NDANIALU 3

Na wuangu pareta i Nembukatunehàru ka na-marubuku-nya na kahala tau àmahu rara paraïna rayatu

1La hau rehi pandoi-nanyaka hau kahala tau àmahu rara i Nembukatunehàru na janggana 27 metiru tàka na mbàlaru-na tika pa 3 metiru-na. Na-pandolaku-ya la ma-ndidaru Ndura la porupinihu Mbambilu. 2Tunaka nu na maràmba nadunda-nja mbuu ndàba da wakilu maràmba, da nggumbunuru, da mbupati da ama bokulu nanggara, da ma-pahàmu banda, da hakimu, da mahupu mapingu la uku, dàngu mbuu ndàbada da kapala ndaera ka ninja la lodu wunda lii pa-katua-ya na kahala tau pa-pandolaku-na nuna. 3Ba datàka ndàbaka dàngu ba da-ndolaku-ka la hanggana na kahala tau, 4wara pa-wàndingu-nanyaka na karaha maràmba, “Angu mbuha ma-welingu la mbuu ndàba banjaru-mi, kabihu banjaru-mi dàngu hilumi! Patingi-nyawa yiana na pareta-na na maràmba: 5Jàka nalingu na taropitu, hi da-pandutungu da lingu taleli, da jungga, da jungga rorahu, da jungga lamba, da taleli taropitu dàngu da li - linguda da malingu pa-mbabungu wàngu hawiangu, nyimi angu mbuha lupangu ipatika-ma bàdi pa-marubuku-nya na kahala tau àmahu rara pambàda pa-ndolaku-na na Maràmba Nembukatunehàru. 6Jàka nggamu manda nunjuya yiana na pareta, napa pa-ailulu ndauhaya la mata kalobungu ma-kandulangu,” wàna. 7Tàka ba rongu-haka ba palingu-ha da malingu pambabu wàngu, da tau welingu la mbuu ndàba banjaru, kabihu banjaru dàngu hilu, patika-danyaka hi da-marubuku-nya na kahala tau àmahu rara nuna.

Da matailu da anguna i Ndanialu pakàla-ha ba dapangga-ya na pareta maràmba

8Da tau Mbambilu da ma-ndapira-da dayema-ya na manggawangu nuna ka pa-hanggamàru-ya na tau Yahundi. 9Nyuda nu dapanii-nya na Maràmba Nembukatunehàru, “Màta àruki miri kau luri lundu nu - nu! 10Nyumu wiki-maka miri, mambàda wuangu-ya na pareta jàka palingu-kihaka da malingu da pambabu wàngu, lupangu-ma mbuu ndàba na tau na-patika ka na-marubuku-nya na kahala tau àmahu rara, 11tàka jàka nggamu manda nunjuya na pareta nuna napa pandauha-ya la mata kalobungu, ma-kandulangu ba wàmu. 12Tàka da tau Yahundi ba nda pirada da pambàda wuamu wai ngaba pareta la porupinihu Mbambilu dapangga-ya na pareta-mu miri. Nyuda nu jiaha i Hàndaràku, i Meha dàngu i Ambitunenggu. Da tau nuda nda dabihu palumu-nja da marapu-mu miri dàngu nda dabihu-mbu pa-marubuku-nya na kahala tau pa-pandolaku-mu miri,” wàda.

13Ba narongu-yaka nuna na maràmba dira mbeniya, hi na-wuangu pareta ka karia-nja da tau matailu nuda la hanggana. 14Na paàra-nja paraïna maràmba, “Oi Hàndaràku, Meha dàngu Ambitunenggu! Deningu-na dimi ba ndai bihua pa-marubuku-nja da marapu-nggu dàngu ba ndai bihumbu pa-patika la hangga kahala tau àmahu rara pambàda pa-ndolaku-nggu? 15Màla nàhu, mbuhangu dimi-nyaka pa-patika kai marubuku-nya na kahala tau jàka dalingu da malingu da pambabu wàngu? Jàka ndai bihu, napa pa-ailulu ndauhakai la mata kalobungu ma-kandulangu. Dàngu nggi marapu-ya bàdi na ma-duluku pa-pahàla-kai welingu la kawaha-nggu?” wànanja.

16Dahema i Hàndaràku, i Meha dàngu i Ambitunenggu, “Ou tamu umbu ma-mangarangu, nda ma-kamangu-a duma pa-kahiri wikima. 17Jàka na-duluku i Ala na palumu-ma pa-pahàla-kama welingu la mata kalobungu na ma-kandulangu dàngu welingu la kawaha-mu nyumu miri, lupangu-ma ba nawunda-ya.#Jàka na-duluku i Ala ... nawunda-ya; jàka ndia: Jàka ma-padeningu-ya ba ma-pajurangu la ngera lumunja da marapu-mu, miri, jàka ndia ba nda mabihu pa-marubuku-nya na kahala tau àmahu rara pa-pandolaku-mu miri, i Miri Ala na pa-lumuma na-duluku-ma pa-pahàla-kama welingu la mata kalobungu na ma-kandulangu dàngu welingu la limamu miri – dàngu jiangu-ma duna ba nawunda-ya nuna. 18Tàka jàka ngera hama tuna jàka nda nawunda-yakai, kau pinya miri nyuma duma nda jia lumu-amanja da marapu-mu miri dàngu nda ma-marubuku-mbunya na kahala tau àmahu rara na pa-pandolaku-mu nyumu miri,” wàdanya.

Ba huku pameti-ha i Hàndaràku, i Meha dàngu i Ambitunenggu

19Ka mbumbaru-nanyaka na mbenina na Maràmba Nembukatunehàru lai Hàndaràku, i Meha dàngu i Ambitunenggu, hi lupa na rara ndiangu na matana. Wuangu-nanyaka pareta ka papihu wunda-kinya na rihi mbanana na mata kalobungu. 20Hi na-paràhangu tau ma-kanjupu parii welingu la tanatara-na pahondu-ha i Hàndaràku, i Meha dàngu i Ambitunenggu dàngu ka ndauhaha la mata kalobungu na mambana. 21Ka lu hondu jàritu-dahaka nuda da tau matailu dàngu mbinu pakida, nu dàngu kamenja-da, kalembi malaida, nggubida dàngu paki hawiangu-da, hi ndauhaha la mata kalobungu na ma-kandulangu. 22Ba kanjupu pa-jàritungu-ya na pareta-na na maràmba, mbàda bonja dira matiki-danyaka na mbanana na mata kalobungu hi lupangu na roka epi na-pameti-ha paraï pa-mutungu da tau madanda-nja i Hàndaràku, i Meha dàngu i Ambitunenggu la lihi mata kalobungu. 23Tuna nu duka da tau matailu nuda ba dàngu hondu jàritu-ha ba da kanabu la mata kalobungu na ma-kandulangu.

24Hi jia dira katàtaku-biaya na Maràmba Nembukatunehàru. Nalu hada parenggangu hi nawara-nja da panggawi-na, “Ka nda tau matailu-aha da pahondu nda kawai hi tandauha-ha la epi?” wànanja.

Dahema, “Deningu-mana miri,” wàda.

25Nahema na maràmba, “Ka nggikina hi tau mapatu-haika da paita-nggu da ma-wenangu ni la epi? Nyuda nda pahondu-aha dàngu nda ana nggàra ehi-ada. Tàka na papatu wàda hama tuna maranongu-ya na matana,” wàna.

Da tau matailu pa-pahàla-ha hi paheinja pànggatu-da

26Tàka i Nembukatunehàru nalua hi na-mareni-nya na katonga mata kalobungu hi nawara, “Oi Hàndaràku, Meha dàngu Ambitunenggu atana i Ala Hupu Majangga! Luhu-kaiwa welingu la mata kalobungu!” wànanja. Ka luhu-danyaka. 27Mbuu ndàba da wakilu maràmba, da nggumbunuru, da mbupati, da panggawi - panggawi hawiangu da-karunggi-ha da tau matailu hi da itaha ba nda ana jonggaru-naha epi. Da lunggida nda da kehia, tàka da pakida nda da-mutungu-a, jiapa ka dawau kawuua ndiambu.

28Ka panii-naka na maràmba, “Wotu-nyawa i Ala na palumu-da i Hàndaràku, i Meha dàngu i Ambitunenggu. Nyuna mambàda palewa papalewa-na pa-pahàla-ha da tau matailu da atana da mawaiya Nyuna. Nyuda da pangga-yaka na pareta-nggu dàngu da rihi mbuhangu-pa pameti welingu la pamarubukungu jàka ndia pa-lumungu nggàra marapu bia hinggilu-na na Ala wiki-mada duda.

29Jia ba tuna, nàhu ku-wuangu pareta, nimbihu-na na tau welingu la nggàra banjaru, kabihu banjaru jàka ndia nggàra hilu biaya na ma-pawawa-ya na Alada i Hàndaràku, i Meha dàngu i Ambitunenggu, napa pala - làtaku-ya tàka hi nyungguru-ya na umana dàngu hi tuya pabundu watu. Nadu ba nda ningua marapu mamàka pawunda-ya na pambàda wundana i Ala nuna,” wàna.

30Hàlaka nu hi napahei-nja pànggatu-da i Hàndaràku, i Meha dàngu i Ambitunenggu paraïna maràmba, hi danjadi mapawai ngaba mangia dita la porupinihu Mbambilu.

Currently Selected:

NDANIALU 3: KAM

Highlight

Copy

Compare