EPIHU 2
2
Welingu la meti hanggangu la luri
1Àmangu nyimi mimeti la huri pangahu nadu nyimi bai njala dàngu bai panggaha da pareta-na i Ala. 2La rehi nu nyimi mitundunja da huri pawàna na pinu tana yiana; nu jia-duyaka ba mi-manundu la ma-kuaha-ya na hanggubu awangu nggailaru, nu da wàndi nàhu da ma-kuaha eti tau manda manundu lai Ala. 3Àmangu nyuta hama-manda dàngu nyuda; nyuta ba taluri tundunya na huri taunda dàngu ba tawunda-ya jàka nggàraya na pahàmu wàna na taunda dàngu na kanandingunda. La rehi nu nyuta tau panggàna hànggana i Ala-mbuta, hama tuna da tau hawiangu.
4Tàka nggiki bia-naka ihu na màja etina i Ala! Nyuna ba kanjupu namu-nanda nyuta, 5jiapa ka meti bia-ndanyapa la huri pangahu rukuda da papangga - papangga-nda, napaluri beli karia-nda dàngu i Karitu. Jia-duya, mbulungu-maana na hàmu etina i Ala, hi na-pamàna-nggai paraïna Nyuna. 6Ruku pa-mbulungu-nda dàngu i Karitu Yehu, i Ala na-paluri beli karia-nda dàngu Nyuna, ka pekuna ka ta-pareta karia-nya Nyuna dita la awangu. 7Hi tuna nu i Ala, ka peku ita-nanya tau la rehi na manàmu-nya, jàka nggiki hama bokulu-na na pa-namungu-na i Ala. Nuna na pa-namungu-na na-papawuwa-na i Ala ruku hàmu etina lai nyuta ba nalii paduanda i Karitu Yehu. 8-9I Ala nambuha-nggai nyimi, jia-duya hi na-pamàna-nggai rukuna bai pawai lai Yehu. Na mànangu-mi nda ruku pa-mukarungu wiki-ami. Nuna pawua juana i Ala-aya. Jia-duya, nda ningua haàtu majia ngamba ànga la ngerana nuna. 10Nyuta pawulu-na i Alata, dàngu napandoita lai Karitu Yehu ka pekuna nyuta ba ta-paloku-ya na hangia - hangia na mahàmu, na pambàda payema-nanda nyuta.
Pa-mbulungu rukuna i Karitu
11Angu dedi hapaela-mi nda tau Yahundi! Namuya na hadami la àmangu: Nyimi “tau nda kàri” wàdanggai paraï tau Yahundi, da mapeka wikida ba tau pakàri-ha (hi wàda ba mbàda ngalangu-dudaka tanda pa-pandoi tau la tàda ihida). 12La rehi nu nyimi ndai mbulungu-a dàngu i Karitu, nyimi tau hangàdangu-kai, ndai tama-a la banjaru papindina i Ala. Nyimi ndai tama-a la paingu pa-ràndingu-na i Ala dàngu banjaru-na. Nyimi bai luri la pinu tana yiana dàngu nda ningu monungu dàngu nda ningu Ala. 13Nàhu nyuna, bai mbulungu-ka dàngu i Karitu Yehu, nyimi àmangu mamarau làti pa-palihingu-kaika ruku metina i Karitu. 14Nadu i Karitu wiki jiaya na ma-pandami-nda. Nyuna na ma-pambulu-nya na tau Yahundi dàngu na tau nda Yahundi hi hau banjaru-aha. Na kangeli na ma-padirangu, nu na pa-muhungu, pa-nyungguru-yaka paraïna i Karitu ba na-palua-ya na wikina la kameti maraku. 15Na uku anggama Yahundi dàngu da pareta - pareta dàngu da kalara - kalaratu-na mbàda podahu-nanjaka paraïna i Karitu, ka pekuna nuda da tau dua banjaru ka hau banjaru tau bidiha, na ma-pambulungu dàngu Nyuna. Nuya na larana i Karitu ba na-pandamingu. 16Paraï ruku metina la ai harikangu, i Karitu na-pambulu-nja da tau dua banjaru, dàngu hi na-pandami-nja nyuda dàngu i Ala, hi lupa munangu-nanyaka na pa-muhungu. 17Nunaya na pakiri-na hi namai i Karitu la pa-bobaru-ya na Lii Mànangu rukuna nuna na pandami lai nyimi; ka lai nyimikai tau nda Yahundi mamarau àmangu welingu lai Ala, ka la tau Yahundi-kai malihi-nya i Ala. 18Ruku li padua-na i Karitu, nyuta mbuu ndàbanda – ka tau Yahundi ka tau nda Yahundi-kai – rukuna na Ngahuna i Ala na ma-mbulungu, peku-naka ba talihi-nya i Ama.
19Jia ba tuna, nyimi ndai tama-apa la tau hangàdangu jàka ndia tau la hambeli. Nyimi nàhu angu banjaru-na i Ala-kaika. Nyimi angu kuru umana i Alakai. 20Nyimimbu pa-pahadangu-kaika la lata watu uma, pabànjaluda da pa-pahurungu dàngu da wunangu,#la lata watu uma, pa-bànjalu-da da pa-pahurungu dàngu da wunangu; jàka ndia: la lata, nu da pa-pahurungu dàngu da wunangu. tàka i Karitu Yehu jia-yaka na watu mahupu marihi. 21Nyunaka na ma-panunggulu hàlanya na pa-pahadangu hi tuya Uma Ala na pa-patukingu ndumana i Ala. 22Nadu ba luri pa-mbulungu dàngu i Karitu, pa-pahadangu-mbukai nyimi angu da tau hawiangu, hi nadedi hau uma ndumana i Ala; lai nu na-ngiangu i Ala wàngu Ngahuna.
Currently Selected:
EPIHU 2: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
