-nya ndumana i MIRI,’ ba wàna. 7Pitiya na mina pa-katua wàngu, kau burinya la katiku-na, kau katua-ya.

8Hàlaka nu, paràha-nja da anana ka da-hurungu, ka pahaunja kamenja 9dàngu ka paboru-nja boru bànggi, hàla ka wotunja tera lenju la katiku-da. Tuna nu na huri ba katua-ha i Harungu dàngu da anana. Nyuda dàngu da wàla wuana lupangu-ma dalumu-ngga Nyungga ba ratuha lundu nu - nu.

10Tunaka nu lupangu-ma kau ngàndiya na hapi mini la hangga Maünggu. Lupangu-ma i Harungu dàngu da anana da-padàmbaku-nja da limada la katiku-na nuna na banda. 11Rupuya nuna na hapi la hangganggu, la pindu Maü. 12Piti hawiangu riana na hapi kau doha wànja limamu da kaduna na ngia pawotu maraku. Na rihina na ria lupangu-ma kau buriya la lumbu ngia pawotu maraku. 13Hàlaka nu piti ndàbaya na aparu-na na ma-palàmbaru-nya na ihi kambuna, hawiangu na marihi hàmu la etina dàngu da wua kadalu-na pa-kariangu mbokana, tu hàlaha nuda la pinu ngia pawotu maraku ka tunuha ka hunggu maraku-ha lai Nyungga. 14Na toluna, na manula-na dàngu na tanai-na nuna na hapi mini lupangu-ma ka tunuha hu lua la hambeli ngia pa-pamaüngu. Nuda jia-haka da hunggu maraku pa-jàmangu wàda da njalada da ratu.

15Tunaka nu pitiya na heu welingu la mbimbi bumbu da madua ngiuda. I Harungu dàngu da anana lupangu-ma da-padambaku-nja da limada la pinu katiku-na nuna na banda. 16Hàla rupuya nuna na mbimbi, pitiya na riana ka buriya la patu karaha-na na ngia pawotu maraku. 17Nuna na mbimbi bumbu lupangu-ma ka da - datuya. Na ihi kambuna dàngu na winjuna lupangu-ma ka bahaha dàngu ka tuha la pinu katiku-na dàngu la pinuda hawiangu da pambàda datu. 18Wotu hàlaya nuna na mbimbi bumbu la pinu ngia pawotu maraku ka tuya kameti maraku patunu. Na hiritu-na na hunggu maraku na hàmu wànya na etinggu.

19Hili pitiyai na heu na mbimbi bumbu, nu na mbimbi bumbu ndumana na lii katua. Paràha-nya i Harungu dàngu da anana ka da-padambaku-nja da limada la katiku-na na banda. 20Rupuya nuna na mbimbi bumbu, piti hawutu riana na mbimbi ka perinya la ruu kahilu kawana-na i Harungu dàngu da anana, la wua lima bai kawana-da dàngu la wua wihi bai kawana-da. Na rihina na naria lupangu-ma kau buriya la patu karaha-na na ngia pawotu maraku. 21Piti hawutu ria na maninya la pinu ngia pawotu maraku dàngu hawutu mina pa-katua wàngu, hàla paiharu-nya i Harungu dàngu da anana, hamanai da pakida. Ba tuna nu na huri nuna i Harungu dàngu da anana hamanai da pakida ba pa-pahinggilu-haka ndumanggu Nyungga.

22Pitiya na mbokana nuna na mbimbi bumbu, na kikuna na maningu mbokana, na aparu-na la pinu ihi kambuna, hawiangu na mahàmu halawàla welingu la etina, da wua kadalu-na pa-kariangu mbokana, dàngu na winju kawana-na. 23Welingu la mbola roti na pambàda marakuda-ngga, piti hau roti welingu la hamata - hamatangu: hau na pa-pandoi wàngu mina haitungu, hau panda tungu mina dàngu hau kanguta. 24Bànjalu-ha nuda mbuu ndàbada da pangangu la limana i Harungu dàngu da anana dàngu paràha-nja ka datema pahangga-nja nuda lai Nyungga ka tuha hunggu maraku patema. 25Hàla pitiha nuda da roti welingu lai nyuda ka tunuha la pinu ngia pawotu maraku, la pinuda da kameti maraku patunu. Na hiritu-da nuda da hunggu maraku nahàmu wànya na etinggu.

26Pitiya na kakauna na mbimbi bumbu dàngu ka maraku-ngganya tuya hunggu maraku patema lai Nyungga. Nuna jia-yaka na ndumamu.

27Nu la lii katua ratu, na kakauna dàngu na winjuna na mbimbi bumbu na pawàngu la lii nuna lupangu-ma ka maraku wànja ka maraku patema-ha lai Nyungga dàngu ka kahika-ha ndumada da ratu. 28Yiana-ya na botangu-nggu na panda peku pa-panjilu-nya: Ba jiaya na hurungu-na na banjaru-nggu pangàndi kameti maraku papeku, na kakauna dàngu winjuna na banda jia-haka da ndumada da ratu. Nuna-duyaka na hunggu maraku-na na banjaru-nggu lai Nyungga.

29Da paki ratuna i Harungu lupangu-ma ka pamangu-nja da anana, ka peku paki-danya la rehi katua-ha. 30Na anana i Harungu na maratu hiluya na amana dàngu na matama la Maünggu la pa-paloku-ya na pa-lumungu la Rowa Matua lupangu napaki-maha bàdi da paki nuda la dalu pihu mbua lodu.

31Pitiya na toluna na mbimbi bumbu na pawàngu la lii katua-ha i Harungu dàngu da anana, manahu-ya nuna na tolungu la hau pangia matua. 32Na tolungu nuna lupangu dangaa-manya bàdi la ngaru pindu Maünggu, ka dangaa wànja da roti da marihi la mbola. 33Lupangu dangaa-manja bàdi da pangangu da pa-maraku wàngu la lii jàmangu njala nu la rehi katua. Mbulungu da ratua da mapeku pangaa-nja da pangangu da pambàda panuda-ngga Nyungga. 34Jàka ningupa marihi nuda da tolungu dàngu da roti hadangu harii, nuda da marihi lupangu tunu pambuta-maha bàdi dàngu nda ukua pangaa-nja ba mbàda pa-pahinggilu-haka.

35Na lii katua-ha i Harungu dàngu da anana lupangu la dalu pihu mbua loduma bàdi ba paloku-ya, hama tuna na pareta pambàda wua-nggunggau. 36Nimbihu lodu lupangu-ma bàdi ka hunggu maraku wàngu heu hapi mini nduma pa-jàmangu wàngu njala. Wànya na kameti maraku nuna ba pa-matua-ya na ngia pawotu maraku. Hàla na ngia pawotu maraku kau pamina wànya mina haitungu ka panuda-ngganya ndumanggu Nyungga. 37Paloku tuna nu nimbihu lodu la dalu pihu mbua lodu. Jia-duyaka hi na-matua nggubulu-na na ngia pawotu maraku, nggàra biaya na ma-hanggàna-ya nuna na ngia pawotu maraku lupangu puli-manya bàdi lai MIRI, tàka jàka nggamu biaya na ma-jonggaru-ya, napa na-hanggàmaru wànya ruku mbangatu-na na matua-na,”#na-hanggàmaru wànya ruku mbangatu-na na matua-na; La rehi nu da-pajia-ya: na tau hawiangu na manda ratu dàngu jàka nggàra biaya, jiangu-ma na-hanggàmaru jàka na-jonggaru ngga - nggàra ma-matua. wàna.

Hunggu maraku nimbihu lodu

(Di. 28:1-8)

38“Nimbihu lodu lundu nu - nu la pinu ngia pawotu maraku lupangu-ma ka wotu hunggu maraku dua ngiu mbimbi mahau ndauda. 39Na heu ndumana na hunggu maraku mbaru, tàka na heui ndumana na hunggu maraku malingu. 40Karia-na na ana mbimbi na hunggu maraku mbaru, lupangu-ma wotu hunggu maraku hau kilu taringgu mahàmu halawàla pa-pakorungu hau litaru mina haitungu manda ningu koruna. Hinggilu-nai nuna hau litaru angguru-mbu. 41Na ana mbimbi nduma hunggu maraku malingu, lupangu-ma na huri maraku-nya ka hama-manai, ba pa-karia-nya taringgu, mina haitungu dàngu angguru. Na hiritu-na na hunggu maraku patunu na hàmu wànya na etinggu. 42Na pangalangu-na lundu nu - nu, nuna na hunggu maraku patunu lupangu-ma pawotu-ya la hangganggu la pindu Maünggu. Lai nu Nyungga ba ku-pahàmburu dànya na banjaru-nggu dàngu ba ku-pabanjaru dànggamu nyumu. 43Lai nu Nyungga ku-pahàmburu dànya na banjaru Ihirailu, na handaraku-nggu ba ningga lai nu, jiaya na ma-pamatua-ya na pangia nuna. 44Napa Nyungga ku-pamatua-ya na Maünggu dàngu na ngia pawotu maraku. I Harungu dàngu da anana napa ku-pahinggilu-ha welingu la tau hawiangu, ka dalumu-ngga Nyungga ba ratuha. 45Napa Nyungga nimangga la honga banjaru Ihirailu, tàka hi da Alangga Nyungga. 46Napa nyuda dapinya ba Nyungga na MIRI Alada nyuda na ma-karia-nja paluhu welingu la Mehiru, ka peku ngiangu-nggu la padua-da nyuda, Nyungga-maka MIRI Alada nyuda,” wàna.

Currently Selected:

LUHU 29: KAM

Highlight

Compare

Copy