NA RUKUDA DA PA-PAHURUNGU 22
22
1“Mbuu ndàbami ama dàngu angu dedi! Màta ka ku-kahiri wikinggu wànggu. Kamangu kai patingi-ngga!” wàna. 2Ba darongu-yaka i Paulu ba na-kareuku wàngu hilu Imbarani, ka bonjangu-nanyaka na kahàna-da. Ka pangala-nanyaka i Paulu na pa-kalokangu-na. 3“Nyungga tau Yahundi-ka,” wàna i Paulu, “nyungga dedinggu la Tàruhu, la tana Kilikia, ba tuna nyungga matua-nggu lai yiahu la Yeruhali, nyungga na-ajaru pahàmu-mangga paraïna ngguru bokulu Nggamalialu la ukuna i Muha pawua-nanja da boku la mangilu-nda. Hama tuna nyimi mbuu ndàbami lai yiahu la lodu nàhu, ku-ringgitu-mai duku nyungga lumuna i Ala. 4Nyungga ku-pamayila-ha lupa dameti da tau da makiku-nya yiana na pa-ajaru mabidi. Nyuda mbuu ndàbada ka miniya ka kawini-yakai kuyàpa-ha hi kupuhi-ha la uma kapàtangu. 5Na Ratu Bokulu wiki hamanai nggubulu-da la Batangu Anggama peku hakahii-dangga nyungga ba nda kambàliku-nggunya. Nadu ba nyuda-maka da mawua-ngga huratu laku, na pa-patàkangu-ha da tau Yahundi la Ndamàhiku. Wànya na huratu nuna pekuna ba kuyàpa-ha da tau da mawaiya nuna na lii pa-ajaru mabidi, hi karia-nja la Yeruhali la pahuku-nja,” wàna.
I Paulu ba na-wàlahu-ya na paera-na
(Pphr. 9:1-19, 26:12-18)
6“Ba talànga laku-ngguka nu dàngu ba mareni tàka-ama-ngguka la Ndamàhiku, la tidu lodu hi jia panjiru wàna bia na ma-kajilaku welingu la awangu na maharii weli winggiru-ngga. 7Ka tanulahu-nggunyaka la tana hi kurongu-ya na lii na mapanii dàngga, ‘Hauluhu, Hauluhu! Nggikina hiu pa-mayila-ka?’ wàna. 8Ka paàrangu-nggunyaka, ‘Ka nggamukau Miri?’ hi wànggunya. ‘Ka Nyunggadu Yehu na tau Naharitu na pa-mayila-mu,’ hi wàna ba nahema. 9Da tau da maninja lai nu da ma-karia-ngga daita-maya na ma-kajilaku, tàka nda darongu-aya na lii na mapanii dàngga. 10Ka hilu paàra-nggunyaka, ‘Nggikina wànggu-aka bàdi Miri?’ hi wànggu. Nahema i Miri, ‘Hadangu-wa kau tama la Ndamàhiku. Lai nu napa ka paniinggau-nyaka mbuu ndàbana na pawuku-na i Ala na paràma-mu nyumu,’ wànangga. 11Ka poki-nggunyaka nyungga rukuna na ma-kajilaku na panda tara. Jiaha da angu-angguka da malonda-ka patama la Ndamàhiku.
12Lai nu ninya na haàtu, na ma-tamungu Anania. Nyuna tau manundu-ya dàngu na-tuturu panunju-ha da ukuna i Muha. Mbuu ndàbada da tau Yahundi la Ndamàhiku kanjupu tembi-danya nyuna. 13Namai pa-tadalu-ka, hi na-ndolaku la karaha-nggu hi napanii, ‘Angu dedi Hauluhu, màlawa nu kau ngita beli!’ wànangga. La rehi nu ku-wulaku-ha da matanggu, ka ita-madua-nggunyaka nyuna. 14Tunaka nu hi napanii-ngga, ‘Na Alada da boku la mangilu-nda napindi-kauka nyumu kau pinya na pambuha-na dàngu kau itaya i Yehu, na Atana i Ala na ma-palaku-ya na pawuku-na i Ala dàngu kau ronguya na lii wikina i Yehu. 15Nyumuka napa ma-hakahii la pa-bobaru-nya na tau mbuu ndàbana jàka nggàraya na paita-mu dàngu na parongu-mu. 16Nàhu àmbu hili patiangu-dupa. Hadangu-wa nu kau pa-jàmangu wikimu ka parunu-nggau. Warawa lai Miri ka na-pahàla-kau welingu la nja - njalamu,’ ” wànangga.
I Ala na-paràha-nya pa-pabobarungu i Paulu la banjaru hawiangu nda Yahundi
17“Beli-nggunyaka la Yeruhali, ba talànga hamayangu-ngguka la Umana i Miri, kuaha-nanggaka Ngahuna i Ala. 18Kuita-ya i Miri na-paniingga, ‘Dunjaku parengga-nya la Yeruhali, nadu na tau lai yiahu, nda da-kataku-aya napa na pa-hakahii-mu rukunggu Nyungga,’ wànangga. 19Kuhema nyungga, ‘Miri, ba dapi hàmu-dungga, ba kutama-nja da uma ngia pa-lumungu-da, hi kuyàpa-ha dàngu hi kupalu-ha da tau da mapawai lai Nyumu. 20Tumanai ba jiaya na pameti-ya na hakahii-mu i Hitipanu, ni wiki-mangga nyungga lai nu, dàngu ku-patunju-maya nu ba pameti-ya. Màlai nyungga-maka madaiha da pakida da tau da ma-pameti-ya,’ wàna. 21Tàka nahili paniingga i Miri, ‘Lakuwa nyuna, nadu ba paràha-nggunggauka nyumu la mamarau la tau nda Yahundi,’ ” wànangga.
22Da tau patingi-mada-nyapa làti i Paulu ba napanii, tàka ba napanii-yaka nu na patiki malamiri-na, wara pakodungu-madua-danyaka, “Pameti biaya na tau tungu nu. Nda ràka-ana nyuna la paluri!” wàda-madua-ka. 23Ba dàngu kaladaku-da nu kàmbahu-madanja da kalembi bokulu-da, ka ha-mbutalu-nanyaka na kumburu tana. 24Tàka na kimunda tanatara Roma, paràhangu-nanyaka patama ngàndiya i Paulu la tindingu, ka peku pareha wànya ma-hanggàritu lai nu, ka pinya nggikina da tau Yahundi hi da-kaladaku tudanya nu nyuna. 25Tàka ba dahondu-yaka ka ràmbahu-ya ba wàda, ka panii-nanyaka i Paulu la parawira na ma-ndolaku lai nu, “Màla peku-naka nu na tau ma-ngerangu mandapu tau Roma ba pa-ràmbahu-nya dàngu ndedi pa-rapatu-ya?” hi wàna.
26Narongu-yaka nuna, na parawira hi nalua la kimunda tanatara hi napanii-nya, “Nggàra-yaka ni na paula-mu umbu? Na tau nina ma-ngerangu mandapu tau Roma-ya!” hi wàna.
27Ka lua-nanyaka na kimunda lai Paulu, hi na-paàra-nya, “Màla pekangga, tubana dumu ba ma-ngerangu mandapu tau Romakau!” wànanya.
“Wua,” hi wàna i Paulu, “nyungga ma-ngerangu mandapu tau Romaka,” hi wàna. 28Napanii na Kimunda, “Nyungga ba kutama la pangera-nya na mandapu tau Roma ku-mbayaru padangu-ma!” wàna.
Nahema i Paulu, “Nyungga duku padedi ngàndi-manggunya la pangera-nya na na mandapu Roma,” hi wàna. 29La rehi nuna-madua-ka ba da-kandulingu da angu tanatara ka pareha-ya i Paulu ba wàda làti dàngu na kimunda-mbu na-mangàdatu wànyaka, nadu ba mbàda tuna-nyaka nggili bàhi i Paulu, làti duna ba ma-ngerangu mandapu tau Romaya.
I Paulu la hangga Batangu Anggama
30Na kimunda tanatara Roma na-rinjungu langatàka la papinya jàka nggàra ma-pawiti-nja da tau Yahundi hi da-panjala-ya i Paulu. Jia-duyaka hadangu harii hi napaau-nja da ratu kapala dàngu na Batangu Anggama ka da-pauhi. Hàla hi pukalu-ha da nggili bàhina i Paulu, tunaka nu hi na-karia-nya la hanggada nyuda mbuu hàlada.
Currently Selected:
NA RUKUDA DA PA-PAHURUNGU 22: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
