EPIHU 3
3
Na ràmana i Paulu ndumana na tau nda Yahundi
1Nunaya na kirina, nyungga Paulu, hi patamangga la uma kapàtangu rukuna i Karitu Yehu lumumi nyimi nda tau Yahundi. 2Jiangu-maka duna bai rongu, ba ruku hàmu etina i Ala, mbàda pakata-nangganyaka yiana na wai ngeranggu lumumi nyimi. 3I Ala na-bunggahu-yaka na pa-kàpingu la pa-pakaka-na dàngu hi napeka-ngganya nyungga. (Na ngerana nuna mbàda tulihu pa-kababa-nggunyaka nu dita, 4dàngu jàkai mbahaya, napa ijàngapu-mayaka duna na pa-kàpingu rukuna i Karitu hama tuna nyungga ba ku-jàngapu-ya.) 5Àmangu nuna na pa-kàpingu ndedi pa-handàkangu-ma papeka-ya la tau, tàka nàhu na Ngahuna i Ala mbàda pawuwa-nanjaka da pa-pahurungu dàngu da wunanguna. 6Nuna na pa-kàpingu jiadu-yaka yiana: Nu la Lii Mànangu, da tau nda Yahundi da-kawàra pàda-njaka da kanyuru welingu lai Ala, làti àmangu ba payema-nanja da tau Yahundi-a duna. Da tau nda Yahundi angu ndàba-daka la tauna i Karitu, dàngu da-maràngga ngalanya jàka nggàraya na paràndi-na i Ala lai Karitu Yehu.
7I Ala na-pakata-ngganya na pawua-na – na wai ngeranggu – la pahàbaru-nya na Lii Mànangu. Ku-kataku-ya nuna na pawua-na paraï rukuna na kuaha-na i Ala na maràma daa la wikinggu nyungga. 8Welingu la nggubulu banjaru-na i Ala, nyungga-maaka duku marihi nda palingu. Ba tuna i Ala na-pakata-ngganya yiana na pawua-na: na wai ngera la pa-bobaru-nja da tau nda Yahundi na Lii Mànangu na ngera pawulu-na i Karitu na manda ningu njàpuna; 9dàngumbu ka pekuna ba welingu lai nyungga mbuu ndàbana na tau napinya jàka nggikina i Ala na Ma-padika-nya na pa-nggubulu awangu, ba na-paloku-ya na pa-pakaka-na, na pakàpi weli ndaingu la pinu tana yiana. 10Na pawuku-na i Ala jiaya ka pekuna nàhu, mbuu ndàbada da mayàpa kuaha la hanggubu awangu, ka dapinya welingu la kabungguru, na manggàna-na i Ala la màtu - màtu hadana. 11Ba na-pahàra-nya nuna i Ala nunju-nanya na pa-pakaka-na weli nungu, na papatumbuna lai Karitu Yehu, na Mirinda. 12Wànya na pawai lai Karitu dàngu ruku pa-mbulungu dàngu Nyuna, nawua-ndaka ma-kalongga la pa-hangiri-ya i Ala dàngu bundungu-na na pawai. 13Jia-duya na pakarainggu, jiaya: àmbi kadiku-dunya na ngera mayila-nggu lumumi nyimi, nadu mbuu ndàba-naka nuna ba jiaya na pahàmu wàmi nyimidu.
Na mbuhangu-na i Karitu
14Jiaya nuna-duka hi ku-marubuku nyungga la hanggana i Ama. 15Welingu lai Nyuna nimbihu-na na tau kuru uma la awangu dàngu la pinu tana, ba nangala-nya na hurina na ma-kahaungu. 16Ku-hamayangu mili àru i Ala na Mahupu Mangarangu ka na-orangu la pa-pamàndu-nya na eti dalumi wàngu Ngahuna. 17Mili àru ruku pawaimi lai Karitu, ka na-engangu i Karitu la etimi, dàngu na lurimi ka na-palatangu dàngu ka na-kuaha-ya paraï mbuhangu. 18Kuhamayangu mili àrukai pa-angungu dàngu mbuu ndàbana na kabungguru-na i Ala, kai manginjiru-ya jàka pira ndàbaru-na dàngu nunjuna, hamanai jàka pira janggana dàngu manjolungu-na na mbuhangu-na i Karitu, 19na panda hanggàlu pa-tanjiku-nda wàngu kanandingu tanggunda patau. Mili àru nyimi kai tandaya na mbuhangu-na i Karitu, ka peku mbinu wàngumi hada wikina i Ala na ma-lundungu.
20Wànya na kuaha-na i Ala na maringgitu paràma la wikinda nyuta, peku-manaka i Ala pa-paloku padangu na maliru lànganya na pakarai-nda jàka ndia na pa-kanandi-nda. 21Màla àru ka pa-mangunju-ya i Ala lundu ana handalaru handàdiku la kabungguru, rukuna i Karitu Yehu. Pa-wotungu-ya i Ala lundu nu - nu! Amingu.
Currently Selected:
EPIHU 3: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
