LUHU 13
13
Na maraku kawunga ana
1I MIRI napanii-nya i Muha, 2“Wotu ndàba-nggaha Nyungga da anakeda mini ma-kawunga dedi. Nimbihu-da da anakeda mini la Ihirailu ma-kawunga dedi dàngu nimbihu-da da banda mini da ma-kawunga dedi, mangunggu Nyungga-ha,” wàna.
Na Pamangu Roti Nda Patai Wolungu
3I Muha napanii-nya na banjaru Ihirailu, “La lodu nàhu i MIRI na-pahàla-kaika wàngu kuaha bokulu, hi lupa peku luhumi welingu la Mehiru, la ngia paata ningumi. Jia-duya, pangàda-nyawa na lodu yiana. Àmbi ngangudu roti patungu tai wolu. 4La lodu yiana, la tànggalu kawunga wulangu Ambipu jàka ndia wulangu kawunga, dunjaku-minyaka na tana Mehiru. 5Nawàngu pa-harangu i MIRI ba nàrandi-ha da boku la mangilu-mi la pawua-nggainya nyimi na tana tau Kanaàngu, tau Heti, Amori, Hewi dàngu Yembuhu. Ba nahàla-ka i MIRI pa-karia-nggai la tana na mawulu dàngu na ma-kamboka, nimbihu ndaungu la wula Ambipu, lupangu-ma kai patumbu-ya na pamangu yiana. 6La dalu pihu mbua lodu màta kai ngangu roti pànda tungu muru, tàka la lodu na papihu wàna màta kai patumbu-ya na remi la pa-maraku-nya i MIRI. 7La dalu pihu mbua lodu nyimi nda uku pangangu roti patungu tai wolu, dàngu la nggubulu tanami àmbu ningudu tai wolu jàka ndia ana ngga - nggàra maningu tai wolungu.
8La kawunga pakiri-minya na remi, lupangu-ma kai pekanja da anami mini, nuda mbuu ndàbada hi mi-paloku-ha rukuda mbuu ndàbada da pa-patumbu-na i MIRI lai nyimi, ba jiaya na-dunjaku-minya na tana Mehiru. 9Na mbabu yiana, jia-yaka na pa-panamu wànggai nyimi, hama tuna na tanda la karanja pungumi dàngu na katàtu la kaba matami. Na remi yiana panamu wànanggai kai tiki pangala-nya dàngu la pa-papekangu welingu la Ukuna i MIRI, nadu ba i MIRI na ma-paluhu-kai welingu la Mehiru wàngu mbiha manyola-na. 10Reminya na lii yiana nimbihu ndaungu la rehi pa-kawuku,” wàna.
Da kawunga ana
11I Muha napanii-nja na banjaru Ihirailu, “Napa i MIRI na-karia-nggai la tana Kanaàngu na paràndi-na ba nawàngu harangu lai nyimi dàngu la boku la mangilu-mi. Jàka mimangu-nyaka nuna na tana, 12lupangu-ma kai maraku wànja da kawunga anami mini, hamanai da ana bandami mini da ma-kawunga dedi. Mbuu ndàbada manguna i MIRI-ha,
13tàka da ana kalandai mini da ma-kawunga dedi papuru-manja bàdi welingu lai MIRI ba wàngu pawotu-nya kameti maraku heu ana mbimbi hiluna. Jàka ndai bihu pa-papuru-nya nuna na kalandai, lupangu-ma kai poraku-ya na nggoruna. Nimbihu-da da anami mini da ma-kawunga dedi lupangu-ma kai papuru-nja bàdi welingu lai MIRI. 14Tai la lodu malamiri jàka da-paàrangu da anami, nggàra wànaka nu mbuu ndàbana, màta kai hema timinja yia, ‘Nawàngu mbiha manyola-na i MIRI ba nakaria-nda paluhu welingu la tana Mehiru, la ngia pa-paata-ta. 15Tàka ba na-malihu katiku-na na hanganji Mehiru dàngu ba nda nabihu pa-pahàla-nda palaku, i MIRI na-pameti hàlaha da anakeda mini da ma-kawunga dedi la Mehiru, ka ana tauya dàngu ka ana banda-yakai, tàka na nyuna nimbihu-da da kawunga ananda mini tahilu-ha ka papuru-nja,’ wàminja. 16Na huri nuna màta ka hama tuna karanja pungu-ndanya dàngu katàtu kaba mata-ndanya. Ba tunda nu jia hi tanamu mànuya ba i MIRI-maka na mambàda paluhu-ta welingu la Mehiru ba nawàngu mbiha manyola-na,” wàna.
Na tandai karumangu dàngu na tandai epi
17Ba napuli-nyaka palaku na banjaru Ihirailu paraïna hanganji Mehiru, nda na-karia-anja pali ningu la ànda na mali la tana Pilitingu paraïna i Ala, jiapa-kai ka jiaya na ànda na ma-dànggitu halawàla. Na pa-kanandi-na i Ala, “Napa da pekadu hàla era da tau nuda jàka daita-ya ba pabera-maipa bàdi, ka lupa beli-danyaka la Mehiru,” wàna. 18Jia-duyaka i Ala hi na-karia-nja pali la ànda ma-pawinggirungu, na mali la maràda telangu na ma-hanggangu la Tehiku Tibuhala.#Tehiku Tibuhala; Tangaru-ya la 10:19. Nu ba da-hadangu ba da-dunjaku-nya la Mehiru, da tau Ihirailu hawaritu-madanya madàka hama tuna malaku pa-pabera-maha.
19I Muha nangàndi-maha da riina i Yuhupu, nadu ba naluri-pa i Yuhupu, na-paràha-manjaka da tau Ihirailu pa-harangu, màta ka tumi nu ba wànanja. Tuna yia na hupu liina i Yuhupu, “La rehi pahàla-nanggai i Ala, mingàndi-maha bàdi da riinggu welingu lai yiahu,” wànanja.
20Da tau Ihirailu da-dunjaku-nya la Hukutu, hi da-pamaüngu la paraingu Etàmu, la halinggi maràda telangu. 21La lodu i MIRI nalaku mangilu-nja la lumbu tandai karumangu tàka la rudungu na mangilu-nja la lumbu tandai epi hi daita àndada. Tuna nu hi peku lakuda la lodu la rudungu. 22Piti weli mbaru lundu malingu na tandai karumangu ba hanina la hanggana nuna na banjaru tàka la rudungu lundu waihangu na tandai epi ba nalaku karia-nja.
Currently Selected:
LUHU 13: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
