LUHU 12
12
Na Pamangu Paha
1I MIRI napanii dànja i Muha dàngu i Harungu la tana Mehiru. Napanii-nja, 2“Na wulangu yiana jia-yaka na kawunga wulangu welingu la ndaungu pa-katutu-mu. 3Patàka-nya na pareta yiana la banjaru Ihirailu nggubulu-na: La lodu pa-hakambulu wàna na wulangu yiana, nimbihu-na na mini màta ka narupu heu ana mbimbi, ka dangaa ukurungu dàngu kuru umana. 4Jàka nda nadangu na kuru umana ràka mahàla-ya nuna na ana mbimbi ba heuna, ka da-pahamangu dàngu kuru uma angu ngiangu-da la lihida ka dangaa ukuru-nya nuna na ana mbimbi. Na toluna na ana mbimbi màta ka paberi-nya tundunya na danguna na angu kuru uma. 5Kai pindi mbimbi jàka ndia kamàmbi, na nyuna bumbu bàdi, mahau ndauna, dàngu àmbu ningu nyurana. 6Màta kai biliya lundu la lodu pa-hakambulu patu wàna na wulangu. La lodu nuna la malingu, mbuu ndàbana na banjaru Ihirailu màta ka darupu ana mbimbi tungu nu. 7Na hawutu na riana lupangu-ma kai perinya la punduku dàngu la pàlaku ditana na pindu la uma ngia pangangu-da. 8La rudungu nunama na tolungu nuna màta ka handara-nya dàngu ka nga wànya rii mapaita dàngu roti panda tungu tai wolu. 9Nuna na ana mbimbi lupangu handara ndàba-manya bàdi, màtu ndàbada na katiku-na, da wihina dàngu na ihi kambuna. Nganya na toluna na pambàda handarangu, àmbu ningudu pangaa matangu jàka ndia pa-manahu wai. 10Àmbu ningu pabili ana hawutu welingu la tolungu nuna lundu la mbaru; jàka ningu rihina, màta katunu pambuta-ya. 11Nu bai ngangu lupangu-ma ka mbàda màtu paki-mika la palaku, dàngu halapa la wihimi dàngu tokungu la limami. Màta kai nga pare - renggangu-ma. Nuna-duyaka nambabu-nya na Paha la patembi wàngga Nyungga, MIRI.
12La rudungu nuna njada-nggunyaka na tana Mehiru nggubulu-na, hi ku-pameti-ha nimbihu-da da kawunga ana mini, ka tauya, ka banda-yakai. Napa Nyungga kuhuku-nja mbuu ndàbada da marapu la Mehiru, nadu Nyungga ba MIRI-ka. 13Na ria na maninya la pindu umami, jia-yaka na tandada da uma ngia pa-ngiangu-mi. Jàka kuita-yaka na ria nuna, kulaku lànganggai dàngu nda ku-patàlaru-akai la rehi huku-nggunya na Mehiru. 14Lupangu-ma mi-pangàda-nya na lodu nuna ba lodu bokulu-na i MIRI-ya. Na pangalangu-na lupangu kai reminya nimbihu ndaungu na lodu nuna,” wàna.
Na Pamangu Roti Nda Patai Wolungu
15Napanii i MIRI, “Pihu mbua lodu mandaina ba nda uku nyimi pangangu roti patungu tai wolu. La lodu kawunga-na mbuu ndàbada da tai wolu lupangu-ma kai paluhu-ha welingu la umami, nadu nu la dalu pihu mbua lodu, jàka ningu haàtu mangangu roti patungu tai wolu, nyuna nda peku-anapa la pareki-ya ba anggota banjaru-nggunya. 16La lodu kawunga, hamanai la lodu papihu wàna, màta kai pauhi la palumu-ngga. La lodu nuna àmbu nggàradu paràma-mi hinggilu-na ba mi-paloku pangangu. 17La lodu nuna mbuu ndàbana na banjaru-mi ku-karia-nya paluhu welingu la Mehiru. Jia-duya na pangalangu-na la nimbihu ndaungu lupangu-ma kai pangàda-nya na lodu nuna ba lodu bokulu-ya. 18-20La wula kawunga, pakiri welingu la lodu pa-hakambulu patu wàna la rudungu, lundu la lodu dua kambulu hau la rudungu, nyimi àmbi ngangudu roti patungu tai wolu. Nu la dalu pihu mbua lodu paluhu hàlaha da tai wolu welingu la umami. Na tau Ihirailu jàka ndia na tau tàka, ba talànga remi nu, ka nangangu roti patungu muru, nda pareki-ayapa ba anggota banjaru-nggunya,” wàna.
Na kawunga Pamangu Paha
21I Muha napaau-nja mbuu ndàbada da liku uru Ihirailu, hi napanii-nja, “Iluawa kai piti nduma kuru umami heu ana mbimbi paremi wàndanya na Paha. 22Pitiwa ha-yubulu hihupu, kai hàbuya la tobungu maningu#kai hàbuya la tobungu maningu; jàka ndia: bànjalu-ya la pàlaku pindu, pangguru wànya ... wai riana na mbimbi, hàla kai perinya la punduku hapapa - hapapa dàngu la pàlaku ditana na pindu umami. Lupa la mbaru àmbu ningudu haàtu la hongami maluhu welingu la umami.
23La rehi njada-nanya yiana na tana i MIRI la pa-pameti tau Mehiru napa naita-ya na ria la punduku dàngu la pàlaku dita pindu umami napa nalaku lànganya na umami; nda na-pahia-anya patama na Papalewa Ma-pameti la umami pa-pameti-kai. 24Lupangu-ma nyimi dàngu da anami kai karadaku-nya yiana na pareta lundu nu - nu. 25Jàka mitama-nyaka na tana na paràndi-na i MIRI lai nyimi lupangu-ma mi-paloku-ya bàdi na lii yiana. 26Jàka da-paàrangu da anami, ‘Nggàraya duna na ihina na lii yiana?’ jàka wàda. 27Lupangu-ma kai hema, ‘Yiana jia-yaka na kameti maraku Paha ka tembi wànya i MIRI, nadu i MIRI ba nalaku lànganja da uma tau Ihirailu la Mehiru, la rehi pameti-nanja da kawunga ana mini tau Mehiru, tàka nyuta hi na-pahia-nda paluri ka wàmi!’ ” wànanja.
Ka maràbaku-danyaka da tau Ihirailu ba da-maraku-nya i MIRI. 28Ka laku-danyaka hi da-paloku-ya na lii pareta-na i MIRI lai Muha dàngu i Harungu.
Na pameti-ha da kawunga ana
29La mandalora i MIRI na-pameti hàlaha da kawunga ana minina na banjaru Mehiru, piti welingu la ana hanganji lupa la anada da tau pa-tahangu la uma kapàtangu. Mbuu ndàbada da banda da ma-kawunga dedi pa-pameti-mbuha. 30La rudungu nuna, na hanganji, da maningu wai ngabada dàngu mbuu ndàba na tau Mehiru, da-pawàla hàla. La nggubulu tana Mehiru parongu-ya na mahii kaladaku, nadu ba nda ningu hau uma manda ningu ma-mameti haàtu anakeda mini. 31La rudungu nunama na hanganji ba napaau-nya i Muha dàngu i Harungu hi napanii, “Ilaku ndàbawa welingu yiahu! Dunjaku-nya na tananggu! Lakuwa kai maraku-nya na Alami hama tuna na pakarai-mi. 32Ngàndi-hawa mbuu ndàbada da hapimi, da mbimbimi dàngu da kamàmbi-mi kai laku! Karai àrungga duku kanyuru ndumanggu!” wànanja.
33Da tau Mehiru da-runggatu-ha da tau Ihirailu ka da-parenggangu palaku dunjaku-nya nuna na tana. Dapanii, “Mameti hàlaka napa jàka ndai laku!” wàdanja. 34Da tau Ihirailu dapiti-ha da kanaingu maningu kanguta pa-haürungu pànda tungu tai wolu, da-kawuhuku wànja tera, hi daduku-ha. 35Nyuda danunju-mayaka na papanii-na i Muha, nu la pakarai ngaü àmahu marara mabara dàngu paki welingu la tau Mehiru. 36I MIRI najuju-ha da etida da tau Mehiru, hi damila-nja eti da tau Ihirailu, hi lupa dawua hàlanja da pakarai-daka. Ba tuda nu da tau Ihirailu luhu ngàndi-danjaka da banda pawulu-da da tau Mehiru welingu la tana nuna.
Da tau Ihirailu ba da-dunjaku-nya na tana Mehiru
37Ka hadangu-danyaka da tau Ihirailu, ba dali la wihi welingu la paraingu Raàmihu dalaku la paraingu Hukutu. Nggubulu-da tau 600.000 (nomu ngahu rata)-ya danguda, hinggilu-da da tau kawini dàngu da anakeda. 38Nyuda dangàndi padangu hapi, mbimbi dàngu kamàmbi. Hau daa-madai da tau hangàdangu da ma-tundungu. 39Datunu roti pànda tungu muru, welingu la kanguta pa-haurüngu da pangàndi-da welingu la Mehiru. Ba lalu harabàndangu-na ba dayaulu-ha, hi nda ningu pekuna la pa-paloku bàlangu-da.
40Na banjaru Ihirailu mbàda 430 mbua ndau-daka ngalada pa-ngiangu la Mehiru. 41La lodu njàpuna na ndaungu 430 wàna, pajurungu hàla-nanyaka na banjaru-na i MIRI ba da-dunjaku-nya na tana Mehiru. 42La rudungu nuna rimangu-na padua i MIRI ka iru ngàndiha nyuda paluhu welingu la Mehiru. Nu jia-duyaka la rehi malamiri na rudungu nuna ba rudungu pawotu lai MIRI-ya ka rudungu pa-ngàdangu-ya. Nu la rudungu tungu nu lupangu-ma na-pawàla bàdi na banjaru Ihirailu.
Na kalaratu paloku-ya na Pamangu Paha
43I MIRI napanii-nja i Muha dàngu i Harungu, “Yiana-yaka na kalaratu Pamangu Paha. Na tau hangàdangu nda ukua la pangangu tolu mbimbi na pa-maraku wàngu la lodu Paha. 44Na nyuna na tau ata pakei pekuna pangangu, mili mbàda hàla pakàri-ya. 45Na tau tàka jàka ndia na tau pa-wuangu hewa àmbu natundungudu pangangu. 46Mbuu ndàbana na toluna na mbimbi nganya la umama bàdi nda uku pangàndi-ya la hambeli. Àmbu ningudu hapungu rina papata. 47Mbuu ndàbana na banjaru Ihirailu lupangu-ma naremi-nya na pamangu nuna. 48Na tau manda kàri nda uku la panganya na pangangu la pamangu nuna. Na tau hangàdangu na mambàda pa-engangu la hongami jàka na-mbuhangu paremi-nya na Paha la pawotu-ngga Nyungga, MIRI, lupangu-ma mbuu ndàbana na mini la kuru umana ka kàri pàkuha bàdi. Hàlaka nu pareki-ha nyuda ba tau Ihirailu memangu-haka, nu peku-naka nyuda la patama-mbu la pamangu Paha. 49Na kalaratu hama-mana na pawàngu la tau Ihirailu memangu dàngu na tau hangàdangu na ma-paengangu la hongami nyimi,” wàna. 50Mbuu ndàbana na tau Ihirailu da-karadaku dàngu danunju hàla-maya na pa-pareta-na i MIRI lai Muha dàngu i Harungu. 51La lodu nuna i MIRI na-karia hàlanya na banjaru Ihirailu paluhu welingu la Mehiru.
Currently Selected:
LUHU 12: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
