LUHU 28

Da paki ratu

(Lu. 39:1-7)

1“Paaunya i Harungu, ayamu, dàngu da anana i Nandàpu, i Ambihu, i Eliahàru, dàngu i Itamàru, leha-maha nyuda ka daratu, matanggu lumungga Nyungga. 2Pandoi-nya paki ratu i Harungu, ka pekuna ba ràka patembi-ya ba itaya. 3Paau ndàbanja da mapingu pautu da pambàda wuanggu pamàhi wàngu. Paràha-nja ka dautu-nya pakina i Harungu, ka lehaya la palumu-ngga Nyungga ba ratuya. 4Paràha-nja ka da-pandoi nggàbi kuru, eputu, kalembi pahàlangu, kamenja pa-pahikungu, tera lenju dàngu boru bànggi. Nuda da paki ratu lupangu-ma da-pandoi-ha ndumana i Harungu ayamu dàngu da anana, ka peku lumu-dangga ba ratuha. 5-6Nuda da paki lupangu-ma ka da-pandoi-ha welingu la tera hawulu kawuru, mbaü atu dàngu rara, lulu àmahu rara dàngu linangu tamainangu. Hinggilu-na nu lupangu-ma na eputu ka pa-mananda wànya pa-hikungu. 7Dua walangu liku kundu pa-hawaritu wànya na eputu utu-maya la hingina. 8Hawalangu boru bànggi patinu ma-tànahu, na hamana na tera nuna ka utunya la eputu ka da-pambulungu. 9-12Piti dàmbu watu tawuru ndalima. Himbu matuku àmahu, na mamàhi la pa-huratu la watu nuda da tamuda da tau hakambulu madua da anana i Yakupu tundunya na pa-ndàkingu dedida, nomu tamu la nimbihu watu. Hàla da watu tawuru nuda ba dàmbuda tunya nggàpi àmahu rara ka tuha la liku kunduna na eputu ka jiaha da tanda panamu wànja da hakambulu dàmbu kabihu Ihirailu. Ba tuna nu nyuna i Harungu ngàndi-nanjaka da tamuda la kunduna, hi lupa Nyungga, MIRI, naingu-na padua nanamu-nggunja nyuda. 13Hinggilu-da nuda da nggàpi àmahu rara ba dàmbuda 14lupangu pandoi-mbu bàdi dua walangu halaku lulungu àmahu rara ihi mbàngina paputi likungu, ka tuha nuda la nggàpi àmahu rara,” wàna.

Na nggàbi kuru

(Lu. 39:8-21)

15“Pandoi-nya na Ratu Bokulu hau nggàbi kuru na papaki-na la rehi ka kupi wànya na pawuku-na i Ala jàka wàna. Na pawàngu ba utuya dàngu na pahikungu-na na nggàbi kuru màta ka hamada da pawàngu ba utunya dàngu na pahikungu-na na eputu. 16Na hadana na-palarangu dàngu pa-làpitu padua-ya, na nunjuna dàngu na ndàbaru-na 22 hiti-metiru-na. 17Tunya patu ndalaru watu mata tawuru na nggàbi kuru. La ndalaru kawunga watu ndalima, watu topahu dàngu watu bainduri ma-paninu. 18La ndalaru padua wàna watu njàmurutu, watu nilamu, dàngu watu itangu. 19La ndalaru patailu wàna watu lanjuandiru, watu akiku dàngu watu wàla mbunguru. 20La ndalaru papatu wàna watu piruhu, watu yakutu dàngu watu ràtuna wingiru wàla. Nuda da watu da ma-hakambulu dàmbuda lupangu-ma ka hondu wànja àmahu rara. 21La nimbihu watu mata tawuru lupangu-ma huratu-nya tamuna na haàtu anana i Yakupu ka jiaha da tanda panamu wànja da kabihu - kabihu Ihirailu. 22Pandoi-nya nuna na nggàbi kuru dua walangu halaku lulungu àmahu rara ihi mbàngina na-paputi likungu. 23Pandoi-mbunya dàmbu kara àmahu rara ka tuha la hupu ditana hapapa - hapapa na nggàbi kuru 24hàla patama-nja nuda da halaku lulungu àmahu rara la kara àmahu kawai. 25Da hupu hapapa-da da halaku lulungu lupangu-ma pahondu-ha la nggàpi da madàmbu-da, ka peku panua-nya na nggàbi kuru la liku kundu eputu la hangga. 26Hili pandoiki-nya dàmbu kara àmahu rara, hàla tuha la nggàbi kuru la hupu wawa mangia dalu manggàna-ya na eputu. 27Hàlaka nu, pandoi-kinya dàmbu kara àmahu rara dàngu tuha la hangga dua walangu liku kunduna na eputu la ngia pa-pahàmburu-na na utuna, la dita boru bànggi tera tamainangu. 28Da karana na nggàbi kuru lupangu-ma ka panua wànya liku kawuru la karana na eputu ka peku pa-daingu-na na nggàbi kuru la dita boru bànggi dàngu ka àmbu na-pahàlangu.

29La rehi tamana i Harungu la pangia matua, lupangu-ma natama ngàndiha da tamuda da hakambulu dàmbu kabihu Ihirailu da pa-huratu la nggàbi kuruna, ka pekuna Nyungga, MIRI, ba kunamu mànuya na banjaru-nggu. 30Tuha da Urimu dàngu Tumimu#Urimu dàngu Tumimu; Jiaha da madàmbu-da da pawàna na ratu ka pi wànya na pawuku-na i Ala. Nda papi padedi-anya jàka wàngu panggiki hamana ba wànja nuda nu. daa la nggàbi kuru na papaki-na i Harungu jàka na-hurungu lai Nyungga. La re - rehi tungu nu lupangu-ma napàki mànu nggàbi kuru, ka peku pi wànanya na pawuku-nggu la banjaru Ihirailu,” wàna.

Da paki hauda da ratu

(Lu. 39:22-31)

31“Na kalembi pahàlangu na papaki la pinu eputu lupangu-ma mbuu ndàbana ka pa-pandoi welingu la tera hawulu kawuru-ya. 32Na mbowa nggoruna pautu patapu-nya tera pa-tinungu ka àmbu namuda pa-kahira. 33-34La halinggi winggiru wawana tunya pa-manandangu wàna ba hama wua ndalima-ha welingu la tera hawulu kawuru, mbaü atu dàngu rara, pahena - pahenaku-nja ana katàngu àmahu rara. 35Na kalembi pahàlangu nuna lupangu ka napaki-ya i Harungu jàka talànga paloku-nanya na paratu wàna. La rehi hurungu-na la hangganggu la Rowa Matua dàngu jàka jiaya na rapa luhuna welingu lai nu, napa parongu-mahaka duda da linguda da ana katàngu, ka àmbu nameti.

36Pandoi hau tabilu àmahu rara ihi mbàngina dàngu lai nu ka huratu-nya, ‘Pa-panuda-nya ndumana i MIRI,’ ka wàna. 37Hondu wànya liku kawuru nuna la tera lenju. 38Na tabilu àmahu rara nuna màta ka natuya i Harungu la kaba matana, ka pekuna Nyungga, MIRI, la paorangu panggepi-ha da hunggu maraku mbuu hàlada da pangàndi-na na tau Ihirailu lai Nyungga, jiapakai ka mbàda wundada manjala nu ba dangàndi hunggu maraku.

39Na kamenja-na i Harungu lupangu-ma ka tera patinu wàngu linangu tamainangu-ya. Pandoi-mbunya hawàla tera lenju welingu la linangu tamainangu dàngu boru bànggi pa-hikungu.

40Pandoi-nja kamenja, boru bànggi dàngu tera lenju da anana i Harungu, màta ba itaha ka ràka patembi-ha. 41Panggàna-nja da paki nuda lai Harungu angumu paluhu dàngu da anana. Katua wànja mina haitungu; ba tumunja nu pa-katua-haka dàngu pa-pahinggilu-haka la palumu-ngga Nyungga ba ratuha. 42Hàla utunja hakalaki kababa tera linangu, na malaina welingu la bànggi lundu la winju ka da-pandàbingu da ihida da ràka panda ita. 43Da hakalaki nuda màta ka dapaki mànuha la rehi tamada la Maünggu jàka ndia ba dalihi-nya na ngia pawotu maraku ba da-paloku-ya na pa-lumungu na ngera ratuda la Rowa Matua, ka àmbu da meti wànya ba itaha da ihida da ràka panda ita. Na kalaratu yiana na-padaingu ba nawànya i Harungu lupa da wàla wuana,” wàna.

Currently Selected:

LUHU 28: KAM

Highlight

Compare

Copy