NDANIALU 4

Na manggadipangu pandua wunda wàna i Nembukatunehàru

1Yiana-duyaka na pa-bobaru-na na Maràmba Nembukatunehàru na pa-pangàndi-na la tau - tauka la mbuu ndàba banjaru, kabihu banjaru dàngu hilu la nggubulu-na na tana:

“Tambi peku hàmu! 2Ku-mbuhangu papekaya rukuna na pa-hangàtarungu dàngu na pa-bànarungu na pambàda wundana i Ala Hupu Majangga lai nyungga.

3Kanjupu bokulu-ya na pa-bànarungu pawunda-na!

Kanjupu wirungu-ya na pa-hangàtarungu pa-patumbu-na!

I Ala napa maràmba-ya ludu nu - nu.

Nyuna na-katangu kawaha nda ningu dirana,” wàna.

4Nyungga duku ka-ndàdiku dàngu mambiru-nggu la umanggu dàngu kuluri mbokaru. 5Tàka la hau na rudungu ba talànga mahuru-nggu, ku-manggadipangu dàngu ku-ngalangu harii mata ma-pa-mangginggitu halawàla-ya na etinggu. 6Tàka hi kupaau-nja da mapingu - mapingu da maninja la Mbambilu ka da-pahabola-ngganya na ihina na manggadipangu. 7Tàka ba damaika da ma-manyura, da mapingu alimu, da tau manggàna dàngu da mapingu kandunu dàngu ba kupeka-nja na manggadipangu, nda haàtu-ma ma-ngalangu pa-pahabola-ya na ihina. 8La malamiri dehi mai-nanyaka i Ndanialu na pa-patamungu Mbelutaharu-mbu hama tamuna na marapu-nggu. I Ndanialu dajuju-ya ngahuda da marapu#da marapu; jàka ndia: i Ala. matua. Kupeka-ya na manggadipangu-nggu lai nyunambu, 9“Ha Mbelutaharu ngorada da tau manggàna, kupinggau nyumu ba dajuju-kau ngahuda da marapu#da marapu; jàka ndia: i Ala. matua, tàka hi nda ningu pa-kawiningu ma-kawiningu lai nyumu. Patingi-nyawa na manggadipangu-nggu#Talànga wanguna na-njenjangu ningu-mapa ba tuna yia na ihina: Patingi-nyawa na manggadipangu-nggu. Hilu Aràmu: Na harii mata la manggadipangu-nggu. dàngu pa-habola-yawa na ihina.

10Ba talànga mahuru-nggu kuita-ya hareti-na na pingi ai na matumbu la padua pinu tana. 11Na pingi ai nuna kanjupu janggaya; na bokulu dàngu na-kapingatu na polana. Na kapuka-na natàka la awangu, hi peku ita ndàba-nanya tau la pinu tana. 12Da rauna damuru hàmu dàngu dira ràjingu-ha da wuana, natoma ka nangangu na ma-mandapu-nya na pinu tana nggubulu-na. Da banda matàmba da-manyomba la lumbuna hi damaü dàngu da ma-hawurungu dawulu hibuda la kahanga-na. Dàngu mbuu ndàba na ngara maluri-ka dangangu wuana.

13Ba talànga kanandi-nggunya nu na harii mata, kuita-ya na haàtu papalewa napuru welingu la awangu; hawanjiru dàngu rimangu-mananya ba itaya. 14Wàngu pawàndingu-na napanii, ‘Pungguya nuna na pingi ai dàngu katoka-ha da kahanga-na, pamunju-ha da rauna, dàngu hàbaru-nja da wuana. Wànggaha da banda ma-manyomba la lumbuna dàngu da ma-hawurungu da mawulu hibuda la kahanga-na. 15Tàka màta bianya na kanjiru-na la unu tana. Hondu wànya nggili bàhi dàngu wudu ka màtanya la maràda pa-rumbangu. Màtanya ka nahini-ya wai hamburungu dàngu ka na-angunja da banda dàngu da ngara matumbu-ka. 16Màtawa na paeti taungu-na ka na-panjilungu la paeti bandangu pihu mbua ndaungu mandaina. 17Nuna duyaka na pabota-ma nyuma papalewa ma-rimangu dàngu ma-hawanjiru. Na pawuku-ma màtawa na tau la nggi - nggini ka na-pajia-ya, ba jiaya i Ala Hupu Majangga ma-kawaha-ha da pa-maràmba tau pinu tana dàngu na pa-maràmba nuna nawua-ya lai nggamu bia na papindi-na jiapa-kai ka la tau nda palingu ndoku!’ wàna.

18Oi Mbelutaharu, nuna-duyaka na manggadipangu-nggu. Nàhu panii-ngganya na ihina. Nda haàtu-ma welingu la mapi - pinguka da maninja la pa-maràmba-nggu ma-ngalangu papanii-ngganya, tàka nyumu mu-ngalangu, nadu ba dajuju-kau paraï da ngahuda da marapu#da marapu; jàka ndia: i Ala. ma-matua,” wànggunya.

Na pahabola-nanya na ihi manggadipangu i Ndanialu

19Ba narongu-yaka nuna, tàtaku wàna i Ndanialu i Mbelutaharu ba wàda-mbunya, dàngu jiapa na-hangàtaru hanina nda pira mbàdiku-na. Tàka nyungga Maràmba Nembukatunehàru, kupanii-danya, “Oi Mbelutaharu, àmbu nda jia nguduna na etimu rukuna na manggadipangu dàngu na ihina,” wànggunya.

Nahema i Mbelutaharu, “Dou na miringgu, dira hàmuya làti ngera hama tuna da matumbu - matumbu da panyura-na na manggadipangu ka nanggàna niha da muhumu miri, àmbu nyumudu miri. 20Na pingi ai na paita-mu miri na madira janggaya, hi lupa natoma la awangu na kapuka-na, dàngu hi peku ita-nanya mbuu ndàbana na tau la pinu tana. 21Da rauna damuru hàmu dàngu da-ràjingu da wuana hi natoma ka wuanya pangangu mbutana na ma-mandapu-nya na pinu tana. Da banda matàmba da-manyomba la lumbu maüna, dàngu da ma-hawurungu dawulu hibuda la kahanga-na. 22Dou na miringgu, jia-makauka nyumu nu miri na pingi ai na majangga dàngu na ma-kapingatu. Na bokulu-mu miri na-bonjangu lundu toma la awangu dàngu na kawaha-mu miri na-làmbatu toma la hupu tana. 23Uitangu-mbu miri haàtu papalewa mapuru welingu la awangu mapanii, ‘Pungguya yiana na pingi ai dàngu patàlaru-ya, na nyuna màtanya na kanjiru-na ka na-ndàdiku la unu tana. Hondu wànya nggili bàhi dàngu wudu ka màtanya la maràda pa-rumbangu. Màtanya ka nahini-ya wai hamburungu dàngu ka na-angunja da banda pihu mbua ndaungu mandaina,’ ba wàna.

24Dou na miringgu, yiana na ihina na harii mata nuna, dàngu yiana-ya na-pabota-na i Ala Hupu Majangga na manggàna-ya na ngeramu miri. 25Napa nyumu miri pawàngga-kau welingu la luri panggolu tau, tàka hiu luri la hongada da banda maràda. La ngala pihu mbua ndaungu nyumu miri ungangu rumba hama tuna hapi dàngu umahuru la mbila wailangu, hi nahini kau wai hamburungu. Hàlaka nu pajia-dumu-nyaka i Ala Hupu Majangga ba jiaya na ma-kawaha-ha da pa-maràmba tau pinu tana, dàngu na pa-maràmba nuna na wuaya lai nggamu bia na papindi-na. 26Da papalewa da-wuangu pareta ka màta bianya na kanjiru-na nu na pingi ai la unu tana. Na ihina nuna, nyumu miri ba hili maràmba beli-kaupa bau hàlaka miri papajia-ya ba jiaya i Ala na ma-kawaha-ya na pinu tana nggubulu-na. 27Ba tuna màtawa miri kau nunjuya na panaungu-nggu. Àmbu hili njàla-dupa miri, na nyuna wunda-yawa jàka nggàraya na mahàmu dàngu na ma-deningu, dàngu mila-njawa eti da tau mila.#Àmbu hili ... tau mila; jàka ndia: Palohu-wa rukuda da njalamu miri, bau wàngu pawunda mahàmu dàngu bau wàngu pamila-nja eti da tau mila. Ba tumu nu miri napa daingu pa-ohangu-mu,” wànangga.

28Mbuu ndàbada nuda danjadi la wikinggu nyungga Maràmba Nembukatunehàru. 29Hakambulu dàmbu wulangu la malamiri, la rehi nu njàlapu-nggunya la woka ngia pambawa la ndàdiku ditana na umanggu la Mbambilu, 30ku-kareuku, “Tàngaru, ai ma-kanjupu langatàka-ya na paraingu Mbambilu! Nyunggadu nu hi, matura-ya hi nanjadi parai puhu pareta nanggara pa-paloha wànya na kawaha dàngu na kapingatu-nggu, na bunjuku-nggu dàngu na bokulu-nggu!” wànggu.

31Ndedi nanjàpu-a na kareuku-nggu ba kurongu talia lii welingu la awangu, “Oi Maràmba Nembukatunehàru patingi-nya yiana! Na kawaha-mu ba maràmba kau papiti-yaka welingu lai nyumu. 32Napa nyumu pawàngga-kau welingu la panggolu tau pinu tana, dàngu hiu luri angungu banda la maràda. La ngala pihu mbua ndaungu napa nyumu ungangu rumba muru hama tuna hapi. Hàlaka nu pajia-dumunya-ka i Ala Hupu Majangga ba jiaya na ma-kawaha-ha da pa-maràmba tau pinu tana, dàngu na pa-maràmba nuna nawua-ya lai nggamu bia na pa-papindi-na,” wànangga.

33La rehi numa ba nanjadi na kareuku nuna. Nyungga, Nembukatunehàru pawàngga-ka welingu la panggolu tau pinu tana dàngu kungangu rumba hama tuna hapi. Na ihinggu nahini-ya wai hamburungu, na lungginggu hama malai ruu ihi kolaya dàngu da wuunggu hama madita wuu ma-hawurungu-ha.

I Nembukatunehàru nawotu-nya i Ala

34Ba na-làpahu-ka na rehi pihu mbua ndaungu, ku tangara la awangu, jia beli-yaka na-pàdangu-nggu wikinggu. Ka wotunggunyaka i Ala Hupu Majangga. Ku-wulaku pajangga-ya Nyuna na maluri pa-lupangu,

“I Ala na-pareta lundu nu.

Nyuna na ma-kawaha nda ningu dirana.

35Da banjaru la pinu tana nda nggàra-aha.

I Ala ma-kawaha-ha da papalewa la awangu dàngu da ma-mandapu-nya na pinu tana.

Nda ana haàtu-a ma-ngalangu pa-rawaku-ya na pawuku-na,

nda ningua matoru mbeni pa-paàrangu nggàraya na pawunda-na,” wànggu.

36Ba jia beli-yaka na pàdangu-nggu wikinggu, pawua belingu-yaka na bokulu-nggu, na mangunju-nggu dàngu nakawulanguna na pa-maràmba-nggu lai nyungga. Da panggawi-nggu dàngu da ma-pangora da-yemaka, dàngu hi pabeli-ngga la pa-maràmba-nggu, jiapa narihi bokulu-mbuipa na mangunju-nggu welingu la mangilu-na.

37Ba tuna nyungga nàhu, Nembukatunehàru kuwotu-nya ku-jijiku pajangga-ya dàngu ku-pamangara-nya na Maràmba Awangu. Mbuu ndàba da pawunda-na da-padeningu dàngu datànji, dàngu na-duluku-ma duna pa-pawawa-ya na tau na ma-ngànjangu, wànggu, wàna la huratu-na.

Currently Selected:

NDANIALU 4: KAM

Highlight

Copy

Compare