NA RUKUDA DA PA-PAHURUNGU 23
23
1I Paulu na-panau-ha da ma-batangu hàla panii-nanyaka, “Angu dedi! Lundu lodu nàhu nyungga nda ku-pàdangu-a njalanggu nyungga lai Ala daa la eti dalunggu na rukuna na luringgu,” wàna. 2Ba napanii tunaka nu i Paulu, na Ratu Bokulu Anania na-paràha-nya na tau ma-ndolaku lihinya i Paulu patàba weli ngaruya. 3Ka panii-nanyaka i Paulu hanggangu la ratu bokulu, “Natàba-makau i Ala na ha tau kapelu ma-matua kabàli! Bau mandapu hiana pa-rapatu-ka nyungga tundunya na ukuna i Muha, tàka hi nyumu wiki-maai mapangga-ya nuna na uku bau paràhangu tau patàba-ka!” wàna.
4Da tau da ma-ndolaku lihinya i Paulu dapanii-nya, “Pa-kamàla-munya nyumu na ratu bokulu-na i Ala!” wàdanya. 5Nahema i Paulu, “Ai ha, nda kupinya angu dedi ba ratu bokulu-ya nyuna. Tubangu-maduna daa la Huratu Matua ninya na pa-tulihu, ‘Àmbu pa-kamàla-duha da liku uru banjaru-mi,’ ba wàna,” hi wàna.
6I Paulu naita-ha hawiangu da ma-batangu ba dangu tau Handuki tàka hawiangui tau Parihi-ha. Jia-duyaka hi napanii la ma-batangu, “Angu dedi! Nyungga tau Parihi-ka, ana tau Parihi-makai. Bai rapatu-ka nyungga lai yiahu kirina ba kuwaiya na tau meti napa ba naluri beli,” wàna. 7Ba napanii tunaka nu, da tau Parihi dàngu da tau Handuki pa-lumungu-danyaka, hi lupa na-kawàri kadua banjarungu na batangu. (8Nadu na pakata-da da tau Handuki, da tau meti nda dahili luri-apa, nda ningua papalewa awangu, dàngu nda ningua wàndi wàda; tàka da tau Parihi dawai hàlaha ba ninja nuda.) 9Ka tumbu-nanyaka na pa-riwatu nda najaru-da. Ba ma-piraha da tau Parihi da ngguru anggama da-ndolaku pa-rawaku pa-langatàka-nja. Dapanii, “Tundunya na pa-kanandi-ma nyuma na tau yiana nda ningu ndoku hawutu njalana! Talànga wanguna ningu-maka duna wàndi jàka ndia papalewa mapanii dànya!” wàdaka.
10Hei mbana-mana-nyaka na pahàngganguda hi lupa mangàdatu-nanyaka na kimunda napa da-kambukuru-biaya i Paulu paraïda nyuda wàna. Ka paràha-madua-nanjaka da tanatara palua papiti-ya i Paulu welingu la padua-da nuda da tau hi da-karia-nya la tindingu.
11Hilu hau rudungu i Miri Yehu na-ndolaku la lihina i Paulu hi napanii-nya, “Pamàndu-nya na etimu! Nyumu mbàda hakahii-munggaka Nyungga la Yeruhali. Napa jiangu-ma bàdi bau hakahii-ngga la Romambu,” wànanya.
Da ma-pakapulingu la pa-pameti-ya i Paulu
12La mba - mbaru hadangu harii, pa-hamangu-danyaka da tau Yahundi pa-kapulingu. Da-harangu la panda ngangu la panda ngunungu jàka ndedi da-pameti-ya i Paulu. 13Ningu tau patu kambulu rihiya na ma-pahamangu pa-kapulingu. 14Dalua la ratu kapala dàngu la amabokulu Yahundi dapeka-nja, “Nyuma ma-pahamangu-ka la pa-harangu ba nda mangangu ba nda ma-ngunungu ngga - nggàra jàka ndedi ma-pameti-ya i Paulu. 15Na, nyimika dimi angu dedi dàngu hapa-jiaha da angu Batangu Anggama kai pangàndi-nya huratu na kimunda tanatara Roma kai karaiya ka nangàndi beliya i Paulu la hanggami nyimi, beri hama tuna ka ma-manginjiru beliya na palakara-na hama wàmi. Tàka nyuma duma rimangu-ma padua-ka pa-pameti-ya ba ndedi na-lundungu lai yiahu,” wàda.
16Tàka na ana anawini-na i Paulu narongu-maya nuna na pa-pakaka-da da ma-pakapulingu. Hi nalua la tindingu pa-paihi-nya i Paulu. 17Tàka i Paulu hi napaau-nya na haàtu na parawira hi napanii-nya, “Lua karia-nya yiana na anakeda la kimunda ba ningu pa-patàka-nanya na kimunda,” wàna. 18Nuna na parawira na-karia-nya na anakeda la kimunda hi napanii-nya, “I Paulu na tau papàtu napaau-ngga, hi nakarai-ka pakaria-nya yiana na anakeda lai nyumu, ka ku-patàka-nya hangia wànanggau,” wàna.
19Na kimunda nayàpa-ya na limana nuna na anakeda hi na-karia mehanya la hadidi hi na-paàra-nya, “Nggàraya nu ka ku-patàka-nya lai nyuna ba wàmungga?” hi wànanya.
20Nahema nuna na anakeda, “Da tau Yahundi da-pahamangu-ka la pakarai-kau nyumu kau karia-nya i Paulu la Batangu Anggama haromu, beri ka mahili pareha ma-nginjiru beliya na palakara-na wàda. 21Tàka àmbu tundu-dunja umbu, nadu ninja ba tau patu kambulu rihiha da ma-kapàndi la pabuti-nya la ànda. Nyuda mbàda harangu-madaka la panda ngangu la panda ngunungu jàka ndedi da-pameti-ya i Paulu. Nàhu duda rimangu-da padua-ka; patia-danya na hemamu nyumu-ma-kiaka,” wàna. 22Na kimunda napeka-nya na anakeda, “Àmbu panii-duya nuna jiapa nda lai nggamuya, nu ba mbàda paihi-munyaka nuna lai nyungga,” wànanya. Hàla hi na-paràha-nya nuna na anakeda pabeli.
I Paulu ba karia-nya lai Peliku
23Tunaka nu na kimunda napaau-nja da parawira tau madua hi napanii-nja, “Hawaritu-ha da panjuri tau dua ngahu dàngu tanatara la njara tau pihu kambulu dàngu tau dua ngahu tanatara ma-kawanangu nimbu, hadangu ka dalaku memangu la rudungu nàhu la njàmu hiwa la Kaiharia. 24Payema-mbunya njara pa-kaliti-na i Paulu dàngu kai karia dàngu hàmunya lundu tàka lai Nggumbunuru Peliku,” wànanja. 25Hàla tulihu-nanyaka huratu, tuna nu na ihina,
26“Ma-mangarangu Nggumbunuru Peliku. Tambi wànggunggau nyungga Kalaundiu Lihia! 27Na tau yiana dayàpa-ya paraï tau Yahundi, hawutu-kika làti hi nda da-pametiya, jàka nda kulu tàka dàngu tanatara-nggu hi ma-pamara-ya, nadu ba kurongu nyuna ba tau ma-ngerangu mandapu tau Roma-ya. 28Ba ku-mbuhangu papinya jàka nggàra-maka duna pa-panjala wàdanya, ka ngàndi-dunggu-nyaka la Batangu Anggama-da. 29Tàka na lohangu ba nda ninguma duna hau paruku-na ràka pa-hukungu wànguya hukungu meti jàka ndia patama la uma kapàtangu. Na pakàla wàdanya jia-maaya na ma-panuangu la uku anggama wikida. 30Tunaka nu ningu mapanii-ngga ba ninguka pa-pakaka-da ma-akatu da tau Yahundi hanggangu lai nyuna. Jia hi ku-pangàndi ailulu-maanya lai nyumu umbu nggumbunuru. Dàngu ku-paràha-manjaka da makàla-ya ka da-pangala-maanya lai nyumu na kàla-danya wànggu,” wàna.
31Ba hapajia-ha da tanatara da-pahàra-nya na wai ngerada. Dapiti-ya i Paulu hi dakaria-nya la rudungu nuna tàka la Atipàtirihu. 32Hadangu harii puli-danjaka da tanatara la njara pangàndi pangala-nya i Paulu, tàka nyuda beli-danyaka la tindingu. 33Nu da pamba la njara ba datàka-ka la Kaiharia, patàka-danyaka na huratu la nggumbunuru, hàla hi da-pakata-nya i Paulu lai nyuna. 34Ba nahàla-ka na nggumbunuru pambaha-ya na huratu, paàra-nanyaka i Paulu jàka nggi paweli-na. Ba napi-nyaka i Paulu ba welina la Kilikia, 35panii-nanyaka, “Hàmudu! Napa ka ku-pareha-ya na palakara-mu, era tàka-daka da tau da makàla-kau lai yiahu,” wàna. Hàla wuangu-nanyaka pareta, ka pàtuya i Paulu la uma hanganji-na i Harondi.
Currently Selected:
NA RUKUDA DA PA-PAHURUNGU 23: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
